Accessibility setting

Agpili iti lengguahe

Mapan iti segundario a pagpilian

Mapan iti listaan dagiti linaonna

Mapan iti linaonna

Dagiti Saksi ni Jehova

Iloko

Ti Librok Dagiti Estoria ti Biblia

Estoria 64: Imbangon ni Salomon ti Templo

Estoria 64: Imbangon ni Salomon ti Templo

SAKBAY a natay ni David, intedna ken Salomon dagiti plano a naggapu iti Dios a pagbangon ti templo ni Jehova. Iti maikapat a tawen ti panagturayna, rinugian ni Salomon a bangonen ti templo. Pito ket kagudua a tawen sa nalpas dayta. Adu a trabaho ken adu a kuarta!

Adda dua a kangrunaan a kuarto ti templo, kas met laeng ti tabernakulo. Ngem dagitoy a kuarto ti mamindua ti kadakkelda ngem ti tabernakulo. Ti lakasa ti tulag ken ti dadduma a bambanag nga adda idiay tabernakulo ti naikabil idiay templo.

Idi nalpasen ti templo, adda dakkel a selebrasion. Nagparintumeng ni Salomon iti sanguanan ti templo ket nagkararag, kas makitkitayo iti retrato. ‘Ammok a daytoy a templo bassit unay tapno malaonnaka,’ kuna ni Salomon, ‘Ngem, O Diosko, pangngaasim ta denggem koma ti ilim no agkararagda iti daytoy a lugar.’

Agkarkararag ni Ari Salomon

Idi nalpasen a nagkararag ni Salomon, immay ti apuy manipud langit ket pinuoranna amin a daton nga an-animal. Maysa a nagraniag a lawag ti nangpunno iti templo. Gapuna ammo ti ili a naay-ayo ni Jehova iti templo. Itan ti templo nagbalinen a lugar a pagdaydayawan dagiti tattao iti Dios.

Nagturay ni Salomon a sisisirib iti nabayag. Ngem isut’ nangasawa ti adu a babbai manipud il-ili a di agdaydayaw ken Jehova. Makitam kadi ti maysa kadakuada nga agdaydayaw iti idolo? Iti kamaudiananna dagiti assawa ni Salomon ti namagdayaw kenkuana iti dadduma a didiosen. Ket nagbalin a nauyong ket saanen a maragsakan dagiti tattao.

Agdaydayaw ni Ari Salomon iti idolo

Nakapungtot ni Jehova iti daytoy. Imbagana ken Salomon nga inton agturay ti anakna, ikkatennanto ti pagarian kenkuana ket itednanto iti sabali a tao. Ngem saannanto nga ipanaw amin a tattao ti pagarian manipud iti anakna. Kitaentayo no kasano a napasamak daytoy.

1 Cronicas 28:9-21; 29:1-9; 1 Ar-ari 5:1-18; 2 Cronicas 6:12-42; 7:1-5; 1 Ar-ari 11:9-13.



Dagiti Saludsod

  • Kasano kapaut ti panangbangon ni Salomon iti templo ni Jehova?
  • Mano ti kangrunaan a kuarto iti templo, ket ania ti naikabil iti templo?
  • Ania ti imbaga ni Salomon iti kararagna idi nalpasen ti templo?
  • Kasano nga impakita ni Jehova nga isu ket naay-ayo iti kararag ni Salomon?
  • Ania ti imbaga dagiti assawa ni Salomon nga aramidenna, ket ania ti napasamak ken Salomon?
  • Apay a nakapungtot ni Jehova ken ni Salomon, ket ania ti imbaga kenkuana ni Jehova?

Kanayonan a salsaludsod

  • Basaenyo ti 1 Cronicas 28:9, 10.

    Maipapan iti sasao ni David a nairekord iti 1 Cronicas 28:9, 10, ania ti masapul nga ikagumaantayo nga aramiden iti inaldaw a panagbiagtayo? (Sal. 19:14; Fil. 4:8, 9)

  • Basaenyo ti 2 Cronicas 6:12-21, 32-42.

    Kasano nga impakita ni Solomon nga awan ti patakder nga aramid ti tao a makalaon iti Kangatuan a Dios? (2 Cron. 6:18; Ara. 17:24, 25)

    Ania ti ipakita dagiti sasao ni Salomon a masarakan iti 2 Cronicas 6:32, 33 maipapan ken Jehova? (Ara. 10:34, 35; Gal. 2:6)

  • Basaenyo ti 2 Cronicas 7:1-5.

    Kas iti pannakatignay dagiti annak ti Israel nga agdayaw ken ni Jehova idi nakitada ti dayagna, kasano koma a maapektarantayo ita no panunotentayo ti panangbendision ni Jehova kadagiti adipenna? (2 Cron. 7:3; Sal. 22:22; 34:1; 96:2)

  • Basaenyo ti 1 Ar-ari 11:9-13.

    Kasano a ti panagbiag ni Salomon ipakitana ti kinapateg ti panagtalinaed a matalek agingga iti panungpalan? (1 Ar. 11:4, 9; Mat. 10:22; Apoc. 2:10)