Mapan iti linaonna

Mapan iti segundario a pagpilian

Mapan iti listaan dagiti linaonna

Dagiti Saksi ni Jehova

Iloko

Ti Librok Dagiti Estoria ti Biblia

Estoria 58: Ni David ken Goliat

Estoria 58: Ni David ken Goliat

IMMAY manen a rimmaut dagiti Filisteo iti Israel. Dagiti inauna a tallo a kakabsat ni David ti addadan iti buyot ni Saul. Gapuna kinuna ni Isai iti maysa nga aldaw ken David: ‘Balonam dagiti kakabsatmo. Kitaem no ania ti kasasaadda.’

Goliat

Idi nakagteng ni David idiay kampo dagiti buyot, sinapulna dagiti kakabsatna. Ti higante a Filisteo a ni Goliat rimmuar a pagang-angawanna dagiti Israelitas. Ar-aramidenna daytoyen iti 40 nga al-aldaw. Nagpukkaw: ‘Mangpilikayo ti maysa kadagiti tattaoyo a lumaban kaniak. No mapataynak, agbalinkamto nga ad-adipenyo. Ngem no isut’ mapatayko, dakayonto met ti adipenenmi!’

Nagsaludsod ni David kadagiti soldado: ‘Aniat’ maala ti maysa a tao a makapapatay iti daytoy a Filisteo ken wayawayaanna ti Israel manipud pannakaibabain?’

‘Umawatto ti adu a kinabaknang, ken ti balasang ni Saul agbalinto nga asawana,’ kuna ti soldado.

Ngem amin dagiti Israelitas agbutengda ken Goliat. Isut’ nasurok a 9 a pie (agangay 3 metros) katayag, ken addaan pay maysa a soldado nga agawawit ti kalasagna.

Nangngeg ni Ari Saul a ni David kayatna a labanan ni Goliat. ‘Maysaka laeng nga ubing!’ kuna ni Saul ken David. Simmungbat ni David: ‘Nakapatayakon ti maysa nga oso ken maysa a leon. Ket ti Filisteo agbalin kas maysa kadakuada. Tulongannak ni Jehova.’ Gapuna ni Saul pinalubosanna ni David a lumaban ken Goliat.

Nangala ni David ti lima a nalamuyot a batbato, innalana ti pallatibongna, ket napanna sinangat ti higante. Idi isut’ nakita ti higante, kunana: ‘Umayka kaniak, ket itedkonto ti bagim a kanen dagiti tumatayab ken an-animal!’

Ipalpallatibong ni David ti maysa a bato

Ngem kuna ni David: ‘Umayka kaniak a nakakampilan, nakapika ken nakagayang. Ngem siak umayak kenka iti nagan ni Jehova. Ita nga aldaw, sika ti itden ni Jehova kadagiti imak, ket patayenkanto.’

Ket ni David nagtaray iti yan ni Goliat. Inkabilna ti maysa kadagiti bato iti pallatibongna, ket inwasiwasna a sipipigsa. Natiruan ti ulo ni Goliat, a nangpatay kenkuana. Ket amin dagiti Filisteo nagtatarayda. Isuda met ti kinamat dagiti Israelitas ket nangabakda iti gubat.

1 Samuel 17:1-54.



Dagiti Saludsod

  • Ania ti inkarit ni Goliat iti buyot ti Israel?
  • Kasano katayag ni Goliat, ket ania ti inkari ni Ari Saul a gunggona ti lalaki a makapatay ken ni Goliat?
  • Ania ti insungbat ni David idi imbaga kenkuana ni Saul a dina malabanan ni Goliat gapu ta ni David ket maysa laeng nga ubing?
  • Iti sungbatna ken Goliat, kasano nga impakita ni David ti panagtalekna ken ni Jehova?
  • Kas makitam iti ladawan, ania ti inusar ni David a mangpapatay ken ni Goliat, ket ania ti napasamak kadagiti Filisteo kalpasan daytoy?

Kanayonan a salsaludsod

  • Basaenyo ti 1 Samuel 17:1-54.

    Ania ti namagtured ken ni David, ket kasanotayo a matulad ti kinaturedna? (1 Sam. 17:37, 45; Efe. 6:10, 11)

    Apay a nasken a liklikan dagiti Kristiano ti makiinnatiw a kas ken ni Goliat no makiramanda kadagiti ay-ayam wenno panaglinglingay? (1 Sam. 17:8; Gal. 5:26; 1 Tim. 4:8)

    Kasano nga ipakita dagiti sasao ni David nga isu ket agtalek iti tulong ti Dios? (1 Sam. 17:45-47; 2 Cron. 20:15)

    Imbes nga isalaysayna laeng ti panagdangadang dagiti agbimbinnusor a buyot, kasano nga ipakita daytoy a salaysay a ti gubat iti kinapudnona ket maysa a dangadang iti nagbaetan dagiti ulbod a didiosen ken ti pudno a Dios, a ni Jehova? (1 Sam. 17:43, 46, 47)

    Kasano a tultuladen dagiti napulotan a natda ti ulidan ni David iti panagtalekna ken ni Jehova? (1 Sam. 17:37; Jer. 1:17-19; Apoc. 12:17)

Ammuem ti Ad-adu Pay

ISUROYO DAGITI ANNAKYO

Saan a Nagbuteng ni David

Basaem ti nagpintas nga estoria iti Biblia tapno maammuam no apay a nakaturtured ni David.