Accessibility setting

Agpili iti lengguahe

Mapan iti segundario a pagpilian

Mapan iti listaan dagiti linaonna

Mapan iti linaonna

Dagiti Saksi ni Jehova

Iloko

Ti Librok Dagiti Estoria ti Biblia

Estoria 59: No Apay Agtalaw ni David

Estoria 59: No Apay Agtalaw ni David

KALPASAN a mapatay ni David ni Goliat, maragsakan unay ni Saul kenkuana. Pinagbalinna ni David a pangulo ti buyotna ket isu ti pinagtaengna idiay balay ti ari.

Iti kamaudiananna, idi nagsublin ti buybuyot a nakidangadang kadagiti Filisteo, dagiti babbai ti nangted ad-adu a dayaw ken ni David ngem ni Saul. Daytoy ti nangpaimun ken Saul. Ngem ni Jonatan nga anak ni Saul saan a nagimun. Inay-ayatna unay ni David, ken ni David inayatna met unay ni Jonatan. Nagkinnari dagiti dua iti maysa ken maysa nga aggayyemdanto a kanayon.

Ginayang ni Ari Saul ni David

Nalaing a tumutokar ni David ti arpa, ket kaykayat ni Saul a denggenna nga agtokar. Ngem maysa nga aldaw gaput’ imun ni Saul nakaaramid ti nagdakes a banag. Bayat nga agtoktokar ni David ti arpa, ginayang ni Saul ni David. Ngem nakalisi ni David ket saan a napuntaan ti gayang. Iti maud-udi saan manen a napuntaan ni David ti gayang. Isu nga ammo itan ni David a masapul nga isut’ agannad.

Malagipyo kadi a daydiay makapapatay ken Goliat maasawananto ti balasang ni Saul? Iti kamaudiananna imbaga met laeng ni Saul ken David a mabalinnan nga alaen ni Micol a balasangna, ngem umuna masapul a mangpapatay pay ti 100 kadagiti kabusor a Filisteo. Agasem dayta! Talaga a namnamaen ni Saul a dagiti Filisteo mapapatayda koma ni David. Ngem saan met, gapuna inted met laeng ni Saul ti balasangna kas asawa ni David.

Maysa nga aldaw imbaga ni Saul ken Jonatan ken amin nga ad-adipenna a kayatna a mapapatay ni David. Ngem kuna ni Jonatan: ‘Dika ar-aramiden dayta. Awan dakes a naaramidan ni David kenka.’

Nalisian ni David ti gayang

Gapuna inkari ni Saul a dina saksaktan ni David. Naisubli ni David, ket isut’ nagserbi manen idiay balay ni Saul. Ngem, iti maysa manen nga aldaw, ginayang manen ni Saul ni David. Naglisi ni David ket di napuntaan ti gayang. Maikatlo a daras daytoyen! Ammo ni David a masapul isut’ agtalawen!

Iti dayta a rabii napan ni David idiay balayna. Ngem nagbaon ni Saul kadagiti tattao a mangpapatay kenkuana. Ammo ni Micol ti plano ni amana, ket tinulonganna a makatalaw ni David. Iti pito a tawen, agsasaruno ti paglemlemmengan ni David, isu a di masapulan ni Saul.

1 Samuel 18:1-30; 19:1-18.



Dagiti Saludsod

  • Apay a nagimon ni Saul ken ni David, ngem kasano a naiduma ti anak ni Saul a ni Jonatan?
  • Maysa nga aldaw, ania ti napasamak bayat nga agtoktokar ni David iti arpa para ken Saul?
  • Ania ti imbaga ni Saul a masapul nga aramiden ni David sakbay a maasawana ti balasang ni Saul a ni Micol, ket apay nga imbaga daytoy ni Saul?
  • Kas ipakita ti ladawan, ania ti napasamak iti maikatlo a gundaway bayat nga agtoktokar ni David iti arpa para ken Saul?
  • Ania ti inaramid ni Micol tapno maispal ti biag ni David, ket ania ti inaramid ni David iti unos ti pito a tawen?

Kanayonan a salsaludsod

  • Basaenyo ti 1 Samuel 18:1-30.

    Kasano a ti di agkupas nga ayat ni Jonatan ken ni David iladawanna ti ayat iti nagbaetan dagiti “sabsabali a karnero” ken ti “bassit nga ipastoran”? (1 Sam. 18:1; Juan 10:16; Luc 12:32; Zac. 8:23)

    Nupay ni koma Jonatan ti agtawid iti kinaari ni Saul, kasano nga ipakita ti 1 Samuel 18:4 ti naisangsangayan a panagpasakup ni Jonatan iti napili nga ari?

    Kasano nga ipakita ti ehemplo ni Saul a ti imon ket mabalin nga agtungpal iti nadagsen a basol, ket ania a pakdaar ti ipaay daytoy kadatayo? (1 Sam. 18:7-9, 25; Sant. 3:14-16)

  • Basaenyo ti 1 Samuel 19:1-17.

    Kasano nga inrisgo ni Jonatan ti biagna idi imbagana dagiti sasao a nailanad iti 1 Samuel 19:4, 5? (1 Sam. 19:1, 6)