Accessibility setting

Agpili iti lengguahe

Mapan iti segundario a pagpilian

Mapan iti listaan dagiti linaonna

Mapan iti linaonna

Dagiti Saksi ni Jehova

Iloko

Ti Librok Dagiti Estoria ti Biblia

Estoria 63: Masirib nga Ari Salomon

Estoria 63: Masirib nga Ari Salomon

TIN-EDYER pay la idi ni Salomon idi nagbalin nga ari. Inayatna ni Jehova, ket sinurotna ti nasayaat a pammagbaga ni amana a David. Naay-ayo ni Jehova ken Salomon. Maysa a rabii kinunana kenkuana iti tagtagainep: ‘Salomon, aniat’ kayatmo nga itdek kenka?’

Iti daytoy, simmungbat ni Salomon: ‘Jehova a Diosko, ubingak unay, ket diak ammo ti agturay. Ikkannak ngarud ti kinasirib a mangituray iti ilim a siuumiso.’

Naragsakan ni Jehova iti inkalikagum ni Salomon. Gapuna kunana: ‘Gapu ta dimmawatka ti kinasirib ket saan a ti atiddog a biag wenno kinabaknang, ikkanka ti ad-adu a kinasirib ngem ti asinoman a nagbiagen. Ket ikkankanto ti kinabaknang ken dayag.’

Di nagbayag kalpasanna, dua a babbai ti immay ken Salomon nga adda nadagsen a parikutda. Inlawlawag di maysa a babai: ‘Siak ken daytoy a babai maymaysa a balay ti paggigiananmi. Nangipasngayak ti ubing a lalaki, ket dua nga aldaw kalpasanna isu met ti nagpasngay ti ubing a lalaki. Maysa a rabii natay ti anakna, ngem idi matmaturogak, innalana ti anakko ket sana insukat ti natay nga anakna.’

Iti daytoy kuna met daydiay maysa a babai: ‘Saan! Ti sibibiag nga ubing ti anakko, ket ti natay ti anakna!’ Ket nagsinnungbat dagiti babbai. Ania ngay ti aramiden ni Salomon?

Dimmawat ti kampilan, ket kunana: ‘Guduaenyo ti ubing, ket ikkanyo ti tunggal babbai ti sagkagudua!’

Ti pudpudno nga ina kunana: ‘Saan! Pangngaasiyo ta dikay patpatayen ti ubing. Itedyo la kenkuanan!’ Ngem daydiay maysa a babai kunana: ‘Dikay it-ited uray asinoman kadakami; sige, guduaenyo ketdi.’

Solsolbaren ni Ari Solomon ti maysa a nadagsen a parikut

Ket kuna ni Salomon: ‘Dikay papatayen ti ubing! Itedyo iti umuna a babai. Isu ti pudpudno nga inana.’ Ammo ni Salomon daytoy agsipud ta ti pudpudno nga ina ayatenna unay ti ubing nga isut’ situtulok a mangited kenkuanan iti maysa a babai tapno isut’ di mapapatay. Idi nangngegan ti umili daytoy, maragsakanda a maaddaan ti masirib nga ari.

Bayat ti panagturay ni Salomon, binendisionan ti Dios ti ili. Nawadwad ti taraon a makan. Nagsuot dagiti tattao ti nasasayaat a kawkawes ken naggigianda ti nasasayaat a balbalay. Nawadwad dagiti bambanag para ti tunggal maysa.

1 Ar-ari 3:3-28; 4:29-34.



Dagiti Saludsod

  • Ania ti insaludsod ni Jehova ken ni Salomon, ket ania ti insungbat ni Salomon?
  • Gapu ta naay-ayo iti inkalikagum ni Salomon, ania ti inkari ni Jehova nga itedna kenkuana?
  • Ania a nadagsen a parikut ti indatag dagiti dua a babbai ken ni Salomon?
  • Kas makitam iti ladawan, ania ti inaramid ni Salomon tapno marisut ti parikut?
  • Kasano ti panagturay ni Salomon, ken apay?

Kanayonan a salsaludsod

  • Basaenyo ti 1 Ar-ari 3:3-28.

    Iti kaaldawantayo, ania ti masursuro dagiti lallaki nga addaan iti responsabilidad iti organisasion ti Dios manipud iti naimpusuan nga ebkas ni Salomon iti 1 Ar-ari 3:7? (Sal. 119:105; Prov. 3:5, 6)

    Kasano a ti inkalikagum ni Salomon ket maysa a nagsayaat nga ulidan no ania dagiti maitutop a banag nga ikararagtayo? (1 Ar. 3:9, 11; Prov. 30:8, 9; 1 Juan 5:14)

    Ti panangtaming ni Salomon iti parikut dagiti dua a babbai ipanamnamana kadatayo ti ania maipapan iti panagturay iti masanguanan ti Dakdakkel a Salomon, a ni Jesu-Kristo? (1 Ar. 3:28; Isa. 9:6, 7; 11:2-4)

  • Basaenyo ti 1 Ar-ari 4:29-34.

    Kasano a sinungbatan ni Jehova ti kiddaw ni Salomon a maaddaan iti natulnog a puso? (1 Ar. 4:29)

    Maipapan iti panangikagumaan dagiti tattao a dumngeg iti kinasirib ni Salomon, ania koma ti kababalintayo iti panagadal iti Sao ti Dios? (1 Ar. 4:29, 34; Juan 17:3; 2 Tim. 3:16)

Ammuem ti Ad-adu Pay

Nagtignay a Nainsiriban ni Solomon

Ammuenyo dagiti awan iti ladawan, pagkokonektarenyo dagiti tulnek ken koloran.

Bible Card: Solomon

I-download-mo daytoy a Bible card, ken ammuem ti maipapan iti masirib nga Ari Solomon.