Accessibility setting

Agpili iti lengguahe

Mapan iti segundario a pagpilian

Mapan iti listaan dagiti linaonna

Mapan iti linaonna

Dagiti Saksi ni Jehova

Iloko

Ti Librok Dagiti Estoria ti Biblia

Estoria 68: Ub-ubbing a Nagbiag Manen

Estoria 68: Ub-ubbing a Nagbiag Manen

NO NATAYKA, aniat’ rikna ni nanangmo no nagbiagka manen? Mabalin a maragsakan unay! Ngem ti kadi tao a natay agbiag manen? Adda kadi napasamak a kasta idin?

Kitaem dagiti tattao nga adda iti retrato. Ti lalaki ket isu ni mammadto nga Elias. Ti babai ket isu ti balo idiay siudad ti Sarepta, ket ti ubing isu ti anakna. Maysa nga aldaw, nagsakit unay ti ubing. Kalpasanna natay.

Ni Elias a kadua ti balo ken ti napagungar nga anakna

Innala ni Elias ti ubing ket impaiddana iti katre. Nagkararag: ‘O Jehova, pagbiagem koma manen ti ubing.’ Ket mangrugi manen nga umanges ti ubing! Ket kuna ni Elias iti babai: ‘Sibibiag ti anakmo!’ Daytoy ti gapuna a maragsakan unay ti ina.

Ti maysa pay a nasken a mammadto ni Jehova isu ni Eliseo. Isut’ katulongan ni Elias. Ngem idi agangay inusar met ni Jehova ni Eliseo nga agaramid ti datdatlag. Idiay siudad ti Sunem adda met ti babai a naasi unay ken Eliseo. Adda anak a lalaki daytoy a babai.

Maysa nga agsapa, idi natataengan bassiten ti ubing, napan idiay away, apaman latta ta impukkawna: ‘Agsakit ti ulok!’ Idi a maiyawiden, isut’ natay. Anian ti ladingit ti inana. Dagdagus napan ket inawaganna ni Eliseo.

Napan ni Eliseo iti natay nga ubing ket nagkararag ken Jehova. Apaman latta ta nagbaen ti ubing. Isut’ nagbiag manen! Anian ti ragsak ti ina!

Adun a tattao ti natnatay. Daytoy ti nangpaladingit iti pamilia ken gagayyemda. Ngem adda pannakabalin ni Jehova a mangpagungar kadagiti natay. Addanto aldaw nga isublinanto iti biag ti minilmilion a tattao.

1 Ar-ari 17:8-24; 2 Ar-ari 4:8-37.


Dagiti Saludsod

  • Siasino dagiti tallo a tattao iti ladawan, ken ania ti napasamak iti ubing?
  • Ania ti inkararag ni Elias maipapan iti ubing, ket ania ti napasamak kalpasanna?
  • Ania ti nagan ti katulongan ni Elias?
  • Apay a naayaban ni Eliseo iti balay ti babai idiay Sunem?
  • Ania ti inaramid ni Eliseo, ket ania ti napasamak iti natay nga ubing?
  • Kas makitam iti inaramid da Elias ken Eliseo, ania a pannakabalin ti adda ken Jehova?

Kanayonan a salsaludsod

  • Basaenyo ti 1 Ar-ari 17:8-24.

    Kasano a nasubok ti kinatulnog ken pammati ni Elias? (1 Ar. 17:9; 19:1-4, 10)

    Apay a naisangsangayan ti pammati ti balo idiay Sarepta? (1 Ar. 17:12-16; Luc. 4:25, 26)

    Kasano a ti kapadasan ti balo idiay Sarepta paneknekanna a pudno dagiti sasao ni Jesus a nailanad iti Mateo 10:41, 42? (1 Ar. 17:10-12, 17, 23, 24)

  • Basaenyo ti 2 Ar-ari 4:8-37.

    Ania ti masursurotayo iti babai idiay Sunem maipapan iti kinamanagpadagus? (2 Ar. 4:8; Luc. 6:38; Roma 12:13; 1 Juan 3:17)

    Kadagiti ania a pamay-an a maipakitatayo ti kinamanangngaasi kadagiti adipen ti Dios ita? (Ara. 20:35; 28:1, 2; Gal. 6:9, 10; Heb. 6:10)

Ammuem ti Ad-adu Pay

Idepensam ti Pudno a Panagdayaw!

Kadagiti ania a benneg ti biag a maipakitam ti ad-adu a tured no maipapan iti panagdayaw?