Accessibility setting

Agpili iti lengguahe

Mapan iti segundario a pagpilian

Mapan iti listaan dagiti linaonna

Mapan iti linaonna

Dagiti Saksi ni Jehova

Iloko

Ti Librok Dagiti Estoria ti Biblia

Estoria 101: Pinatayda ni Jesus

Estoria 101: Pinatayda ni Jesus

KITAEM ti nagdakes a banag a mapaspasamak! Patpatayenda ni Jesus. Isu ti inkabilda iti maysa a kayo. Inlansada ti im-ima ken saksakana. Apay nga adda asinoman a mayat a mangaramid iti dayta?

Matmatay ni Jesus

Ngamin ta dadduma a tattao guraenda ni Jesus. Maysa kadakuada isu ti dakes nga anghel a ni Satanas a Diablo. Isu daydiay nangsugsog kadagiti kabusor ni Jesus a mangaramid iti daytoy nagdakes a krimen.

Uray pay sakbay a nailansa ni Jesus iti daytoy a kayo, adun a kinadakes ti inaramid dagiti kabusorna kenkuana. Malagipmo pay ti inyaay dagiti relihiuso a papangulo idiay hardin ti Getsemani ken tiniliwda? Ita, kitaentayo ti sumaganad a napasamak.

Idi innaladan ni Jesus, nagtataray dagiti apostolesna ta agbutengda. Ngem di unay immadayo da Pedro ken Juan. Simmursurotda tapno makita no aniat’ mapasamak ken Jesus.

Impan dagiti papadi ni Jesus ken lakay nga Annas, a dati a nangato a padi. Sada impan ni Jesus idiay balay ni Caifas, nga isu ita ti nangato a padi. Adu a relihiuso a papangulo ti naguurnong idiay balayna.

Ditoy a naaddaanda ti bista. Nagulbod dagiti tattao maipapan ken Jesus. Amin a relihiuso a papangulo ti nagkuna: ‘Masapul a matay ni Jesus.’ Ket tinupraanda ti rupana, ken danogenda pay.

Bayat a maar-aramid daytoy, adda ni Pedro idiay ruar ti paraangan. Maysa nga adipen a babai ti nakakita ken Pedro, ket kunana: ‘Daytoy a tao ti kadkadua met ni Jesus.’

‘Saan, dinak kadua!’ insungbat ni Pedro.

Namitlo a kuna dagiti tattao a ni Pedro kadua ni Jesus, ket tunggal daras kuna ni Pedro a saan a pudno dayta. Iti kapamitlo a kuna ni Pedro daytoy, timmaliaw ni Jesus ket kimmita kenkuana. Nagladingit unay ni Pedro gaput’ panagsaona kadagitoy a kinaulbod, isu a pimmanaw ken nagsangit.

Idi a lumgaken ti init iti agsapa ti Biernes, innala dagiti papadi ni Jesus idiay dakkel a pagtataripnonganda, ti Sanhedrin. Ditoy a nagsasaritaanda manen no ania ti aramidenda kenkuana. Isu ti impanda ken Poncio Pilato, ti agturay iti distrito ti Judea.

Imbagada ken Pilato a rebbeng a mapapatay ni Jesus. Ngem kuna ni Pilato kadakuada: ‘Awan makitak nga aniaman a dakes nga inaramidna.’ Ket ni Pilato imbaonna ni Jesus ken Herodes Antipas. Uray met ni Herodes awan met ti makitana a dakes nga inaramid ni Jesus, gapuna isu manen ti pinasublina ken Pilato.

Kayat ni Pilato nga ibulos ni Jesus. Ngem dagiti kabusor ni Jesus kayatda a ti tulisan nga agnagan Barabbas ti maibulos a maisandi kenkuana. Tengnga ti aldaw itan. Inyeg ni Pilato ni Jesus idiay ruar ken kinunana: ‘Kitaenyo! Ti ariyo!’ Ngem dagiti kangrunaan a papadi ti nagikkis: ‘Ipanawmo! Papatayenyo!’ Gapuna impanawda ni Jesus tapno mapapatay.

