Accessibility setting

Agpili iti lengguahe

Mapan iti segundario a pagpilian

Mapan iti listaan dagiti linaonna

Mapan iti linaonna

Dagiti Saksi ni Jehova

Iloko

Ti Librok Dagiti Estoria ti Biblia

Estoria 76: Nadadael ti Jerusalem

Estoria 76: Nadadael ti Jerusalem

NASUROK a 10 a tawenen nanipud innala ni Ari Nabucodonosor amin dagiti de adal nga Israelitas idiay Babilonia. Ket ita kitaem ti mapaspasamaken! Mapupuoranen ti Jerusalem. Ket dagiti Israelitas a di napapatay ti maip-ipanen a balud idiay Babilonia.

Laglagipem, isu daytoy ti impakpakdaar dagiti mammadto ni Jehova a mapasamak no di agbalbaliw dagiti tattao iti kinadakesda. Ngem di nangipangag dagiti Israelitas. Gapuna maikarida a madusa. Imbaga ni Ezekiel a mammadto ti Dios kadatayo dagiti dakes nga ar-aramiden dagiti Israelitas.

Ni Ezekiel ket isut’ maysa dagiti agtutubo nga impan ni Ari Nabucodonosor nasurok a 10 a tawtawenen idiay Babilonia sakbay daytoy dakkel a pannakadadael ti Jerusalem. Ni Daniel ken ti tallo a gagayyemna, da Sidrac, Misac ken Abdenago, ti naigiddan met a naala iti dayta.

Nupay isut’ adda idiay Babilonia, impakita ni Jehova ken ni Ezekiel dagiti kinadakes a mapaspasamak idiay Jerusalem iti templo. Inaramid ni Jehova daytoy babaen iti milagro. Ket ti nakita ni Ezekiel ti nakaap-aprang!

‘Kitaem dagitoy makarimon a bambanag idiay templo,’ kuna ni Jehova ken Ezekiel. ‘Kitaem dagiti pader a naabbongan iti retretrato dagiti uleg ken dadduma pay nga an-animal. Ket kitaem dagiti Israelitas nga agdaydayaw kadakuada!’

Dagiti balud a pumampanaw iti Jerusalem

‘Makitam kadi ti sililimed nga ar-aramiden dagiti papangulo nga Israelita?’ insaludsod ni Jehova ken ni Ezekiel. Wen, makitkitana met daytoy. Addada 70 a lallaki, ket agdaydayawda amin kadagiti ulbod a didios. Pagarupda no di makitkita ni Jehova ida.

Kalpasanna impakita ni Jehova ken Ezekiel ti babbai idiay amianan a ruangan ti templo. Agdaydayawda iti ulbod a dios a ni Tammuz. Ken adda met 25 a lallaki idiay ruangan ti templo ni Jehova nga agdaydayaw iti init!

‘Dagitoy a tattao saandak a pagraraeman,’ kuna ni Jehova. Saanda laeng nga agar-aramid ti kinadakes no di ket umayda pay a mismo iti templok a mangaramid kadagitoy!’ Gapuna inkari ni Jehova: ‘Mariknadanto ti bara ti pungtotko. Ket diakto pagladingitan inton madadaelda.’

Tallo a tawen kalpasan ti pannakaipakita ken ni Ezekiel dagitoy a bambanag, immalsa dagiti Israelitas a maibusor ken Ari Nabucodonosor. Gapuna simmang-at a maibusor met kadakuada. Ket, ti Jerusalem napuoran iti daga, ket kaaduan kadagiti tattao ti napapatay wenno naipan a kayaw idiay Babilonia.

Apay a napasamak daytoy? Gapu ta di nagimdeng dagiti Israelitas ken Jehova ken nagtulnog iti linlintegna. Ipakita daytoy ti kinapateg ti intay kanayon a panagaramid ti sasawen ni Jehova.

Idi damo sumagmamano a tattao ti napalubosan nga agtaeng idiay daga ti Israel. Maysa a Judio nga agnagan Geodalias ti naikabil nga inkargado kadakuada. Ngem dadduma nga Israelitas ti nangpatay ken Geodalias. Itan agbuteng manen dagiti tattao nga umay dagiti taga Babilonia ket dadaelenda ida gapu itoy a kinadakes. Gapuna pinilitda nga umay ni Jeremias kadakuada, ket nagkamangda idiay Egipto.

Daytoy ti namagbalin iti daga ti Israel nga awan matagtagitaona. Iti 70 a tawtawen, naglangalang ti daga. Ngem inkari ni Jehova nga isublinanto met laeng ti ilina iti daga kalpasan ti 70 a tawtawen. Kabayatanna, aniat’ mapaspasamak iti ili ti Dios idiay Babilonia? Kitaentayo.

2 Ar-ari 25:1-26; Jeremias 29:10; Ezekiel 1:1-3; 8:1-18.



Dagiti Saludsod

  • Kas makitam iti ladawan, ania ti mapaspasamak iti Jerusalem ken kadagiti Israelita?
  • Siasino ni Ezekiel, ket ania dagiti makarimon a banag nga impakita kenkuana ni Jehova?
  • Gapu ta ni Jehova ket saan a raraemen dagiti Israelita, ania ti inkarina?
  • Ania ti inaramid ni Ari Nabucodonosor kalpasan nga immalsa dagiti Israelita maibusor kenkuana?
  • Apay nga impalubos ni Jehova a mapasamak kadagiti Israelita ti nakaam-ames a pannakadadael?
  • Kasano a nagbalin nga awan matagtagitaona ti daga ti Israel, ken iti mano a tawen?

Kanayonan a salsaludsod

  • Basaenyo ti 2 Ar-ari 25:1-26.

    Siasino ni Zedekias, ania ti napasamak kenkuana, ket kasano a tinungpal daytoy ti padto ti Biblia? (2 Ar. 25:5-7; Ezeq. 12:13-15)

    Siasino ti kinuna ni Jehova a manungsungbat iti amin a kinagulib nga inaramid ti Israel? (2 Ar. 25:9, 11, 12, 18, 19; 2 Cron. 36:14, 17)

  • Basaenyo ti Ezequiel 8:1-18.

    Kasano a tinulad ti Kakristianuan dagiti apostata nga Israelita a nagdaydayaw iti init? (Ezeq. 8:16; Isa. 5:20, 21; Juan 3:19-21; 2 Tim. 4:3)