Accessibility setting

Agpili iti lengguahe

Mapan iti segundario a pagpilian

Mapan iti listaan dagiti linaonna

Mapan iti linaonna

Dagiti Saksi ni Jehova

Iloko

Ti Librok Dagiti Estoria ti Biblia

Estoria 77: Saanda nga Agruknoy

Estoria 77: Saanda nga Agruknoy

MALAGIPMO dadi dagitoy tallo nga agtutubo? Wen, isuda ti gagayyem ni Daniel a madi mangan kadagiti naimas a taraon ti ari: Isuda da Sidrac, Misac ken Abdenago. Kitaem ti saanda a panagruknoy iti daytoy dakkel a ladawan kas kadagiti dadduma. Kitaentayo no apay.

Malagipmo kadi ti pannakabasam ti Sangapulo a Bilbilin? Dagitoy dagiti linlinteg nga insurat mismo ni Jehova. Ti umuna ket: ‘Dika agdayaw iti sabali a dios malaksid kaniak.’ Dagiti agtutubo ditoy ket agtultulnogda iti daytoy a linteg. Saan a nalaka dayta para kadakuada.

Ni Nabucodonosor ti nangibangon iti daytoy a ladawan. Kaibagbagana kadagiti tattao: ‘Inton mangngegyo ti uni ti tangguyob, dagiti arpa ken dadduma pay nga instrumento ti musika, agruknoykayo ket agdayawkayo iti daytoy ladawan a balitok. Asinoman a madi agruknoy ken agdayaw maipalladawto iti sumsumged nga urno.’

Nakapungtot ni Nabucodonosor a makaammo a da Sidrac, Misac ken Abdenago dida agruknoy iti ladawan. Impaawaganna ida iti saklangna ket inikkanna ida ti maysa pay a gundaway nga agruknoy. Ngem nagtalek dagiti agtutubo ken Jehova. Madida latta nga agruknoy iti ladawan ket sumukirda iti linteg ti Dios.

Da Sidrac, Misac, ken Abdenago

Iti daytoy, ad-adda manen a nakapungtot ni Nabucodonosor. Adda uron iti asideg ket imbilinna: ‘Papudotenyo ti urno iti mamimpito a daras ngem ti damo!’ Kalpasanna pinareppetna kadagiti kapipigsaan kadagiti buyotna dagiti tallo nga agtutubo ket impalladawda ida idiay urno. Nagpudot unay ti urno a dagiti napipigsa a lallaki natayda gapu iti apuy. Ngem dagiti ngay tallo nga agtutubo nga impalladawda?

Timman-aw ti ari idiay urno, ket nagbuteng unay. Nakakita ti uppat a lallaki nga agpagna-pagna iti apuy, uray no tallo laeng ti naipalladaw. Saandan a nareppet, ket saan ida a saksaktan ti apuy. Ket ti maikapat kasla maysa a dios! Isu nga immasideg ti ari idiay ruangan ti urno, ket pinukkawanna da Sidrac, Misac ken Abdenago a rummuarda.

Idi nakaruardan, tunggal maysa makitada a saanda a naan-ano. Kuna ti ari: ‘Madaydayaw koma ti Dios da Sidrac, Misac ken Abdenago. Imbaonna ti anghelna ket insalakanna ida gapu ta dida agdayaw iti sabali a dios malaksid ti kukuada.’

Saan kadi a nagsayaat nga ulidan daytoy ti kinamatalek nga intay suroten?

Exodo 20:3; Daniel 3:1-30.



Dagiti Saludsod

  • Ania ti imbilin ni Nabucodonosor, nga ari ti Babilonia, kadagiti tattao?
  • Apay a dagiti tallo a gagayyem ni Daniel saanda a nagruknoy iti ladawan a balitok?
  • Kasano nga impakita dagiti tallo a Hebreo nga agtalekda ken ni Jehova idi inikkan ida ni Nabucodonosor iti maysa pay a gundaway tapno agruknoy?
  • Ania ti imbaga ni Nabucodonosor nga aramiden dagiti tattaona kada Sidrac, Misac, ken Abdenago?
  • Ania ti nakita ni Nabucodonosor idi timman-aw idiay urno?
  • Apay a ti ari indaydayawna ti Dios da Sidrac, Misac, ken Abdenago, ket ania nga ulidan ti ipaay daytoy kadatayo?

Kanayonan a salsaludsod

  • Basaenyo ti Daniel 3:1-30.

    (a) Ania a kababalin nga imparangarang dagiti tallo nga agtutubo a Hebreo ti masapul a tuladen dagiti amin nga adipen ti Dios no masubok ti kinasungdoda? (Dan. 3:17, 18; Mat. 10:28; Roma 14:7, 8)

    (b) Ania a napateg a leksion ti insuro ni Jehova a Dios ken ni Nabucodonosor? (Dan. 3:28, 29; 4:34, 35)

Ammuem ti Ad-adu Pay

Naispalda iti Umap-apuy nga Urno!

Ammuem ti kinapateg ti panangidepensa kadagiti patpatiem.