Mapan iti linaonna

Mapan iti segundario a pagpilian

Mapan iti listaan dagiti linaonna

Dagiti Saksi ni Jehova

Iloko

Ti Librok Dagiti Estoria ti Biblia

Estoria 61: Nagbalin nga Ari ni David

Estoria 61: Nagbalin nga Ari ni David

PINADPADAS manen ni Saul a tiliwen ni David. Innalana ti 3,000 kadagiti kasayaatan a soldadona ket isut’ napandan a binirbirok. Idi naammuan ni David daytoy, naammuanna no sadino ti nagkampuan ni Saul ken ti buybuyotna iti rabii. Ket ni David ken Abisai, ti anak a lalaki ti babai a kabsat ni David a ni Sarvia, napanda sadiay.

Ni David adda ipukpukkawna ken Ari Saul

Nagar-arudok da David ken Abisai idiay kampo ni Saul bayat a matmaturogda amin. Pinidutda ti gayang ken gorgorita ni Saul, nga adda idiay uluanan ni Saul. Awan asinoman a nakakita kadakuada, ta nakaturogda amin.

Kitaenyo itan da David ken Abisai. Sitatalged nga addada idiayen tapaw ti turod. Nagpukkaw ni David iti pangulo ti buyot ti Israel: ‘Abner, apay a dika salsalakniban ti ari? Adtoy! Sadino ti ayan ti gayang ken ti gorgoritana?’

Nakariing ni Saul ket nailasinna ti timek ni David. Insaludsodna: ‘Sika kadi dayta, David?’ Makitayo kadi ni Saul ken ni Abner idiay baba?

‘Wen, apok nga ari,’ insungbat ni David. Sana kuna: ‘Apay a kayatnak a tiliwen? Aniat’ dakes nga inaramidko?’

Da Ari Saul ken ni Abner

‘Siak ti nagaramid ti dakes,’ kuna ni Saul. Kalpasanna nagawiden ni Saul. Ngem agamak ni David di la ket ta iti maysa nga aldaw isunto ti patayen ni Saul. Gapuna naikeddengna nga isut’ agkamang idiay daga dagiti Filisteo. Pinamatina dagiti Filisteo nga isut’ addan iti dasigda.

Iti maud-udi a tiempo, simmang-at dagiti Filisteo a maibusor iti Israel. Idiay paggugubatan, ni Saul ken Jonatan ti natayda. Daytoy ti nangpaleddaang unay ken ni David.

Kalpasan daytoy, nagsublin ni David idiay siudad ti Hebron. Dadduma kayatda ti anak ni Saul a ni Isboset nga agbalin nga ari, ngem dadduma kayatda ni David. Naggugubat dagiti dua a grupo, ngem iti kamaudiananna nangabak ti tattao ni David. Isut’ 30 tawen idi nagbalin nga ari. Isut’ nagturay ti pito ket kagudua a tawtawen idiay Hebron. Dadduma kadagiti annakna a lallaki a naiyanak sadiay isuda da Amnon, Absalom ken Adonia.

Immayen ti tiempo idi naparmek ni David ken ti buybuyotna ti siudad ti Jerusalem. Ni Joab, sabali manen nga anak a lalaki ni Sarvia a kabsat a babai ni David, ti nangidaulo iti pannakigubat. Isut’ ginunggonaan ni David babaen ti panangaramidna kenkuana a pangulo ti buybuyot. Itan nangrugin nga agturay ni David idiay siudad ti Jerusalem.

1 Samuel 26:1-25; 27:1-7; 31:1-6; 2 Samuel 1:26; 3:1-21; 5:1-10; 1 Cronicas 11:1-9.



Dagiti Saludsod

  • Ania ti inaramid da David ken Abisai bayat a matmaturog ni Saul iti nagkampuanna?
  • Ania dagiti insaludsod ni David ken ni Saul?
  • Nagkamangan ni David kalpasan a pinanawanna ni Saul?
  • Ania ti nangpaleddaang unay ken ni David?
  • Mano ti tawen ni David idi nagbalin nga ari idiay Hebron, ket ania ti nagan ti dadduma kadagiti annakna a lallaki?
  • Idi agangay, sadino ti nagturayan ni David kas ari?

Kanayonan a salsaludsod

  • Basaenyo ti 1 Samuel 26:1-25.

    Dagiti sasao ni David a nairekord iti 1 Samuel 26:11 ipakitana ti ania a kababalin maipapan iti teokratiko nga urnos? (Sal. 37:7; Roma 13:2)

    No inkagumaantayo ti mangipakita iti naayat a kinamanangngaasi ngem saanda nga inapresiar, kasano a dagiti sasao ni Samuel a masarakan iti 1 Samuel 26:23 tulongannatayo a mangtaginayon iti umiso a panangmatmat? (1 Ar. 8:32; Sal. 18:20)

  • Basaenyo ti 2 Samuel 1:26.

    Kasano a dagiti Kristiano iti kaaldawantayo mapatanorda ti “nasged nga ayat iti maysa ken maysa” a kas kada David ken Jonatan? (1 Ped. 4:8; Col. 3:14; 1 Juan 4:12)

  • Basaenyo ti 2 Samuel 5:1-10.

    Mano a tawen a nagturay ni David kas ari, ket kasano a nabingaybingay daytoy a tawen? (2 Sam. 5:4, 5)

    Siasino ti namagbalin ken ni David a natan-ok, ket kasano nga agserbi daytoy kas palagip kadatayo ita? (2 Sam. 5:10; 1 Sam. 16:13; 1 Cor. 1:31; Fil. 4:13)

Ammuem ti Ad-adu Pay

ISUROYO DAGITI ANNAKYO

Saan a Nagbuteng ni David

Basaem ti nagpintas nga estoria iti Biblia tapno maammuam no apay a nakaturtured ni David.

TI BIBLIA—ANIA TI MENSAHENA?

Nagkiddaw Dagiti Israelita iti Ari

Idi nagkiddaw dagiti Israelita iti ari, pinili ni Jehova ni Saul. Apay a ni David ti insukat ni Jehova ken ni Ari Saul?