Mapan iti linaonna

Mapan iti segundario a pagpilian

Mapan iti listaan dagiti linaonna

Dagiti Saksi ni Jehova

Iloko

Ti Librok Dagiti Estoria ti Biblia

Estoria 81: Talek iti Tulong ti Dios

Estoria 81: Talek iti Tulong ti Dios

NGANGNGANI 50,000 a tattao ti nagdaliasat manipud Babilonia a napan idiay Jerusalem. Ngem idi makagtengda, dakkel a rebba ti Jerusalem. Masapul a bangonen manen dagiti Israelitas ti amin a bambanag.

Maysa kadagiti immun-una a binangonda isu ti altar. Kalpasanna rinugianda a bangonen ti templo. Ngem dagiti kabusor nga aggigian kadagiti kabangibang binutbutengda dagiti Israelitas tapno agsardengda. Idi kuan dagitoy a kabusor nangpaaramidda ti baro a linteg a nairanta a mangpasardeng ti panagbangon.

Naglabas dagiti tawtawen. 17 a tawen kalpasan panagsubli dagiti Israelitas manipud Babilonia, imbaon ni Jehova da mammadtona a Hageo ken Zacarias nga ibaga a rugianda manen ti panagbangon. Nagtalek dagiti tattao ken Jehova, ket rinugianda manen a bangonen ti templo.

Gapu itoy, maysa nga opisial a Persas nga agnagan Tatanai immay ket sinaludsodanna ida no aniat’ karbenganda a mangibangon ti templo. Imbaga dagiti Israelitas kenkuana nga idi addada idiay Babilonia, kuna ni Ari Ciro kadakuada: ‘Inkay itan, idiay Jerusalem ket bangonenyo ti templo ni Jehova, a Diosyo.’

Nagsurat ni Tatanai idiay Babilonia ket sinaludsodna ken Ciro, a natay itan, no pudno nga imbagana dayta. Ti baro nga ari ti Persia ti nagsubalit. Imbagana a pudno a sinao ni Ciro dayta. Imbagana pay ken Tatanai a tulonganna dagiti Israelitas a mangbangon ti temploda. Iti uppat a tawen nalpasen ti templo.

Naglabas pay ti adu a tawtawen. Ngangngani 48 a tawtawen itan nanipud nalpas ti templo. Napanglaw dagiti tattao ti Jerusalem, ket ti siudad ken ti templo ti Dios di napintasen ti buyana. Idiay Babilonia, ni Israelita nga Esdras naammuanna maipapan ti pannakasapul a matarimaan manen ti templo ti Dios.

Gapu itoy, napan ni Esdras ken Artaxerxes, ari ti Persia, ket daytoy nagsayaat nga ari inikkanna ni Esdras ti adu a sagsagut nga isubli idiay Jerusalem. Ket, agangay 6,000 nga Israelitas ti nagkuna a tulonganda ni Esdras a mangawit kadagitoy a sagsagut idiay Jerusalem.

Nagadu a pirak ken balitok ken dadduma pay a napapateg a bambanag nga awitenda. Gapu itoy inawagan ni Esdras a sangsangkamaysa dagiti tattao, kas inka makita iti daytoy a retrato. Nagkararagda ken Jehova a salaknibanna koma ida manipud tattao a managdakdakes iti adayo a panagdaliasatda idiay Jerusalem.

Agkarkararag ni Esdras ken dagiti tattao

Ket sinalakniban ni Jehova ida. Kalpasan ti uppat a bulan a panagdaliasatda, nakagtengda a sitatalged idiay Jerusalem. Saan kadi nga ipakpakita daytoy a salakniban ni Jehova dagidiay agtalek kenkuana a maipaay ti tulong?

Esdras kapitulo 2 ingganat’ 8.



Dagiti Saludsod

  • Mano a tattao ti nagdaliasat iti napaut manipud Babilonia nga agturong idiay Jerusalem, ngem ania ti nakitada idi nakagtengda sadiay?
  • Ania ti inrugi a bangonen dagiti Israelita idi nakagtengda, ngem ania ti inaramid dagiti kabusorda?
  • Siasino da Hageo ken Zacarias, ket ania ti imbagada kadagiti tattao?
  • Apay a nagsurat ni Tatanai idiay Babilonia, ket ania ti naawatna a sungbat?
  • Ania ti inaramid ni Esdras idi naammuanna a masapul a matarimaan ti templo ti Dios?
  • Iti ladawan, ania ti ikarkararag ni Esdras, kasano a nasungbatan ti kararagna, ken ania ti masursurotayo iti daytoy?

Kanayonan a salsaludsod

  • Basaenyo ti Esdras 3:1-13.

    Ania ti masapul nga itultuloytayo nga aramiden no addatayo iti lugar nga awan ti kongregasion dagiti adipen ti Dios? (Esd. 3:3, 6; Ara. 17:16, 17; Heb. 13:15)

  • Basaenyo ti Esdras 4:1-7.

    Ania nga ulidan ti impasdek ni Zorobabel kadagiti adipen ni Jehova maipapan iti panaglaok ti pammati? (Ex. 34:12; 1 Cor. 15:33; 2 Cor. 6:14-17)

  • Basaenyo ti Esdras 5:1-5, 17 ken 6:1-22.

    Apay a saan a nagballigi dagiti bumusbusor a mangpasardeng iti pannakaibangon ti templo? (Esd. 5:5; Isa. 54:17)

    Kasano a ti inaramid dagiti panglakayen a Judio paregtaenna dagiti Kristiano a panglakayen nga agpaiwanwan ken ni Jehova no maipasangoda kadagiti bumusbusor? (Esd. 6:14; Sal. 32:8; Roma 8:31; Sant. 1:5)

  • Basaenyo ti Esdras 8:21-23, 28-36.

    Sakbay nga adda rugiantayo nga aramiden, ania nga ulidan ni Esdras ti nasayaat a tuladentayo? (Esd. 8:23; Sal. 127:1; Prov. 10:22; Sant. 4:13-15)