Accessibility setting

Agpili iti lengguahe

Mapan iti segundario a pagpilian

Mapan iti listaan dagiti linaonna

Mapan iti linaonna

Dagiti Saksi ni Jehova

Iloko

Ti Librok Dagiti Estoria ti Biblia

Estoria 53: Ti Kari ni Jefte

Estoria 53: Ti Kari ni Jefte
Balasang ni Jefte

NAGKARIKAYON aya ket iti kamaudiananna nakitayo a narigatyo a tungpalen dayta? Kasta ti inaramid ti lalaki nga adda iti daytoy a retrato, gapuna isut’ lumdaang unay. Ti lalaki ket maysa a natured nga ukom ti Israel nga agnagan Jefte.

Nagbiag ni Jefte idi a dagiti Israelitas saandan nga agdaydayaw ken Jehova. Agar-aramidda manen ti dakes. Gapuna impalubos ni Jehova a saktan ida dagiti tattao ti Ammon. Imkis manen dagiti Israelitas ken Jehova: ‘Nagbasolkami kenka. Pangngaasim ta isalakannakami.’

Ni Jefte ken dagiti soldadona

Pinili dagiti tattao ni Jefte a mangbakal kadagiti dakes nga Ammonita. Pagayatan unay ni Jefte nga isut’ tulongan ni Jehova, isu a nagkari ken Jehova: ‘No pagballigiennak, itdek kenka ti umuna a tao a rummuar iti balayko a sumabat kaniak inton agsubliak.’

Tinulongan ni Jehova a mangabak ni Jefte. Idi agawiden ni Jefte, ammom kadi no asinot’ immuna a rimmuar ken simmabat kenkuana? Isu ti balasangna, a kakaisuna nga anakna. Maladingitan unay ni Jefte. Ngem isut’ nagkari ket saannan a maibabawi dayta.

Idi naammuan ti balasang ni Jefte ti kari, isut’ maladingitan met idi damo. Ngem kunana ken tatangna: ‘No nagkarika ken Jehova, masapul a tungpalem.’

Gapuna napan ti anak ni Jefte idiay Silo, ket inusarna amin a biagna a nagserserbi ken Jehova iti tabernakulona. Uppat nga aldaw iti kada tawen, mapan dagiti babbai ti Israel a bumisita kenkuana idiay, ket naragsakda. Inayat dagiti tattao ti balasang ni Jefte ta isut’ nagsayaat nga adipen ni Jehova.

Oc-ocom 10:6-18; 11:1-40.



Dagiti Saludsod

  • Siasino ni Jefte, ken iti ania a panawen a nagbiag?
  • Ania ti inkari ni Jefte ken ni Jehova?
  • Apay a naladingitan ni Jefte idi nagawid kalpasan nga inabakna dagiti Ammonita?
  • Ania ti imbaga ti balasang ni Jefte idi naammuanna ti inkari ti amana?
  • Apay nga inayat dagiti tattao ti balasang ni Jefte?

Kanayonan a salsaludsod

  • Basaenyo ti Uk-ukom 10:6-18.

    Ania a pakdaar ti masapul nga ipangagtayo maipapan iti di kinamatalek ti Israel ken ni Jehova? (Uk. 10:6, 15, 16; Roma 15:4; Apoc. 2:10)

  • Basaenyo ti Uk-ukom 11:1-11, 29-40.

    Kasanotayo nga ammo a ti panangted ni Jefte iti balasangna kas “daton a mapuoran” dina kaipapanan nga indatonna babaen ti apuy kas natauan a daton? (Uk. 11:31; Lev. 16:24; Deut. 18:10, 12)

    Iti ania a pamay-an nga indaton ni Jefte ti balasangna kas sakripisio?

    Ania ti masursurotayo iti panangtungpal ni Jefte iti karina ken ni Jehova? (Uk. 11:35, 39; Ecl. 5:4, 5; Mat. 16:24)

    Kasano a ti balasang ni Jefte ket nagsayaat nga ulidan para kadagiti agtutubo a Kristiano iti panagserbi iti amin a tiempo? (Uk. 11:36; Mat. 6:33; Fil. 3:8)