Accessibility setting

Agpili iti lengguahe

Mapan iti segundario a pagpilian

Mapan iti listaan dagiti linaonna

Mapan iti linaonna

Dagiti Saksi ni Jehova

Iloko

Ti Librok Dagiti Estoria ti Biblia

Estoria 79: Ni Daniel Idiay Rukib Dagiti Leon

Estoria 79: Ni Daniel Idiay Rukib Dagiti Leon

AY! Kasla agpegpeggad unay ni Daniel. Ngem saan met a saksaktan dagiti leon. Ammom kadi no apay? Ket ammom kadi ti nangikabil ken Daniel a kadua dagitoy a leon? Kitaentayo.

Ti ari ti Babilonia itan ket isut’ tao nga agnagan Dario. Kaykayatna ni Daniel ta isut’ naasi ken masirib. Pinili ni Dario ni Daniel kas pangulo nga agturay iti pagarianna. Daytoy ti namagimun ti dadduma ken Daniel, isu a daytoy ti inaramidda.

Dario

Indawatda ken Dario a mangaramid ti linteg nga iti 30 nga al-aldaw, awan agkararag iti aniaman a dios wenno tao no di laeng ken Dario. Asinoman a sumukir iti daytoy a linteg ti maipalladaw kadagiti leon. Di ammo ni Dario no apay kayat dagitoy a lallaki a maaramid daytoy a linteg. Ngem pagarupna a nasayaat daytoy nga idea. Immanamong nga aramidenna ti linteg.

Idi naammuan ni Daniel ti linteg, nagawid ket nagkararag, kas kanayon nga ar-aramidenna. Ammo dagiti dakes a tattao a di agsardeng ni Daniel nga agkarkararag ken Jehova. Kasla agbalballigi ti planoda.

Maladingitan unay ni Ari Dario, ngem saannan a mabaliwan ti linteg. Gapuna imbilinna a maipalladaw ni Daniel idiay rukib dagiti leon. Ngem kuna ti ari ken Daniel: ‘Sapay koma ta ti Diosmo, a pagserserbiam isalakannaka.’

Iti sumaganad nga agsapa nagtaray ni Dario idiay rukib dagiti leon. Isut’ makitam idiay. Impukkawna: ‘Daniel, ti kadi Dios a pagserserbiam insalakannaka kadagiti leon?’

Ni Daniel iti rukib dagiti leon

Kuna ni Daniel: ‘Ti anghel ti Dios rinipkanna ti ngiwat dagiti leon ket saandak a dinunor.’ Maragsakan ti ari. Imbilinna a maaon ni Daniel manipud iti rukib. Ket dagiti tattao a dakes a kayatda a mapukaw ni Daniel ti naipuruak kadagiti leon ket natayda.

Kalpasanna imbilin ni Dario nga amin a tattao iti pagarianna dayawenda ti Dios ni Daniel, ta isut’ nangaramid iti daytoy dakkel a milagro.

Daniel 6:1-28.



Dagiti Saludsod

  • Siasino ni Dario, ket kasano ti panangmatmatna ken ni Daniel?
  • Ania ti impaaramid dagiti dadduma a naimun a tattao ken ni Dario?
  • Ania ti inaramid ni Daniel idi naammuanna ti baro a linteg?
  • Ania ti insungbat ni Daniel ken ni Dario?
  • Ania ti napasamak kadagiti dakes a tattao a nangpadpadas a mangpapatay ken ni Daniel, ket ania ti imbilin ni Dario kadagiti amin a tattao iti pagarianna?

Kanayonan a salsaludsod

  • Basaenyo ti Daniel 6:1-28.

    Kasano a ti panagkukumplot maibusor ken ni Daniel ipalagipna kadatayo ti panangpadpadas dagiti bumusbusor a manglapped iti trabaho dagiti Saksi ni Jehova iti moderno a panawen? (Dan. 6:7; Sal. 94:20; Isa. 10:1; Roma 8:31)

    Kasano a dagiti adipen ti Dios ita matuladda ni Daniel iti panagpaituray kadagiti “nangatngato nga autoridad”? (Dan. 6:5, 10; Roma 13:1; Ara. 5:29)

    Kasanotayo a matulad ti ehemplo ni Daniel iti panagserbi a “patinayon” ken ni Jehova? (Dan. 6:16, 20; Fil. 3:16; Apoc. 7:15)

Ammuem ti Ad-adu Pay

Bible Card: Daniel

Apay a naipisok ni Daniel iti rukib dagiti leon? Iyimprentam daytoy a Bible card ken ammuem ti maipapan ken ni Daniel.