Accessibility setting

Agpili iti lengguahe

Mapan iti segundario a pagpilian

Mapan iti listaan dagiti linaonna

Mapan iti linaonna

Dagiti Saksi ni Jehova

Iloko

Ti Librok Dagiti Estoria ti Biblia

Estoria 67: Ni Josafat Nagtalek ken Jehova

Estoria 67: Ni Josafat Nagtalek ken Jehova

AMMOM kadi ti ar-aramiden dagitoy a tattao? Mapanda makigubat. Dagiti lallaki iti sanguanan ti agkankantada. Ngem mabalin a maisaludsodmo: ‘Apay a dagiti agkankanta awan kampilan ken gayangda a pakilaban?’ Kitaentayo.

Agmarmartsa dagiti Israelita a mapan makigubat

Ni Josafat ket ari ti umabagatan a dua-tribo a pagarian ti Israel. Isut’ nagbiag a kagiddan ni Ari Acab ken Jezabel. Ngem ni Josafat ti nasayaat nga ari. Isu nga iti adu a tawen tinagiragsak dagiti tattao iti dua-tribo a pagarian ti nasayaat a biag.

Ngem itan nangngegan ni Josafat a maysa a dakkel a buyot ti um-umay manipud Moab, Ammon ken Bantay Seir a mangraut iti ilina. Napan dagiti Israelitas idiay templo a sadiay ti pagkarkararagan ni Josafat ken Jehova a maipaay iti tulong.

Nangipangag ni Jehova. Impaibagana iti maysa kadagiti ad-adipenna kadagiti tattao: ‘Ti gubat saanyo a kukua, no di ket ti Dios. Saankayo a makigubgubat. Agbuyakay laeng, ket kitaenyo no kasanot’ panangisalakan ni Jehova kadakayo.’

Iti sumaganad a bigat, imbaga ni Josafat iti ilina: ‘Agtalekkay ken Jehova.’ Ket inkabilna dagiti kumakanta iti sanguanan dagiti buyot, ket bayat nga agmarmartsada agkankantada ti daydayaw ken Jehova. Ammom kadi ti napasamak? Pinagbalin ni Jehova a dagiti kabusor isudan ti naglalaban, ket idi simmangpeten dagiti Israelitas, amin a kabusor a soldado ti natayen!

Di kadi masirib ni Josafat a nagtalek ken Jehova? Masiribtayo met, no agtalektay Kenkuana.

1 Ar-ari 22:41-53; 2 Cronicas 20:1-30.


Dagiti Saludsod

  • Siasino ni Josafat, ket nagbiag iti ania a panawen?
  • Ania ti nangngegan ni Josafat, ket ania ti inaramid ti adu kadagiti Israelita?
  • Ania ti sungbat ni Jehova iti kararag ni Josafat?
  • Ania ti inaramid ni Jehova kadagiti kabusor a soldado?
  • Ania ti masursurotayo ken ni Josafat?

Kanayonan a salsaludsod

  • Basaenyo ti 2 Cronicas 20:1-30.

    Kasano nga impakita ni Josafat no ania ti rumbeng nga aramiden dagiti matalek nga adipen ti Dios no maipasangoda kadagiti nakabutbuteng a kasasaad? (2 Cron. 20:12; Sal. 25:15; 62:1)

    Kanayon nga adda us-usaren idi ni Jehova a kalasugan no makisarita kadagiti adipenna. Ania a kalasugan ti us-usarenna ita? (2 Cron. 20:14, 15; Mat. 24:45-47; Juan 15:15)

    Inton iyussuat ti Dios ti “gubat ti naindaklan nga aldaw ti Dios a Mannakabalin-amin,” kasano a maipadanto ti situasiontayo iti situasion ni Josafat? (2 Cron. 20:15, 17; 32:8; Apoc. 16:14, 16)

    Kas panangtulad kadagiti Levita, ania a tulong ti ipapaay dagiti payunir ken misionero iti sangalubongan a trabaho a panangasaba ita? (2 Cron. 20:19; Roma 10:13-15; 2 Tim. 4:2)