Mapan iti linaonna

Mapan iti segundario a pagpilian

Mapan iti listaan dagiti linaonna

Dagiti Saksi ni Jehova

Iloko

Ti Librok Dagiti Estoria ti Biblia

Estoria 100: Ni Jesus Idiay Hardin

Estoria 100: Ni Jesus Idiay Hardin

KALPASAN ipapanawda iti makingngato a kuarto, napan ni Jesus ken ti apostolesna idiay hardin ti Getsemani. Ita kuna ni Jesus kadakuada nga agsalukagda ken agkararagda. Sa immadayo bassit kadakuada, ket indumogna ti rupana tapno agkararag.

Kalpasanna nagsubli ni Jesus kadagiti apostolesna. Aniat’ kunam nga ar-aramidenda? Matmaturogda! Namitlo a kuna ni Jesus kadakuada nga agsalukagda, ngem tunggal agsubli makitana a matmaturogda. Kalpasanna kuna ni Jesus: ‘Dimtengen ti oras tapno maiyawatak kadagiti kabkabusorko.’

Iti dayta a kanito, maysa a bunggoy dagiti lallaki a nakakampilan ken sipapang-or ti immay! Idi nakaasidegdan, adda rimmuar iti tengnga ti bunggoy ket immasideg ken Jesus ket inagkanna. Ti lalaki ket isu ni Judas Iscariote. Apay nga inagkanna ni Jesus?

Ni Judas liniputanna ni Jesus

Nagimtuod ni Jesus: ‘Judas, liputannak aya babaen iti maysa nga agep?’ Wen, ti agep maysa a pagilasinan. Ipakaammo dayta kadagiti tattao a kakuyog ni Judas a daytoy ni Jesus, ti tao a kayatda. Gapu itoy dimmuklos dagiti kabusor ni Jesus a mangkemmeg kenkuana. Dagus a nanguyos ni Pedro ti kampilan nga itugtugotna ket tinagbatna ti tao nga asideg kenkuana. Naiyabas ti kampilan iti ulo ti lalaki ket napingas ti kannawan a lapayagna. Ngem sinagid ni Jesus ti lapayag ti lalaki ket inagasanna.

Kuna ni Jesus ken Pedro: ‘Isublim ti kampilan iti baina. Dika kadi ammo a mabalinko ti agdawat iti Amak ti rinibo nga anghel a mangisalakan kaniak?’ Wen, mabalinanna dayta! Ngem di nagdawat ni Jesus iti Dios kadagiti anghel, ta ammonan a daytoyen ti oras a panangala dagiti kabusorna kenkuana. Ket impalubosna nga isu ti ipanawda.

Mateo 26:36-56; Lucas 22:39-53; Juan 18:1-12.



Dagiti Saludsod

  • Napanan ni Jesus ken dagiti apostolna idi pimmanawdan iti makingngato a kuarto, ket ania ti imbagana kadakuada nga aramidenda?
  • Ania ti nakita ni Jesus idi nagsubli iti ayan dagiti apostolna, ket mano a daras a napasamak daytoy?
  • Siasino dagiti immay iti hardin, ket ania ti inaramid ni Judas Iscariote, kas ipakita ti ladawan?
  • Apay a ni Judas inagkanna ni Jesus, ket ania ti inaramid ni Pedro?
  • Ania ti imbaga ni Jesus ken ni Pedro, ngem apay a saan nga indawat ni Jesus a mangibaon ti Dios kadagiti anghel?

Kanayonan a salsaludsod

  • Basaenyo ti Mateo 26:36-56.

    Kasano a ti wagas a panangbalakad ni Jesus kadagiti adalanna ket nagsayaat nga ulidan kadagiti Kristiano a panglakayen ita? (Mat. 20:25-28; 26:40, 41; Gal. 5:17; Efe. 4:29, 31, 32)

    Ania ti panangmatmat ni Jesus iti panangusar kadagiti literal nga igam maibusor kadagiti padatayo a tao? (Mat. 26:52; Luc. 6:27, 28; Juan 18:36)

  • Basaenyo ti Lucas 22:39-53.

    Idi nagparang ti maysa nga anghel tapno pabilgenna ni Jesus idiay minuyongan ti Getsemani, ipasimudaag kadi daytoy a kimmapuy ti pammati ni Jesus? Ilawlawagmo. (Luc. 22:41-43; Isa. 49:8; Mat. 4:10, 11; Heb. 5:7)

  • Basaenyo ti Juan 18:1-12.

    Kasano a sinalakniban ni Jesus dagiti adalanna manipud kadagiti bumusbusor, ket ania ti masursurotayo iti daytoy nga ehemplo? (Juan 10:11, 12; 18:1, 6-9; Heb. 13:6; Sant. 2:25)

Ammuem ti Ad-adu Pay

NI JESUS—TI DALAN, TI KINAPUDNO, TI BIAG

Nagkararag idi Maladingitan Unay

Apay nga inkararag ni Jesus: ‘Ikkatem koma kaniak daytoy a kopa’? Saanna kadi a kayat ti matay kas subbot?

NI JESUS—TI DALAN, TI KINAPUDNO, TI BIAG

Matraidor ken Maaresto ti Kristo

Masarakan ni Judas ni Jesus uray no tengnga iti rabii.