Mapan iti linaonna

Mapan iti segundario a pagpilian

Mapan iti listaan dagiti linaonna

Dagiti Saksi ni Jehova

Iloko

Ti Librok Dagiti Estoria ti Biblia

Estoria 74: Ti Lalaki a di Mabuteng

Estoria 74: Ti Lalaki a di Mabuteng

MAKITAM dagiti tattao a katkatawaanda daytoy agtutubo a lalaki? Ammom kadi no asino daytoy? Isu ni Jeremias. Isut’ importante unay a mammadto ti Dios.

Dagiti tattao katkatawaanda ni Jeremias

Kuna ni Jehova ken Jeremias nga isut’ agbalin a mammadto bayat nga ari pay ni Josias. Kuna ni Jeremias nga ubing unay tapno agbalinen a mammadto, ngem kuna ni Jehova a tulonganna.

Imbaga ni Jeremias kadagiti Israelitas nga isardengdan ti agar-aramid kadagiti dakes a bambanag. Ngem adu kadagiti Israelitas ad-adda a kaykayatda ti agdayaw kadagiti ladawan ngem ti agdayaw ken Jehova. Kuna ni Jeremias a dusaen ida ti Dios, ngem isut’ kinatkatawaan laeng dagiti tattao.

Kalpasan ipapatay ni Josias, ni Joacim nga anakna nagbalin nga ari. Intultuloy a pinakpakdaaran ni Jeremias dagiti tattao: ‘Madadael ti Jerusalem no dikay agbalbaliw iti kinadakesyo.’ Rinabsut dagiti papadi ni Jeremias ken kunada kadagiti prinsipe: ‘Rebbeng a matay ni Jeremias, ta agsasao a maibusor iti siudadtayo.’

Aniat’ aramiden ita ni Jeremias? Di agbuteng! Imbagana kadakuada amin: ‘Imbaga kaniak ni Jehova a sawek dagitoy a bambanag kadakayo. Dadaelennanto ti Jerusalem no dikay isardeng ti panagaramidyo ti kinadakes.’

Pinalubosan dagiti piprinsipe nga agbiag ni Jeremias, ngem saan a nagsardeng dagiti Israelitas nga agar-aramid ti dakes. Kamaudiananna, ni Nabucodonosor, nga ari ti Babilonia, immay ket rinautna ti Jerusalem. Impanna dagiti adu a Judio nga agbalin nga ad-adipenna idiay Babilonia. Panunotenyo man laeng ti pannakaipanawyo manipud iliyo a mapan iti ganggannaet a daga!

Jeremias 1:1-8; 10:1-5; 26:1-16; 2 Ar-ari 24:1-17.



Dagiti Saludsod

  • Siasino ti agtutubo a lalaki iti ladawan?
  • Ania ti kuna ni Jeremias maipapan iti panagbalinna a mammadto, ngem ania ti imbaga kenkuana ni Jehova?
  • Ania a mensahe ti agtultuloy nga imbaga ni Jeremias kadagiti tattao?
  • Kasano a pinadpadas dagiti papadi a pasardengen ni Jeremias, ngem kasano nga impakita ni Jeremias nga isu ket saan a mabuteng?
  • Ania ti napasamak idi saan a nagsardeng dagiti Israelita nga agaramid iti dakes?

Kanayonan a salsaludsod

  • Basaenyo ti Jeremias 1:1-8.

    Kas ipakita ti ehemplo ni Jeremias, kasano nga agbalin ti maysa a tao a kualipikado nga agserbi ken ni Jehova? (2 Cor. 3:5, 6)

    Ti ehemplo ni Jeremias ket mangipaay iti ania a pammaregta kadagiti agtutubo a Kristiano ita? (Ecl. 12:1; 1 Tim. 4:12)

  • Basaenyo ti Jeremias 10:1-5.

    Ania a nabileg nga ilustrasion ti inusar ni Jeremias a mangipakita nga ubbaw ti agtalek kadagiti didiosen? (Jer. 10:5; Isa. 46:7; Hab. 2:19)

  • Basaenyo ti Jeremias 26:1-16.

    Iti panangipakaammoda iti pammakdaar a mensahe ita, kasano nga impapuso dagiti napulotan a natda ti bilin ni Jehova ken ni Jeremias a ‘di mangkissay iti maysa a sao’? (Jer. 26:2; Deut. 4:2; Ara. 20:27)

    Ania a nagsayaat nga ulidan ti impaay ni Jeremias kadagiti Saksi ni Jehova ita no iti panangiwaragawag iti pakdaar ni Jehova kadagiti nasion? (Jer. 26:8, 12, 14, 15; 2 Tim. 4:1-5)

  • Basaenyo ti 2 Ar-ari 24:1-17.

    Ania dagiti nakalkaldaang nga imbunga ti di panagmatalek ti Juda ken ni Jehova? (2 Ar. 24:2-4, 14)