Mapan iti linaonna

Mapan iti segundario a pagpilian

Mapan iti listaan dagiti linaonna

Dagiti Saksi ni Jehova

Iloko

Ti Librok Dagiti Estoria ti Biblia

Estoria 82: Ni Mardokeo ken Ester

Estoria 82: Ni Mardokeo ken Ester

AGSUBLITAY ti sumagmamano a tawen sakbay a napan ni Esdras idiay Jerusalem. Ni Mardokeo ken Ester ti kapapatgan nga Israelitas idiay pagarian ti Persia. Ni Ester ti reina, ket ni kasinsinna a Mardokeo ti maikadua laeng iti ari. Kasano a naaramid daytoy?

Dagiti nagannak ken Ester natayda idi isut’ ubing pay, isu a ni Mardokeo ti nangpadakkel kenkuana. Ni Ahasuero, ari ti Persia, addaan palasio idiay siudad ti Susan, ket ni Mardokeo maysa kadagiti ad-adipenna. Maysa nga aldaw ni Vasti nga asawa ti ari simmukir kenkuana, gapuna ammom kadi no asino ti pinili ti ari kas baro nga asawana? Wen, ni ubing pay a napintas nga Ester.

Nakaunget ni Haman ken ni Mardokeo

Daytoy lalaki a natangsit iti retrato isu ni Haman. Isu ti nagimportante, isuamin agruknoy kenkuana. Ngem, adtoy! ni Mardokeo madi agruknoy kenkuana. Ammona a dakes ti agruknoy iti dakes a tao. Daytoy ti namagluksaw ken Haman.

Gapuna nagulbod ni Haman iti ari maipapan kadagiti Israelitas ket kunana a rebbeng a matayda. Di ammo ni Ahasuero a ni Ester ket maysa nga Israelita. Gapu itoy nangaramid ti linteg nga iti maysa nga aldaw amin nga Israelitas mapapatayda.

Idi nangngeg ni Mardokeo maipapan ti linteg, mariribokan unay. Nangipatulod ti mensahe ken Ester: ‘Ipakpakaasim iti ari nga isalakannatayo.’ Inawis ni Ester ti ari ken ni Haman iti dakkel a pannangan. Ket inawisna manen ida iti sabali a pannangan iti sumaruno nga aldaw.

Idiay panganan, kuna ni Ester iti ari: ‘Siak ken dagiti kailiak mapapataykami.’ Nakapungtot ti ari. ‘Asinot’ mangaramid iti kasta a banag?’ insaludsodna.

‘Daytoy dakes a Haman!’ kuna ni Ester.

Ak-akusaran ni Reyna Ester ni Haman

Imbilin ti ari a ni Haman ti mapapatay. Kalpasanna, pinagbalin ti ari ni Mardokeo a maikadua kenkuana ti pannakabalin. Naaramid ti baro a linteg a mangipalubos kadagiti Israelitas a makidangadang maipaay ti biagda iti aldaw a mapapatayda koma. Gapu ta ni Mardokeo importante a tao itan, adu a tattao ti nangtulong kadagiti Israelitas, ket naisalakanda manipud kabkabusorda.

Libro ti Biblia nga Ester.



Dagiti Saludsod

  • Siasino da Mardokeo ken Ester?
  • Apay a kayat ni Ari Ahasuero ti maaddaan iti baro nga asawa, ket siasino ti pinilina?
  • Siasino ni Haman, ket ania ti namagluksaw kenkuana?
  • Ania a linteg ti naaramid, ket ania ti inaramid ni Ester idi naawatna ti mensahe ni Mardokeo?
  • Ania ti napasamak ken ni Haman, ket ania ti nagbalinan ni Mardokeo?
  • Kasano a naisalakan dagiti Israelita manipud kadagiti kabusorda?

Kanayonan a salsaludsod

  • Basaenyo ti Ester 2:12-18.

    Kasano nga imparangarang ni Ester ti pateg ti panangsukay iti “naulimek ken naalumamay nga espiritu”? (Ester 2:15; 1 Ped. 3:1-5)

  • Basaenyo ti Ester 4:1-17.

    Kas ken ni Ester a naikkan iti gundaway nga agtignay maigapu iti pudno a panagdayaw, ania a gundaway ti naited kadatayo ita a mangyebkas iti debosion ken kinasungdotayo ken ni Jehova? (Ester 4:13, 14; Mat. 5:14-16; 24:14)

  • Basaenyo ti Ester 7:1-6.

    Kasano nga adu kadagiti adipen ti Dios ita ti nangirisgo met iti bagbagida iti pannakaidadanes, kas iti inaramid ni Ester? (Ester 7:4; Mat. 10:16-22; 1 Ped. 2:12)