Accessibility setting

Agpili iti lengguahe

Mapan iti segundario a pagpilian

Mapan iti listaan dagiti linaonna

Mapan iti linaonna

Dagiti Saksi ni Jehova

Iloko

Ti Librok Dagiti Estoria ti Biblia

Estoria 80: Pinanawanda ti Babilonia

Estoria 80: Pinanawanda ti Babilonia

NGANGNGANI dua a tawen ti napalabasen nanipud ti Babilonia pinarmek dagiti Medos ken Persas. Ket kitaem ti mapaspasamak itan! Wen, pampanawan dagiti Israelitas ti Babilonia. Asinot’ nangibulos kadakuada?

Ni Ciro, ari ti Persia, ti nangwayawaya. Nabayag pay sakbay a maiyanak ni Ciro nagsurat ni mammadto Isaias maipapan kenkuana: ‘Aramidemto kas paaramidko kenka. Silulukatto dagiti ruangan tapno maparmekmo ti siudad.’ Ket ni Ciro ti nangidaulo iti panangparmek iti Babilonia. Simrek dagiti buybuyotna iti siudad iti rabii kadagiti ruangan a silulukat.

Ngem imbaga met ni Isaias a mammadto ni Jehova nga itedto ni Ciro ti bilin a maibangon manen ti Jerusalem ken ti templona. Inted kadi ni Ciro daytoy a bilin? Wen. Isut’ pagturturongan ita nga aramiden dagiti Israelitas.

Dagiti Israelita a pumampanaw iti Babilonia

Ngem saan amin nga Israelitas idiay Babilonia makapagbiaheda ti adayo nga agsubli idiay Jerusalem. Gapuna imbaga ni Ciro kadagidiay di mapan: ‘Mangtedkayo ti pirak ken balitok ken dadduma pay a sagsagut kadagiti tattao nga agsubli a mangbangon ti Jerusalem ken ti templona.’

Gapuna adu a sagut ti naited kadagiti Israelitas nga agsublin idiay Jerusalem. Kasta met, insubli ni Ciro dagiti malukong ken kopa nga innala ni Nabucodonosor manipud templo ni Jehova idi dinadaelna ti Jerusalem.

Kalpasan ti agarup uppat a bulan a panagdaliasat, nakasublin dagiti Israelitas iti apagpag-isu a tiempo. Addan 70 a tawen nanipud nadadael ti siudad, ken ti daga nalangalang iti tattao. Ngem, uray addadan iti mismo a daga, adunto pay ti rigat a lak-amen dagitoy nga Israelitas.

Isaias 44:28; 45:1-4; Esdras 1:1-11.



Dagiti Saludsod

  • Kas makitam iti ladawan, ania ti ar-aramiden dagiti Israelita?
  • Kasano a tinungpal ni Ciro ti padto ni Jehova babaen ken Isaias?
  • Ania ti imbaga ni Ciro kadagiti Israelita a saan a makapagsubli idiay Jerusalem?
  • Ania ti inted ni Ciro nga isubli dagiti Israelita idiay Jerusalem?
  • Kasano kapaut ti panagdaliasat dagiti Israelita nga agsubli idiay Jerusalem?
  • Mano a tawenen ti naglabas sipud idi nalangalang ti Jerusalem?

Kanayonan a salsaludsod

  • Basaenyo ti Isaias 44:28 ken 45:1-4.

    Kasano nga impaganetget ni Jehova ti sierto a pannakatungpal ti padto maipapan ken ni Ciro? (Isa. 55:10, 11; Roma 4:17)

    Ti padto ni Isaias maipapan ken ni Ciro ipakitana ti ania maipapan iti pannakabalin ni Jehova a Dios a mangipadto iti masanguanan? (Isa. 42:9; 45:21; 46:10, 11; 2 Ped. 1:20)

  • Basaenyo ti Esdras 1:1-11.

    Kas panangtulad iti ehemplo dagidiay saan a nakapagsubli idiay Jerusalem, kasanotayo ita a ‘mapapigsa ti im-ima’ dagidiay makabael a sumrek iti amin-tiempo a serbisio? (Esd. 1:4, 6; Roma 12:13; Col. 4:12)