Accessibility setting

Agpili iti lengguahe

Mapan iti segundario a pagpilian

Mapan iti listaan dagiti linaonna

Mapan iti linaonna

Dagiti Saksi ni Jehova

Iloko

Ti Librok Dagiti Estoria ti Biblia

Estoria 55: Ti Ubing a Nagserbi iti Dios

Estoria 55: Ti Ubing a Nagserbi iti Dios

SAAN kadi a nagguapo daytoy nga ubing? Samuel ti naganna. Ket ti lakay a nakaparabaw ti imana iti ulo ni Samuel isu ni Eli a nangato a padi ti Israel. Dayta ti ama ni Samuel nga Elcana ken ti inana a ni Anna a nangiyeg ken Samuel ken ni Eli.

Nayam-ammo ken Samuel ti nangato a padi a ni Eli

Ni Samuel ket uppat wenno lima a tawenna laeng. Ngem isut’ agtaeng ditoy tabernakulo ni Jehova a kadua ni Eli ken ti dadduma a papadi. Apay a ni Elcana ken Anna itedda ti nakaububing unay kas ken Samuel nga agserbi ken Jehova idiay tabernakulo? Kitaentayo.

Sumagmamano a tawen sakbay daytoy, maladingitan unay ni Anna. Saanna a mabalin ti aganak, ket kayatna unay ti maaddaan ti anak. Gapuna iti maysa nga aldaw, isut’ nagkararag idiay tabernakulo: ‘O Jehova, no ikkannak ti anak a lalaki, ikarik nga itedkonto kenka tapno agserbi kenka iti amin a biagna.’

Sinungbatan ni Jehova ti kararag ni Anna, ket di nagbayag adda kenkuanan ni Samuel. Inayat ni Anna ti bassit nga anakna, ket rinugianna a sinursuruan maipapan ken Jehova idi nakabasbassit pay laeng. Imbagana ken lakayna: ‘Apaman a mapusoten ni Samuel, ipankonton idiay tabernakulo nga agserbi ken Jehova sadiay.’

Daytoy ti makitkitatayo nga ar-aramidenda itan iti daytoy a retrato. Ket maragsakan ni Samuel a makapagserbi ken Jehova ditoy tolda ni Jehova. Tinawen, ni Anna ken ni Elcana umayda nga agdayaw iti daytoy espesial a tolda, ken bisitaen ti anakda. Ket kada tawen mangyeg ni Anna ti baro a pawad a kagay nga inaramidna para ken Samuel.

Iti sumagmamano a tawen, intultuloy ni Samuel ti nagserbi ken Jehova, ket agpadpada nga isut’ nagustuan ni Jehova ken dagiti tattao. Ngem dagiti annak ni Eli a nangato a padi a da Ofni ken Finees ti dakesda. Adu a bambanag a dakes ti araramidenda. Rebbeng nga ikkaten ida ni Eli kas papadi, ngem saanna ida nga inikkat.

Kaskasdi, intultuloy ni Samuel ti nagserbi iti Dios. Ngem gapu ta bassit laeng a tattao ti talaga nga agayat ken Jehova, nabayag idin a tiempo nanipud maudi a pannakisao ni Jehova iti asinoman a tao. Idi dimmakkel pay ti bassit ni Samuel daytoy ti napasamak.

Matmaturog idi ni Samuel idiay tabernakulo idi isut’ riniing ti maysa a timek. Simmungbat: ‘Adtoyak.’ Ket isut’ nagtaray ken Eli, a kunana: ‘Inayabannak. Adtoyak.’

Ngem simmungbat ni Eli: ‘Diak nga immayab; inka agiddan.’ Gapuna nagsubli a nagidda ni Samuel.

