Accessibility setting

Agpili iti lengguahe

Mapan iti segundario a pagpilian

Mapan iti listaan dagiti linaonna

Mapan iti linaonna

Dagiti Saksi ni Jehova

Iloko

Ti Librok Dagiti Estoria ti Biblia

Estoria 69: Ti Balasitang Tulonganna ti Maingel a Lalaki

Estoria 69: Ti Balasitang Tulonganna ti Maingel a Lalaki

AMMOM kadi ti ibagbaga daytoy a balasitang? Ibagbagana iti babai ti maipapan ken Eliseo a mammadto ni Jehova, ken dagiti nakaskasdaaw a bambanag a pangtultulongan ni Jehova kenkuana nga aramidenna. Saan nga Israelita ti babai. Kitaentayo no apay a ti balasitang adda idiay pagtaengan ti babai.

Ti babai ket taga Siria. Ni lakayna isu ni Naaman, a heneral dagiti buybuyot ti Siria. Nakemmeg dagiti Sirio ti Israelita a balasitang ket nagbalin nga adipen ti asawa ni Naaman.

Ti asawa ni Naaman ken ti adipenna a balasitang

Adda nadagsen a sakit ni Naaman a kukutel. Ibagbaga ti balasitang iti asawa ni Naaman: ‘Sapay koma ta mapan ti apok iti mammadto ni Jehova idiay Israel. Isu agasannanto iti kukutelna.’ Iti kamaudiananna, imbaga ti babai ken lakayna ti nasao ti balasitang.

Naikeddeng ni Naaman ti mapan idiay Israel. Idi makadanon sadiay, napan idiay balay ni Eliseo. Adda adipen ni Eliseo a babaonenna ket impaibagana ken Naaman a mapan agdigos idiay Karayan Jordan iti mamimpito a daras. Daytoy ti namagluksaw ken Naaman, ket pimmanaw. Kunana a dagiti karkarayan idiay Siria nasaysayaatda ngem ti aniaman a karayan idiay Israel.

Nupay kasta, maysa kadagiti ad-adipenna ti nangallukoy ken Naaman a mangaramid iti kuna ni Eliseo. Gapuna bimmatok a namimpito daras ni Naaman idiay Karayan Jordan. Idi inaramidna daytoy, isut’ naagasanen.

Maragsakan unay ni Naaman, gapuna nagsubli ken Eliseo ket kayatna a regaluan. Kuna ni Eliseo: ‘Saan, diak umawat ti sagut.’ Ammona a dakes ti umawat ti sagut, ta ni Jehova ti nangpaimbag ken Naaman. Ngem ti adipen ni Eliseo, a ni Giezi kayatna ti sagut para kenkuana met laeng.

Isu a kastoy ti inaramid ni Giezi. Apaman a nakapanawen ni Naaman, kinamakamna. Imbagana a ni Eliseo kayatna itan ti dadduma kadagiti sagut ni Naaman para kadagiti sangsangpet a bisitana. Siempre, ulbod daytoy. Ngem di ammo ni Naaman nga ulbod daytoy; gapuna intedna ken Giezi ti dadduma.

Nupay kasta, imbaga ni Jehova ken Eliseo ti inaramid ni Giezi. Idi makasangpet ni Giezi, nakitana a ti kukutel ni Naaman immakar kenkuana kas dusa.

Aniat’ intay naadal iti amin daytoy? Umuna, agbalintay koma kas ti balasitang ket sawentayo ti maipapan ken Jehova. Maikadua, ditay koma agtangtangsit, kas ken Naaman idi damo. Ken maikatlo, ditay koma agul-ulbod kas ken Giezi.

2 Ar-ari 5:1-27.



Dagiti Saludsod

  • Iti ladawan, ania ti ibagbaga ti balasitang iti babai?
  • Siasino ti babai iti ladawan, ket ania ti ar-aramiden ti balasitang iti balay ti babai?
  • Ania ti imbilin ni Eliseo iti adipenna nga ibagana ken ni Naaman, ket apay a nakaluksaw ni Naaman?
  • Ania ti napasamak idi dimngeg ni Naaman kadagiti adipenna?
  • Apay a saan nga inawat ni Eliseo ti sagut ni Naaman, ngem ania ti inaramid ni Giezi?
  • Ania ti napasamak ken ni Giezi, ket ania ti masursurotayo iti daytoy?

Kanayonan a salsaludsod

  • Basaenyo ti 2 Ar-ari 5:1-27.

    Kasano a makaparegta kadagiti agtutubo ita ti ehemplo ti balasitang nga Israelita? (2 Ar. 5:3; Sal. 8:2; 148:12, 13)

    Apay a nasayaat no laglagipentayo ti ehemplo ni Naaman no maipaayantayo iti Nainkasuratan a balakad? (2 Ar. 5:15; Heb. 12:5, 6; Sant. 4:6)

    No pagdumaentayo ti ehemplo da Eliseo ken Giezi, ania dagiti leksion a masursurotayo? (2 Ar. 5:9, 10, 14-16, 20; Mat. 10:8; Ara. 5:1-5; 2 Cor. 2:17)

Ammuem ti Ad-adu Pay

Tulongannaka ni Jehova nga Agbalin a Natured

Ania ti makatulong kenka nga agbalin a natured a mangibaga iti sabsabali iti maipapan ken Jehova?

Immimbag ti Maysa nga Agkukutel!

Ammuem no ania ti inaramid ni Naaman tapno umimbag ti kukutelna.

Nagulbod ni Gehazi

Ania a dua a kinaulbod ti imbaga ni Gehazi? I-print-yo daytoy a ladawan, pagkokonektarenyo dagiti tulnek, ken agsursurokayo iti salaysay ti Biblia.