Accessibility setting

Agpili iti lengguahe

Mapan iti segundario a pagpilian

Mapan iti listaan dagiti linaonna

Mapan iti linaonna

Dagiti Saksi ni Jehova

Iloko

Ti Librok Dagiti Estoria ti Biblia

Estoria 65: Nabingay ti Pagarian

Estoria 65: Nabingay ti Pagarian

AMMOM kadi no apay pigpigisen daytoy a lalaki ti kawesna? Imbaga ni Jehova nga aramidenna dayta. Daytoy a lalaki ket ni Ahias a mammadto ni Jehova. Ti mammadto ket maysa a tao a pangibagbagaan ti Dios nga umun-una no aniat’ mapasamak.

Da Ahias ken Jeroboam

Makisasao ditoy ni Ahias ken Jeroboam. Ni Jeroboam ket isut’ tao nga inkabil ni Salomon a mangaywan ti panagbangon. Idi ni Ahias nasabatna ni Jeroboam, inussobna ti baro a kawesna ket pinigisna ti 12 a kapisi. Sana inted ti 10 kapisi ken Jeroboam. Ammom kadi no apay?

Inlawlawag ni Ahias nga alaen ni Jehova ti pagarian nga ipanaw ken Salomon. Ited ni Jehova ti 10 a tribo ken Jeroboam, ket ibatina ti dua laeng a tribo ken Roboam, nga anak ni Salomon.

Nakaunget ni Salomon idi nangngegna daytoy, gapuna nagkamang ni Jeroboam idiay Egipto. Kalpasanna natay ni Salomon ket ni Roboam naaramid nga ari. Idi nangngegan ni Jeroboam a natayen ni Salomon, isut’ nagsubli idiay Israel.

Saan a nasayaat nga ari ni Roboam. Nauyong kadagiti tattao. Ni Jeroboam ken ti dadduma a lallaki napanda iti ari ket indawatda nga agbalin koma a nasingsingpet, ngem ad-adda nga immuyong. Gapuna pinagbalin dagiti tattao ni Jeroboam nga ari iti 10 a tribo, ngem ti dua a tribo ti Benjamin ken Juda sinalimetmetanda ni Roboam nga arida.

Di kayat ni Jeroboam nga agdaydayaw ti tattaona idiay templo ti Jerusalem, isu a nangaramid ti dua a binalitokan a baka ket pinagdaydayawna dagiti tattao kadakuada. Di nagbayag napunnon ti daga iti kinadakes.

Adda met riribok iti dua-tribo a pagarian. Kalpasan panagbalin ni Roboam nga ari, bimmusor ti ari ti Egipto iti Jerusalem. Impanawna ti adu kadagiti gamgameng idiay templo ni Jehova.

1 Ar-ari 11:26-43; 12:1-33; 14:21-31.



Dagiti Saludsod

  • Ania ti nagan dagiti dua a lallaki iti ladawan, ken siasinoda?
  • Ania ti inaramid ni Ahias iti kawesna, ket ania ti kaipapanan daytoy?
  • Apay a dagiti tattao pinagbalinda ni Jeroboam nga ari iti sangapulo a tribu?
  • Apay a nangaramid ni Jeroboam iti dua a binalitokan a baka, ket ania ti napasamak iti daga kalpasanna?
  • Ania ti napasamak iti dua-tribo a pagarian ken ti templo ni Jehova idiay Jerusalem?

Kanayonan a salsaludsod

  • Basaenyo ti 1 Ar-ari 11:26-43.

    Ania a kita ti tao ni Jeroboam, ket ania ti inkari kenkuana ni Jehova no salimetmetanna dagiti linteg ti Dios? (1 Ar. 11:28, 38)

  • Basaenyo ti 1 Ar-ari 12:1-33.

    Iti dakes nga ulidan ni Roboam, ania ti masursuro dagiti nagannak ken dagiti panglakayen maipapan iti panangabuso iti autoridad? (1 Ar. 12:13; Ecl. 7:7; 1 Ped. 5:2, 3)

    Siasino ti rumbeng a pagtalkan ken pagpaiwanwanan dagiti agtutubo ita no mangaramidda kadagiti serioso a desision iti biagda? (1 Ar. 12:6, 7; Prov. 1:8, 9; 2 Tim. 3:16, 17; Heb. 13:7)

    Ania ti nangtignay ken ni Jeroboam a mangaramid iti dua a pagdayawan iti sinan-urbon a baka, ket kasano a mangipakita daytoy iti nakaro a kinaawan pammati ken ni Jehova? (1 Ar. 11:37; 12:26-28)

    Siasino ti nangidaulo kadagiti tattao iti sangapulo-tribu a pagarian nga umalsa maibusor iti pudno a panagdayaw? (1 Ar. 12:32, 33)