Daytoy ti napasamak manen, agingga iti maikatlo a daras. Kamaudiananna, natarusan ni Eli a mabalin a ni Jehova ti umayayab. Gapuna imbagana ken Samuel: ‘Inka, agiddaka manen, ket no isut’ umayab manen, kunaemto: “Agsaoka, Jehova, ta ti adipenmo dumdumngeg kenka.” ’

Isu daytoy ti inaramid ni Samuel. Ken ni Jehova imbagana ken Samuel a dusaenna da Eli ken ti annakna. Pagammuam natay da Ofni ken Finees iti gubat, ket idi nangngegan ni Eli dayta, isut’ natuang, nabusak ti teltelna ken isut’ natay met. Pimmudno ti sao ni Jehova.

Dimmakkel ni Samuel ket isut’ nagbalin a kaudian nga ukom ti Israel. Idi isut’ lakayen, nagdawat dagiti tattao kenkuana: ‘Ipiliannakami ti ari nga agturay kadakami.’ Madi ni Samuel, ta ni Jehova ti pudpudno nga arida. Ngem imbaga ni Jehova kenkuana nga ipangagna dagiti tattao.

1 Samuel 1:1-28; 2:11-36; 4:16-18; 8:4-9.



Dagiti Saludsod

  • Ania ti nagan ti ubing iti ladawan, ket siasino dagiti kakaduana?
  • Ania ti inkararag ni Anna idi naminsan a simmarungkar iti tabernakulo ni Jehova, ket kasano a sinungbatan ni Jehova?
  • Mano ti tawen ni Samuel idi naipan idiay tabernakulo ni Jehova tapno agserbi, ket ania ti tinawen nga ar-aramiden kenkuana ti inana?
  • Ania ti nagan dagiti annak ni Eli, ket aniada a kita ti tattao?
  • Kasano nga inawagan ni Jehova ni Samuel, ket ania ti imbagana kenkuana?
  • Ania ti nagbalinan ni Samuel idi nataenganen, ken ania ti napasamak idi lakayen?

Kanayonan a salsaludsod

  • Basaenyo ti 1 Samuel 1:1-28.

    Ania a nasayaat nga ulidan para kadagiti ulo ti pamilia ti impaay ni Elcana iti panangidaulona iti pudno a panagdayaw? (1 Sam. 1:3, 21; Mat. 6:33; Fil. 1:10)

    Ania a leksion ti masursurotayo iti ehemplo ni Anna iti panangtaming iti makaburibor a parikut? (1 Sam. 1:10, 11; Sal. 55:22; Roma 12:12)

  • Basaenyo ti 1 Samuel 2:11-36.

    Kasano nga ad-adda a dinayaw ni Eli dagiti annakna imbes a ni Jehova, ket kasano nga agserbi daytoy kas pakdaar kadatayo? (1 Sam. 2:22-24, 27, 29; Deut. 21:18-21; Mat. 10:36, 37)

  • Basaenyo 1 Samuel 4:16-18.

    Ania dagiti uppat a dakes a damag a naggapu iti pagbabakalan, ket ania ti epekto daytoy ken ni Eli?

  • Basaenyo ti 1 Samuel 8:4-9.

    Kasano a ti Israel pinagrurodna ni Jehova iti kasta unay, ket kasanotayo a masuportaran a sisusungdo ti Pagarianna ita? (1 Sam. 8:5, 7; Juan 17:16; Sant. 4:4)

Ammuem ti Ad-adu Pay

Ni Samuel nga Adda iti Templo

Kasano a binendisionan ni Jehova ni Samuel? I-print-yo daytoy nga aktibidad, pagkokonektarenyo dagiti tulnek, ken basaenyo ti estoria ti Biblia.

Intultuloy nga Inaramid ni Samuel ti Umiso

Kasano a matuladmo ni Samuel ken maitultuloymo nga aramiden ti umiso uray no dakes ti ar-aramiden ti dadduma?

“Nagtultuloy a Dimmakkel iti Sango ni Jehova”

Ania ti naisangsangayan maipapan iti panagubing ni Samuel? Kasano a bimmileg ti pammatina bayat ti kaaddana iti tabernakulo?