Accessibility setting

Agpili iti lengguahe

Mapan iti segundario a pagpilian

Mapan iti listaan dagiti linaonna

Mapan iti linaonna

Dagiti Saksi ni Jehova

Iloko

Ti Librok Dagiti Estoria ti Biblia

Estoria 85: Naiyanak ni Jesus iti Kuadra

Estoria 85: Naiyanak ni Jesus iti Kuadra

AMMOM kadi daytoy bassit nga ubing? Wen, isu ni Jesus. Isut’ kaiyan-anak iti maysa a kuadra. Ti kuadra ket isut’ pagap-apunan ti an-animal. Pinagidda ni Maria ni Jesus iti kulloong, a pagpakpakanan ti an-animal.

Apay nga addada ditoy? Ti agturay ti Roma nangaramid ti linteg a tunggal maysa agsubli iti ilida nga isut’ nakaiyanakanda tapno maisurat ti naganda iti libro. Naiyanak ni Jose ditoy Betlehem. Ngem idi dimtengda ken Maria ditoy, awanen ti mapagdagusanda. Isu a napanda ditoy yan ti an-animal. Ken iti daytoy nga aldaw, impasngay ni Maria ni Jesus.

Da Jose, Maria, ken ti maladaga a ni Jesus

Makitam kadi dagiti papastor nga umay kumita ken Jesus? Addada idi idiay taltalon nga agay-aywan ti karkarneroda, idi nagparang ti anghel kadakuada! Kuna ti anghel: ‘Dikay agbuteng! Adda naimbag a damag nga iyegko kadakayo. Ita nga aldaw idiay Betlehem, ni Kristo nga Apo naiyanaken.’ Ket apaman latta immay ti adu nga anghel ket nagdaydayawda iti Dios. Dagdagus dagitoy a papastor dardaras a binirokda ni Jesus, ket itan isut’ nasarakandan.

Ammom kadi no asino a talaga ni Jesus? No malagipmo, iti umuna nga estoria daytoy a libro naammuantayo maipapan ti umuna nga Anak ti Dios. Daytoy nga Anak ti kadua ni Jehova a nangaramid kadagiti langit ken ti daga ken isuamin. Isu ni Jesus daytoy!

Wen, innala ni Jehova ti biag ti Anakna manipud langit ket inkabilna iti aanakan ni Maria. Nangrugi a dumakkel ti ubing idiay tian ni Maria, kas met laeng ti dadduma nga ubbing dumakkelda iti tian ni nanangda. Ngem daytoy isut’ Anak ti Dios. Itan makitamon no apay a nakaragragsak dagiti anghel a mangibaga kadagiti tattao a naiyanaken ni Jesus?

Lucas 2:1-20.



Dagiti Saludsod

  • Siasino ti bassit nga ubing iti ladawan, ket pangipaiddaan kenkuana ni Maria?
  • Apay a naiyanak ni Jesus iti maysa a kuadra nga ayan dagiti animal?
  • Iti ladawan, siasino dagiti lallaki a sumsumrek iti kuadra, ket ania ti imbaga kadakuada ti maysa nga anghel?
  • Siasino a talaga ni Jesus?
  • Apay a maawagan ni Jesus kas Anak ti Dios?

Kanayonan a salsaludsod

  • Basaenyo ti Lucas 2:1-20.

    Ania ti akem ni Cesar Augusto iti pannakatungpal ti padto maipapan iti pannakayanak ni Jesus? (Luc. 2:1-4; Mik. 5:2)

    Kasano a ti maysa a tao ket maibilang kadagidiay madakdakamat kas “tattao nga addaan naimbag a nakem”? (Luc. 2:14; Mat. 16:24; Juan 17:3; Ara. 3:19; Heb. 11:6)

    No dagidiay napakumbaba a papastor a Judio ket addaanda iti rason nga agrag-o iti pannakayanak ti Manangisalakan, ania ti napatpateg pay a panggapuan nga agrag-o dagiti adipen ti Dios ita? (Luc. 2:10, 11; Efe. 3:8, 9; Apoc. 11:15; 14:6)

Ammuem ti Ad-adu Pay

Kaano a Nayanak ni Jesus?

Ammuem no apay a maramrambakan ti Krismas iti Disiembre 25.