Mapan iti linaonna

Mapan iti segundario a pagpilian

Mapan iti listaan dagiti linaonna

Dagiti Saksi ni Jehova

Iloko

Ti Librok Dagiti Estoria ti Biblia

Estoria 57: Pinili ti Dios ni David

Estoria 57: Pinili ti Dios ni David
Insalakan ni David ti maysa a kordero

MAKITAM kadi ti napasamak? Insalakan ti ubing daytoy bassit a kordero manipud iti uso. Kanen koman ti uso ti kordero, ngem insalakan ti ubing. Ket pinatay ti ubing daydiay uso! Naminsan pay insalakanna ti karnero manipud iti leon. Saan kadi nga isut’ nagtured nga ubing? Ammom kadi no asino daytoy nga ubing?

Isu daytoy ni agtutubo a David. Isut’ aggigian idiay Betlehem. Ti apongna isu ni Obed, nga anak da Ruth ken Booz. Malagipmo kadi ida pay? Ket ti ama ni David isu ni Isai. Ni David ti agay-aywan ti karkarnero ni amana. Isut’ naiyanak 10 a tawen kalpasan panangaramid ni Jehova ken Saul kas ari.

Dimteng ti tiempo idi a kinuna ni Jehova ken Samuel: ‘Mangalaka ti espesial a lana ket inka idiay balay ni Isai sadi Betlehem. Pinilik ti maysa kadagiti annakna nga agbalin nga ari.’ Idi nakita ni Samuel ti inauna nga anak ni Isai a ni Eliab, naikunana iti bagina: ‘Siguradon nga isu daytoy ti pinili ni Jehova.’ Ngem kuna ni Jehova kenkuana: ‘Dika kitaen ti kinatayagna ken kinataerna. Saan nga isut’ pinilik nga agbalin nga ari.’

Gapuna inawagan ni Isai ti anakna nga Abinadab, ngem saan nga isut’ pinili ni Jehova. Sumaganad nga inyeg ni Isai ti anakna a ni Samma, ngem uray isu saan nga isut’ pinili ni Jehova. Inyeg ni Isai ti pito kadagiti annakna a lallaki ken Samuel, ngem awan pinili ni Jehova kadakuada.

Iti kamaudiananna inyegda ni David, nga isut’ buridek. Kuna ni Jehova: ‘Isu daytoy. Ibukbokmo ti lana kenkuana.’ Isu nga umayto ti tiempo inton agbalinen nga ari ni David iti Israel.

1 Samuel 17:34, 35; 16:1-13.



Dagiti Saludsod

  • Ania ti nagan ti lalaki iti ladawan, ket kasanotayo nga ammo nga isu ket natured?
  • Pagnanaedan ni David, ket ania ti nagan ti ama ken ti apongna?
  • Apay nga imbaga ni Jehova ken ni Samuel a mapan iti balay ni Isai idiay Betlehem?
  • Ania ti napasamak idi a ni Isai inyegna ken ni Samuel dagiti pito nga annakna?
  • Idi naiyeg ni David, ania ti imbaga ni Jehova ken ni Samuel?

Kanayonan a salsaludsod

  • Basaenyo ti 1 Samuel 17:34, 35.

    Kasano a dagitoy a pasamak ipaganetgetna ti kinatured ni David ken ti panagtalekna ken ni Jehova? (1 Sam. 17:37)

  • Basaenyo ti 1 Samuel 16:1-14.

    Kasano a dagiti sasao ni Jehova iti 1 Samuel 16:7 tulongannatayo nga agbalin a di mangidumduma gapu iti makinruar a langa? (Ara. 10:34, 35; 1 Tim. 2:4)

    Kasano nga ipakita ti ehemplo ni Saul a no ikkaten ni Jehova ti nasantuan nga espirituna iti maysa a tao, masuktan dayta iti dakes nga espiritu, wenno iti pagannayasan nga agaramid iti dakes? (1 Sam. 16:14; Mat. 12:43-45; Gal. 5:16)