Accessibility setting

Agpili iti lengguahe

Mapan iti segundario a pagpilian

Mapan iti listaan dagiti linaonna

Mapan iti linaonna

Dagiti Saksi ni Jehova

Iloko

Ti Librok Dagiti Estoria ti Biblia

Estoria 60: Ni Abigail ken David

Estoria 60: Ni Abigail ken David

AM-AMMOM kadi ti napintas a babai a sumabsabat ken David? Abigail ti naganna. Isut’ nanakman, ket tinulonganna ni David a di makaaramid ti dakes. Ngem sakbay nga ammuentay dayta, kitaentayo no aniat’ mapaspasamak ken David.

Kalpasan ti itatalaw ni David manipud ken Saul, isut’ naglemmeng iti rukib. Timmipon dagiti kakabsatna ken ti intero a pamiliana sadiay. Di nagbayag nagbalinen ni David a pangulo ti agangay 400 a tattao nga immay kenkuana. Innala ni David da tatang ken nanangna idiay Moab tapno natalgedda. Isu ken dagiti buybuyotna naglemlemmengda kadagiti bambantay.

Kalpasan daytoy a naam-ammo ni David ni Abigail. Ni lakayna, a ni Nabal, ti nabaknang nga akinkukua ti daga. Isut’ tao a nauyong. Ngem ti napintas nga asawana a ni Abigail ammona ti agaramid ti umiso. Naminsan insalakanna pay ti pamiliana. Kitaentayo no kasano.

Ni David ken ti buyotna naasida ken Nabal. Tinultulonganda a nangsalaknib kadagiti karnerona. Gapuna maysa nga aldaw nagbaon ni David ti tattaona a dumawat ti tulong ni Nabal. Kunada: ‘Naasikami kenka. Awan tinakawmi kadagiti karnerom, ngem timmulongkami a nangaywan kadakuada. Ita, pangngaasim, ikkannakam ti taraon.’

Madi ni Nabal. Adu ti saona a dakes maipapan ken David. Idi nangngeg ni David daytoy, nakapungtot. ‘Alaenyo dagiti kampilanyo!’ kunana kadagiti tattaona. Ket napandan tapno patayenda ni Nabal ken dagiti tattaona.

Maysa kadagiti tattao ni Nabal ti nangibaga ken Abigail ti inaramid ni Nabal. Dagdagus, nagsagana ni Abigail ti taraon. Inluganna ida iti sumagmamano nga asno ket napanen iti dalanna. Idi nasabatna ni David, dimsaag manipud asnona, nagruknoy ket kunana: ‘Pangngaasim, apok dika ikankano ti asawak. Adtoy ti sagsagut. Pangngaasim ta alaem ket pakawanennakami iti napasamak.’

Nangipan ni Abigail iti taraon ken David

‘Masiribka a babai,’ insungbat ni David. ‘Inatipanak a nangpapatay ken Nabal tapno masupapakan ti kinauyongna. Agawidkan a sitatalna.’ Kamaudiananna, idi natayen ni Nabal, nagbalin ni Abigail a maysa kadagiti assawa ni David.

1 Samuel 22:1-4; 25:1-43.



Dagiti Saludsod

  • Iti ladawan, ania ti nagan ti babai a sumabsabat ken David, ken ania ti kababalinna?
  • Siasino ni Nabal?
  • Apay nga imbaon ni David ti sumagmamano kadagiti tattaona a dumawat iti tulong ni Nabal?
  • Kasano a nagtignay ni Nabal iti imbaga dagiti tattao ni David, ket ania ti inaramid ni David?
  • Kasano nga impakita ni Abigail nga isu ket masirib a babai?

Kanayonan a salsaludsod

  • Basaenyo ti 1 Samuel 22:1-4.

    Kasano a nangipaay ti pamilia ni David iti nagsayaat a pagwadan no kasanotayo a tulongan ti maysa ken maysa kas agkakabsat a Kristiano? (Prov. 17:17; 1 Tes. 5:14)

  • Basaenyo ti 1 Samuel 25:1-43.

    Apay a nagdakes ti pannakailadawan ni Nabal? (1 Sam. 25:2-5, 10, 14, 21, 25)

    Ania ti masursuro dagiti Kristiano nga assawa a babbai ita iti ulidan ni Abigail? (1 Sam. 25:32, 33; Prov. 31:26; Efe. 5:24)

    Ni Abigail linapdanna ni David nga agaramid iti ania a dua a dakes a banag? (1 Sam. 25:31, 33; Roma 12:19; Efe. 4:26)

    Kasano a ti panangipangag ni David kadagiti sasao ni Abigail tulonganna dagiti lallaki ita a mangmatmat kadagiti babbai a kas iti panangmatmat ni Jehova? (Ara. 21:8, 9; Roma 2:11; 1 Ped. 3:7)

Ammuem ti Ad-adu Pay

Nagtignay ni Abigail a Sisasaririt

Ania ti maadaltayo ken Abigail maipapan iti narigat a kasasaad iti panagasawana?