Accessibility setting

Agpili iti lengguahe

Mapan iti segundario a pagpilian

Mapan iti listaan dagiti linaonna

Mapan iti linaonna

Dagiti Saksi ni Jehova

Iloko

Ti Librok Dagiti Estoria ti Biblia

Estoria 75: Uppat nga Ubbing Idiay Babilonia

Estoria 75: Uppat nga Ubbing Idiay Babilonia

INNALA amin ni Ari Nabucodonosor dagiti de adal nga Israelitas idiay Babilonia. Manipud kadagitoy, pinilina dagiti katataeran ken kasisiriban nga agtutubo. Uppat kadagitoy ket isuda dagiti ub-ubbing a makitkitam ditoy. Ti maysa isu ni Daniel, ket daydiay dadduma a tallo ti aw-awagan dagiti taga Babilonia ti Sidrac, Misac ken Abdenago.

Implano ni Nabucodonosor a sanayen dagiti ub-ubbing iti tallo a tawen, sananto pilien ti kalaingan kadakuada a mangtulongto Kenkuana nga agsolbar ti parparikut. Imbilinna a maikkanda kadagiti naimas a taraon ken arak manipud lamisaanna tapno agbalinda a napigsa ken nasalun-at.

Da Daniel, Sidrac, Misac, ken Abdenago ilawlawagda dagiti patpatienda

Kitaem ni Daniel. Ammom kadi ti ibagbagana iti pangulo nga adipen ni Nabucodonosor, ni Aspenaz? Ibagbaga ni Daniel a dina kayat ti mangan ti naiimas a taraon. Ngem agdanag ni Aspenaz. No dagitoy nga uppat saandanto a nasalun-at kas ti dadduma nga agtutubo, mabalin a patayen ti ari ni Aspenaz.

Ngem kuna ni Daniel iti mayordomo a dinutokan ni Aspenaz: ‘Pangngaasim ta ikkannakami ti natnateng ken danum iti 10 nga al-aldaw. Kalpasanna iyaspingnakamto kadagiti dadduma nga agtutubo ket kitaem no asinot’ nasaysayaatto.’

Immanamong ti mayordomo iti daytoy. Kalpasan 10 nga aldaw, nasalsalun-at ti langa ni Daniel ken ti tallo a gagayyemna ngem ti dadduma kadagiti agtutubo. Gapuna intultuloyda ti nagsida ti natnateng imbes nga iti ipapaay ti ari.

Kalpasan ti tallo a tawen, naduktalan ti ari a ni Daniel ken ti tallo a gagayyemna ti kasisiriban. Gapuna imbatina ida idiay palasiona. Tunggal saludsodan ti ari da Daniel, Sidrac, Misac ken Abdenago ti salsaludsod wenno parparikut, 10 a daras nga ad-adu ti ammoda ngem iti asinoman kadagiti papadina wenno mamasirib a tattaona.

Daniel 1:1-21.



Dagiti Saludsod

  • Iti ladawan, siasino dagiti uppat nga agtutubo, ket apay nga addada idiay Babilonia?
  • Ania ti plano ni Nabucodonosor kadagiti uppat nga agtutubo, ket ania ti imbilinna?
  • Ania ti kiniddaw ni Daniel a kanen ken inumenda nga uppat nga aggagayyem?
  • Kalpasan ti sangapulo nga aldaw a nangnanganda iti nateng, kasano a naiduma ni Daniel ken ti tallo a gagayyemna kadagiti dadduma pay nga agtutubo?
  • Apay a nagyan ni Daniel ken ti tallo a gagayyemna iti palasio ti ari, ken iti ania a wagas a nalalaingda ngem kadagiti papadi ken mamasirib a tattao?

Kanayonan a salsaludsod

  • Basaenyo ti Daniel 1:1-21.

    Ania ti masapul nga aramidentayo tapno masarangettayo dagiti sulisog ken maparmektayo dagiti pagkapuyan? (Dan. 1:8; Gen. 39:7, 10; Gal. 6:9)

    Kadagiti ania a pamay-an a mabalin a masulisog wenno masugsogan dagiti agtutubo ita a makiraman iti ibilang dagiti dadduma kas “naimbag”? (Dan. 1:8; Prov. 20:1; 2 Cor. 6:17-7:1)

    Ti salaysay ti Biblia maipapan kadagiti uppat nga agtutubo a Hebreo tulongannatayo a mangapresiar iti ania maipapan iti pananggun-od iti sekular a pannakaammo? (Dan. 1:20; Isa. 54:13; 1 Cor. 3:18-20)