Iti nasapa a malem ti Biernes nailansan ni Jesus iti kayo. Iti agsumbangir a sikigan ni Jesus maysa a kriminal ti patpatayenda met iti kayo. Dika makita dagitoy iti retrato. Di nagbayag sakbay a natay ni Jesus, maysa kadagiti kriminal ti nagkuna kenkuana: ‘Laglagipennak no addakanton iti pagariam.’ Simmungbat ni Jesus: ‘Ikarik nga addakanto kaniak idiay paraiso.’

Saan kadi a nagsayaat a kari dayta? Inton agturayen kas ari ni Jesus idiay langit, isublinanto daytoy a tao iti biag tapno tagiragsakennanto ti baro a paraiso ditoy daga. Ditay kadi maragsakan met iti dayta?

Mateo 26:57-75; 27:1-50; Lucas 22:54-71; 23:1-49; Juan 18:12-40; 19:1-30.



Dagiti Saludsod

  • Siasino ti kangrunaan a makinggapuanan iti ipapatay ni Jesus?
  • Idi innala dagiti relihioso a papangulo ni Jesus, ania ti inaramid dagiti apostol?
  • Ania ti napasamak idiay balay ni Caifas, ti nangato a padi?
  • Apay a pimmanaw ken nagsangit ni Pedro?
  • Idi naisubli ni Jesus ken ni Pilato, ania ti inyikkis dagiti kangrunaan a papadi?
  • Ania ti napasamak ken ni Jesus iti nasapa a malem ti Biernes, ket ania ti inkarina iti maysa a kriminal a nailansa iti kayo iti abayna?
  • Sadinonto ti ayan ti Paraiso a dinakamat ni Jesus?

Kanayonan a salsaludsod

  • Basaenyo ti Mateo 26:57-75.

    Iti ania a pamay-an a dagiti kameng ti nangato a pangukoman dagiti Judio impakitada a dakes ti panagpuspusoda? (Mat. 26:59, 67, 68)

  • Basaenyo ti Mateo 27:1-50.

    Kasanotayo a maikuna a saan a pudpudno ti panagbabawi ni Judas? (Mat. 27:3, 4; Mar. 3:29; 14:21; 2 Cor. 7:10, 11)

  • Basaenyo ti Lucas 22:54-71.

    Ania ti masursurotayo iti panangilibak ni Pedro ken ni Jesus iti rabii a pannakaliput ken pannakaarestona? (Luc. 22:60-62; Mat. 26:31-35; 1 Cor. 10:12)

  • Basaenyo ti Lucas 23:1-49.

    Kasano a nagtignay ni Jesus iti laksid ti kinaawan hustisia a naaramid kenkuana, ket ania ti masursurotayo iti daytoy? (Luc. 23:33, 34; Roma 12:17-19; 1 Ped. 2:23)

  • Basaenyo ti Juan 18:12-40.

    Ania ti ipakita ti banag a nupay adda kanito a nagbuteng ni Pedro iti tao, bimmileg met laeng ken nagbalin a naisangsangayan nga apostol? (Juan 18:25-27; 1 Cor. 4:2; 1 Ped. 3:14, 15; 5:8, 9)

  • Basaenyo ti Juan 19:1-30.

    Ania ti balanse a panangmatmat ni Jesus kadagiti material a banag? (Juan 2:1, 2, 9, 10; 19:23, 24; Mat. 6:31, 32; 8:20)

    Kasano a dagiti sasao ni Jesus sakbay ti ipapatayna ket naballigi a deklarasion a naitandudona ti kinasoberano ni Jehova? (Juan 16:33; 19:30; 2 Ped. 3:14; 1 Juan 5:4)

Ammuem ti Ad-adu Pay

Naipan ni Jesus ken Anas, Sa ken Caifas

Ti pannakabista ni Jesus ket panangballikug iti hustisia.

Nabista iti Sanhedrin, Kalpasanna ken Pilato

Impakita dagiti panguluen ti relihion dagiti Judio ti pudno a panggepda.

Nagsagaba iti Kayo a Pagtutuokan ti Awan Basolna nga Ari

Dakkel ti epekto ti kari ni Jesus iti maysa kadagiti kriminal a kaduana a mapapatay.

Ikabesayo ti Juan 3:16

Ammuenyo ti kuna ti Juan 3:16, sa usarenyo dayta inton mangasabakayo.