Accessibility setting

Agpili iti lengguahe

Mapan iti segundario a pagpilian

Mapan iti listaan dagiti linaonna

Mapan iti linaonna

Dagiti Saksi ni Jehova

Iloko

Ti Librok Dagiti Estoria ti Biblia

Estoria 56: Ni Saul—Umuna nga Ari ti Israel

Estoria 56: Ni Saul—Umuna nga Ari ti Israel
Ni Samuel pulpulotanna ni Saul tapno agbalin nga ari

KITAEM ni Samuel a mangipakpakbo ti lana iti ulo daydiay lalaki. Daytoy idi ti ar-aramidenda kas panangipakita a napili ti maysa a tao kas ari. Imbaga ni Jehova ken Samuel nga ipakbona ti lana iti ulo ni Saul. Isut’ espesial a nabanglo unay a lana.

Impato ni Saul nga isut’ di maikari nga agari. Isut’ kinayat ni Jehova, ta isut’ di nagpannakkel ken timmangsit. Isut’ gapuna nga isu ti napili nga ari.

Ngem naggapu ni Saul iti nabaknang a pamilia, ket isut’ nataer ken natayag. Isu met ti napardas a tumataray ken napigsa. Maragsakan dagiti tattao ta pinili ni Jehova ni Saul nga agbalin nga ari. Dimmir-ida amin: ‘Viva ti ari!’

Dagiti kabusor ti Israel ti mangpatpataud pay laeng ti adu a riribok. Apaman a naaramid nga ari ni Saul, simmang-at dagiti Ammonitas maibusor iti Israel, ngem nangurnong ni Saul ti dakkel a buyot ket nangabakda. Maragsakan dagiti tattao ta ni Saul ti ari.

Iti ilalabas ti adu a tawen, idadauloan ni Saul dagiti Israelitas iti adu a panagbiktoria. Addaan met ni Saul ti natured nga anak nga agnagan Jonatan. Ket tinulongan ni Jonatan ti Israel a mangabak ti adu a gubat. Maysa nga aldaw rinibribo a Filisteo ti rimmaut kadagiti Israelitas.

Imbaga ni Samuel ken ni Saul nga aguray agingga a makasangpet ket agdaton, wenno mangted sagut ken Jehova. Ngem nabayagan ti isasangpet ni Samuel, ket agbuteng ni Saul di la ket ta rumauten dagiti Filisteo. Isu nga isun ti nagidaton. Idi nakasangpet met laengen ni Samuel, imbagana ken Saul nga isut’ nasukir ket ni Jehova nangpili ti sabali a tao nga agbalin nga ari iti Israel.

Pagammuam simmukir manen ni Saul, gapuna kuna ni Samuel kenkuana: ‘Nasaysayaat ti agtulnog ken Jehova ngem ti panagaramid ti nasayaat a daton kenkuana. Gapu ta dika nagtulnog ken Jehova, saannakanto a pagtuloyen ni Jehova kas ari iti Israel.’

Makitatay iti daytoy a masapul nga agtulnogtayo a kanayon ken Jehova. Ken, makitatayo met a ti nasayaat a tao, kas ken Saul, ti agbalbaliw ket agbalin a dakes. Ditay kayat ti agbalin a dakes, saan kadi?

1 Samuel kapitulo 9 ingganat’ 11; 13:5-14; 14:47-52; 15:1-35; 2 Samuel 1:23.



Dagiti Saludsod

  • Iti ladawan, ania ti ar-aramiden ni Samuel, ken apay?
  • Apay a ni Jehova kinayatna ni Saul, ket ania a kita ti tao ni Saul?
  • Ania ti nagan ti anak ni Saul, ket ania ti inaramidna?
  • Apay a nagidaton ni Saul imbes nga urayenna ni Samuel a mangaramid iti daytoy?
  • Ania dagiti leksion a masursurotayo iti salaysay maipapan ken Saul?

Kanayonan a salsaludsod

  • Basaenyo ti 1 Samuel 9:15-21 ken 10:17-27.

    Kasano a nakatulong ti kinaemma ni Saul tapno saan nga agtignay a sidadarasudos idi awanan panagraem a nagsao dagiti sumagmamano a lallaki iti maipapan kenkuana? (1 Sam. 9:21; 10:21, 22, 27; Prov. 17:27)

  • Basaenyo ti 1 Samuel 13:5-14.

    Ania ti nagbasolan ni Saul idiay Gilgal? (1 Sam. 10:8; 13:8, 9, 13)

  • Basaenyo ti 1 Samuel 15:1-35.

    Ania ti nadagsen a nagbasolan ni Saul mainaig ken ni Agag, nga ari ti Amalek? (1 Sam. 15:2, 3, 8, 9, 22)

    Kasano a pinadas ni Saul nga ikalintegan dagiti inaramidna ken pinabasolna dagiti dadduma? (1 Sam. 15:24)

    Ania a pakdaar ti masapul nga ipangagtayo ita no mabalakadantayo? (1 Sam. 15:19-21; Sal. 141:5; Prov. 9:8, 9; 11:2)