Accessibility setting

Agpili iti lengguahe

Mapan iti segundario a pagpilian

Mapan iti listaan dagiti linaonna

Mapan iti linaonna

Dagiti Saksi ni Jehova

Iloko

Ti Librok Dagiti Estoria ti Biblia

Estoria 54: Ti Kapipigsaan a Lalaki

Estoria 54: Ti Kapipigsaan a Lalaki

AMMOM kadi ti nagan ti kapipigsaan a lalaki a nagbiagen? Isu ti ukom nga agnagan Samson. Ni Jehova ti nangted ti pigsa ni Samson. Sakbay a naiyanak ni Samson, imbaga ni Jehova iti inana: ‘Ti anakmo idaulonanto ti panangisalakan iti Israel kadagiti Filisteo.’

Makipengpengnget ni Samson iti leon

Dagiti Filisteo ket dakesda a tattao nga aggigian idiay Canaan. Talaga a nauyongda kadagiti Israelitas. Naminsan, idi agturturong ni Samson kadagiti Filisteo, nakapatay ti dakkel a leon babaen kadagiti imana laeng. Isu met ti nakapapatay ti ginasgasut kadagiti dakes a Filisteo.

Idi agangay nagayat ni Samson iti maysa a babai nga agnagan Dalila. Inkari dagiti Filisteo nga ikkanda ni Dalila ti 1,100 a kapisi ti pirak no ibagana kadakuada no apay nagpigsa ni Samson. Gapuna kanayon a salsaludsoden ni Dalila ken Samson no apay isut’ nakapigpigsa.

Da Dalila ken Samson

Iti kamaudiananna, imbaga ni Samson ken Dalila: ‘Ti buokko saan pay a naputputdan. Manipud maipasngayak, siak ti pinili ti Dios nga agbalin a naisangsangayan nga adipenna a maaw-awagan Nazareo. No maputdan ti buokko, mapukawko ti pigsak.’

Ket, ni Dalila pinaturogna ni Samson iti saklotna. Kalpasanna immawag ti lalaki a sumrek ket pinutdanna ti buokna. Idi makariingen ni Samson, napukawnan ti pigsana. Isut’ tiniliw dagiti Filisteo ket pinagbalinda nga adipenda. Binulsekda ti dua a matana.

Itutuang ni Samson dagiti adigi

Maysa nga aldaw, nagaramid dagiti Filisteo ti dakkel a rambak a pangdaydayaw ti Diosda a ni Dagon, ket inruarda ni Samson manipud pagbaludan tapno pagkatkatawaan. Ngem timmubo manen ti buok ni Samson. Indawatna nga isut’ maiturong idiay dua nga adigi a mangtengtengngel ti balay. Ket nagkararag ken Jehova a maipaay iti pigsa ket sana impukkaw: ‘Bay-annak a matay agraman dagiti Filisteo.’ Induron ni Samson dagiti adigi, ket narba ti balay kadagiti isuamin a 3,000 a Filisteo nga adda iti rambak, a nangpapatay amin kadagiti dakes a tao.

Oc-ocom kapitulo 13 ingganat’ 16.



Dagiti Saludsod

  • Ania ti nagan ti kapipigsaan a lalaki a nagbiag ditoy daga, ket siasino ti nangted iti pigsana?
  • Iti naminsan, ania ti inaramid ni Samson iti dakkel a leon, kas makitam iti ladawan?
  • Iti ladawan, ania a sekreto ti ibagbaga ni Samson ken ni Dalila, ket kasano a nagtungpal daytoy iti panangtiliw kenkuana dagiti Filisteo?
  • Kasano a pinapatay ni Samson ti 3,000 a kabusor a Filisteo iti aldaw nga ipapatayna?

Kanayonan a salsaludsod

  • Basaenyo ti Uk-ukom 13:1-14.

    Kasano a nangipaay ni Manoa ken ti asawana iti nagsayaat nga ulidan para kadagiti nagannak iti panangpadakkelda kadagiti annakda? (Uk. 13:8; Sal. 127:3; Efe. 6:4)

  • Basaenyo ti Uk-ukom 14:5-9 ken 15:9-16.

    Kasano a ti salaysay maipapan iti panangpapatay ni Samson iti leon, panangpugsatna kadagiti baro a tali a naigalut kenkuana, ken ti panangusarna iti panga ti maysa a kalakian nga asno a mangpapatay iti 1,000 a lallaki ipakitana ti panagtignay ti nasantuan nga espiritu ni Jehova?

    Kasanonatayo a tulongan ita ti nasantuan nga espiritu? (Uk. 14:6; 15:14; Zac. 4:6; Ara. 4:31)

  • Basaenyo ti Uk-ukom 16:18-31.

    Kasano a naapektaran ni Samson iti dakes a pannakitimpuyog, ket ania ti masursurotayo iti daytoy? (Uk. 16:18, 19; 1 Cor. 15:33)

Ammuem ti Ad-adu Pay

Bible Card: Samson

Ammuem no apay a napigsa ni Samson.