Accessibility setting

Agpili iti lengguahe

Mapan iti segundario a pagpilian

Mapan iti listaan dagiti linaonna

Mapan iti linaonna

Dagiti Saksi ni Jehova

Iloko

Ti Librok Dagiti Estoria ti Biblia

Estoria 52: Ni Gideon ken ti 300 a Buyotna

Estoria 52: Ni Gideon ken ti 300 a Buyotna

MAKITAM kadi ti mapaspasamak ditoy? Dagitoy amin ti mannakigubat ti Israel. Dagiti lallaki a nakarukob ti umininumda. Ni Ukom Gideon ti lalaki a sitatakder ti sibayda. Kitkitaenna ti panaginumda ti danum.

Makitam kadi ti panaginum dagiti lallaki? Dadduma idumogda a mismo ti rupada idiay danum. Ngem ti maysa kakaudenna ti danum iti imana, tapno makitana ti mapaspasamak iti agliklikmutna. Importante daytoy. Imbaga ni Jehova ken Gideon a pilienna laeng dagiti lallaki nga agsipsiput bayat nga umininumda. Kitaentayo no apay.

Adda man iti ririboken dagiti Israelitas. Saanda a nagtulnog manen ken Jehova. Dagiti tattao ti Madian napigpigsada ngem isuda ket saksakitanda ida. Gapuna immararaw dagiti Israelitas ken Jehova maipaay iti tulong.

Kuna ni Jehova ken Gideon a mangala ti buyot, isu a nangurnong ni Gideon ti 32,000 a mannakigubat a lallaki. Ngem adda buyot a 135,000 a lallaki kontra iti Israel. Kaskasdi kuna ni Jehova ken Gideon: ‘Adu unay ti tattaom.’ Apay a kuna ni Jehova dayta?

Ngamin ta no nangabak ti Israel iti gubat, pagarupendanto ketdi a nangabakda a bukbukodda ket saanda a kasapulan ti tulong ni Jehova. Gapuna kuna ni Jehova ken Gideon: ‘Ibagam kadagiti amin a lallaki a mabuteng nga agawiddan.’ Idi inaramid ni Gideon daytoy, 22,000 a lallaki ti nagawiden.

Ni Gideon subsubokenna dagiti soldadona

Ngem, denggem! Kuna ni Jehova: ‘Adu pay latta ti tattaom.’ Gapuna imbagana ken Gideon a painumenna dagiti lallaki iti daytoy a karayan ket sana pinagawid amin dagidiay idumogda ti rupada idiay danum, ken saan nga agsipsiput. ‘Itedkonto ti panagballigi kenka ken kadagiti 300 a lallaki a natda,’ inkari ni Jehova.

Inikkan ni Gideon a sinaggaysa kadagiti 300 a buybuyotna ti tangguyob, ken ti gorgorita nga adda aluten idiay unegna. Iti tengnga ti rabii, linakubda ti kampamento ti kabusor. Sangsangkamaysa pinuyotda ti tangguyobda ken binuongda ti gorgoritada ket nagpukkawda ti napigsa. Nakariing dagiti kabusor a soldado. Nagbutengda ket nagtatarayda. Nangabak dagiti Israelitas iti bakal.

Oc-ocom kapitulo 6 ingganat’ 8.



Dagiti Saludsod

  • Kasano ken apay nga agpegpeggad unay dagiti Israelita?
  • Apay nga imbaga ni Jehova ken ni Gideon nga adu unay ti tattaona?
  • Iti ladawan, ilawlawagmo no kasano a pinagbalin ni Jehova a 300 laeng ti buyot ni Gideon.
  • Kasano nga inorganisar ni Gideon dagiti 300 a buyotna, ket kasano a nangabak ti Israel iti gubat?

Kanayonan a salsaludsod

  • Basaenyo ti Uk-ukom 6:36-40.

    Kasano a sinigurado ni Gideon ti pagayatan ni Jehova?

    Kasanotayo a maammuan ita no ania ti pagayatan ni Jehova? (Prov. 2:3-6; Mat. 7:7-11; 2 Tim. 3:16, 17)

  • Basaenyo ti Uk-ukom 7:1-25.

    Ania ti masursurotayo kadagiti 300 a nagtalinaed a nasiput no maidilig kadagidiay naliway? (Uk. 7:3, 6; Roma 13:11, 12; Efe. 5:15-17)

    Kas iti pannakasursuro dagiti 300 babaen ti panangimatangda ken ni Gideon, kasanotayo a makasursuro babaen ti panangimatangtayo iti Dakdakkel a Gideon, a ni Jesu-Kristo? (Uk. 7:17; Mat. 11:29, 30; 28:19, 20; 1 Ped. 2:21)

    Kasano a tulongannatayo ti Uk-ukom 7:21 a makontento nga agserbi iti sadinoman a nangitudingan kadatayo ti organisasion ni Jehova? (1 Cor. 4:2; 12:14-18; Sant. 4:10)

  • Basaenyo ti Uk-ukom 8:1-3.

    No maipapan iti panangtaming kadagiti personal a di pagkinnaawatan iti maysa a kabsat, ania ti masursurotayo iti wagas ni Gideon a nangrisut iti parikut kadagiti Efraimita? (Prov. 15:1; Mat. 5:23, 24; Luc. 9:48)