Accessibility setting

Agpili iti lengguahe

Mapan iti segundario a pagpilian

Mapan iti listaan dagiti linaonna

Mapan iti linaonna

Dagiti Saksi ni Jehova

Iloko

Ti Librok Dagiti Estoria ti Biblia

Estoria 83: Dagiti Bakud ti Jerusalem

Estoria 83: Dagiti Bakud ti Jerusalem
Dagiti trabahador a mangibangbangon iti pader ti Jerusalem

KITAEM ti kinagaget dagiti Israelitas a mangibangbangon ti bakbakud ti Jerusalem. Idi nadadael ti Jerusalem 152 a tawtawen sakbayna, ni Ari Nabucodonosor ti nangrebba kadagiti bakud. Saanen a binangon dagiti Israelitas ti bakud idi damo a nagsublida manipud Babilonia.

Saan a natalged ti rikna dagiti tattao nga aggigian kadagitoy amin a tawtawen iti siudad nga awan bakudna. Nalaka laeng a sumrek ti kabkabusorda ket rautenda ida. Ngem ita daytoy Nehemias ti mangtultulong kadagiti tattao a mangbangon manen ti bakud. Ammom kadi no asino ni Nehemias?

Ni Nehemias ket maysa nga Israelita. Isut’ taga siudad ti Susan, isu a nalabit isut’ naimbag a gayyem ni Mardokeo ken ni Ester. Agtartrabaho ni Nehemias para iti simmaruno nga ari ti Persia, a ni Artaxerxes.

Laglagipem, isu daytoy daydiay naimbag nga ari a nangted ken Esdras amin a kuarta nga ipan idiay Jerusalem tapno tarimnen ti templo ni Jehova. Ngem saan a tinarimaan ni Esdras dagiti nadaddadael a bakud. Kitaentayo no kasano a ni Nehemias ti nangaramid iti daytoy a trabaho.

Addan 13 a tawen nanipud inted ni Artaxerxes ti kuarta ken Esdras tapno tarimnenna ti templo ni Jehova. Ni Nehemias itan ti agig-iggem ti kopa ti ari. Kaipapanan daytoy nga isut’ agiserserbi iti ari ti arakna ken siguruenna nga awan asinoman a mangsabsabidong kenkuana. Nagpateg dayta a trabaho.

Sumagmamano a lallaki manipud Israel ti immay simmarungkar ken Nehemias ket imbagada kenkuana ti parikut dagiti Israelitas, ken no kasano a dagiti bakud ti Jerusalem ti rebrebbada pay. Maladingitan ni Nehemias. Nagkararag ken Jehova maipapan iti dayta.

Maysa nga aldaw, kuna ti ari ken Nehemias: ‘Apay a naliday ta rupam?’ Imbaga ni Nehemias kenkuana ti kakaasi a kasasaad idiay Jerusalem. ‘Ania ngay ti kayatmo ita?’ insaludsod ti ari.

Indauluan ni Nehemias ti panagbangon

Indawat ni Nehemias a mapan koma idiay Jerusalem tapno tumulong a mangbangon manen ti bakud. Ti naasi nga Ari Artaxerxes kunana a mabalin ni Nehemias ti mapan, ket tinulonganna pay a makaala ti kaykayo a maipaay ti panagbangon. Di nagbayag nakagtengen ni Nehemias idiay Jerusalem, ket rinugian dagiti tattao ti nagbangonen.

Dagiti kabkabusor ti Israelitas nakitada a tumaktakderen dagiti bakud. Butbutngenda a papatayen dagiti managbangon. Ngem nangngegan ni Nehemias ti maipapan iti daytoy ket inikkanna dagiti trabahador kadagiti kampilan ken gayang. Imbagana kadakuada a saanda nga agbutbuteng.

Dagiti tattao nakaturturedda. Iti 52 nga al-aldaw laeng nalpasen dagiti bakud. Itan natalgeden dagiti tattao idiay uneg ti siudad. Sinursuruan ni Nehemias ken Esdras dagiti tattao maipapan ti linlinteg ti Dios, ket maragsakanda unay.

Nupay kasta, dagiti tattao ti iturturayan pay laeng ti ari ti Persia. Ngem inkari ni Jehova a mangibaonto ti sabali a baro nga ari, ket daytoy nga ari ti mangyegto ti talna kadagiti tattao. Asino daytoy nga ari? Agarup 450 a tawtawen ti napalabas sakbay nga adda manen naammuan maipapan iti daytoy. Ket idi kuan adda ti kapapatgan a pannakaipasngay daytoy nga ubing. Ngem sabali nga estoria daytan.

Nehemias kapitulo 1 ingganat’ 6.



Dagiti Saludsod

  • Ania ti panagrikna dagiti Israelita no awan dagiti bakud iti aglawlaw ti siudadda a Jerusalem?
  • Siasino ni Nehemias?
  • Ania ti trabaho ni Nehemias, ket apay a napateg daytoy?
  • Ania a damag ti namagliday ken ni Nehemias, ket ania ti inaramidna?
  • Kasano nga impakitaan ni Ari Artaxerxes iti asi ni Nehemias?
  • Ania ti inaramid ni Nehemias tapno saan a mapasardeng dagiti kabusor ti panagbangon dagiti Israelita?

Kanayonan a salsaludsod

  • Basaenyo ti Nehemias 1:4-6 ken 2:1-20.

    Kasano a nagpaiwanwan ni Nehemias ken ni Jehova? (Neh. 2:4, 5; Roma 12:12; 1 Ped. 4:7)

  • Basaenyo ti Nehemias 3:3-5.

    Ania ti masursuro dagiti panglakayen ken ministerial nga adipen iti nagdumaan dagiti Tecoita ken dagiti “nadaeg”? (Neh. 3:5, 27; 2 Tes. 3:7-10; 1 Ped. 5:5)

  • Basaenyo ti Nehemias 4:1-23.

    Ania ti nanggutugot kadagiti Israelita nga agtultuloy nga agibangon iti laksid ti nakaro nga ibubusor? (Neh. 4:6, 8, 9; Sal. 50:15; Isa. 65:13, 14)

    Iti ania a pamay-an a paregtaennatayo ita ti ehemplo dagiti Israelita?

  • Basaenyo ti Nehemias 6:15.

    Nabangon dagiti bakud ti Jerusalem iti unos ti dua a bulan. Ania ti iparangarang daytoy maipapan iti bileg ti pammati? (Sal. 56:3, 4; Mat. 17:20; 19:26)