Accessibility setting

Agpili iti lengguahe

Mapan iti segundario a pagpilian

Mapan iti listaan dagiti linaonna

Mapan iti linaonna

Dagiti Saksi ni Jehova

Iloko

Ti Librok Dagiti Estoria ti Biblia

Estoria 62: Riribok iti Balay ni David

Estoria 62: Riribok iti Balay ni David

IDI mangrugin nga agturay ni David idiay Jerusalem, adut’ impaay ni Jehova a panagballigi ti buyotna. Kamaudiananna, babaen ti tulong ni Jehova, amin ti daga a naikari kadakuada nagbalin a kukuadan.

Nasayaat nga agturay ni David. Inayatna ni Jehova. Isu a ti damdamo nga inaramidna kalpasan panangparmekna iti Jerusalem isut’ panangyegna ti lakasa ti tulag ni Jehova sadiay.

Idi lumakay ni David nakaaramid ti dakkel a biddut. Ammona a dakes ti mangala ti kukua ti sabali a tao. Ngem maysa a rabii, isut’ nakakita ti nagpintas a babai. Batseba ti naganna, ket ni Urias a lakayna ti maysa kadagiti soldadona.

Kaay-ayo unay ni David ni Batseba a gapu itoy impaiyegna idiay palasiona. Ni lakayna ti makigubgubat idi. Ket, ni David nakidenna kenkuana, ket natakuatan ni Batseba nga isut’ nagsikog. Madanagan unay ni David, ket nagbilin iti pangulo ti buyotna a ni Joab nga ikabilna ni Urias idiay sanguanan ti paggugubatan tapno isut’ mapapatay. Idi natayen ni Urias, inasawan ni David ni Batseba.

Nakapungtot ni Jehova ken David. Imbaonna ti adipenna a Natan tapno ibaga kenkuana dagiti basbasolna. Makitam ni Natan sadiay a kasarsaritana ni David. Maladingitan unay ni David iti naaramidanna, gapuna nga isut’ di pinapatay ni Jehova. Ngem kuna ni Jehova: ‘Gapu ta inaramidmo daytoy a kinadakes, adunto ti riribok iti balaymo.’ Ket anian a riribok ti immapay ken David!

Ni Natan balbalakadanna ni David

Umuna, natay ti anak ni Batseba. Sa ti anak ni David a ni Absalom pinatayna ni kabsatna nga Amnon, ta pinilit ni Amnon a dinennaan ti kabsatda a babai a ni Tamar. Sa pinagbalin ni Absalom ti bagina nga ari. Ket nakigubat ni David a maibusor ken Absalom, nga isut’ nakatayanna.

Kabayatan amin daytoy, impasngay ni Batseba ti anak a lalaki nga agnagan Salomon. Idi lakayen ken masaksakit ni David, pinadpadas ni Adonia a pagbalinen ti bagina nga ari. Ngem, pinapulotan ni David kas ari ni Salomon. Kalpasan dayta, natayen ni David idi agtawen ti 70. Isut’ nagturay iti 40 a tawtawen. Itan ni Salomon ti arin ti Israel.

2 Samuel 11:1-27; 12:1-18; 1 Ar-ari 1:1-48.



Dagiti Saludsod

  • Iti tulong ni Jehova, ania ti nagbanagan met laeng ti daga ti Canaan?
  • Apay a nakapungtot unay ni Jehova ken ni David?
  • Iti ladawan, siasino ti imbaon ni Jehova a mangibaga kadagiti basol ni David, ket ania ti imbaga ti lalaki a mapasamak ken ni David?
  • Ania a riribuk ti dimteng ken David?
  • Kalpasan ni David, siasino ti nagbalin nga ari ti Israel?

Kanayonan a salsaludsod

  • Basaenyo ti 2 Samuel 11:1-27.

    Kasano a maysa a salaknib kadatayo ti panagtalinaed nga okupado iti panagserbi ken ni Jehova?

    Apay a nagbasol ni David, ket ania a pakdaar ti ipaay daytoy kadagiti adipen ni Jehova ita? (2 Sam. 11:2; Mat. 5:27-29; 1 Cor. 10:12; Sant. 1:14, 15)

  • Basaenyo ti 2 Samuel 12:1-18.

    Ania ti masursuro dagiti panglakayen ken nagannak iti wagas ti panangbalakad ni Natan ken ni David? (2 Sam. 12:1-4; Prov. 12:18; Mat. 13:34)

    Apay a naasian ni Jehova ken ni David? (2 Sam. 12:13; Sal. 32:5; 2 Cor. 7:9, 10)