Accessibility setting

Agpili iti lengguahe

Mapan iti segundario a pagpilian

Mapan iti listaan dagiti linaonna

Mapan iti linaonna

Dagiti Saksi ni Jehova

Iloko

Ti Librok Dagiti Estoria ti Biblia

Estoria 51: Ni Ruth ken Noemi

Estoria 51: Ni Ruth ken Noemi

IDIAY Biblia makakitaka ti libro a maaw-awagan Ruth. Isut’ estoria ti maysa a pamilia a nagbibiag idi tiempo a ti Israel addaan kadagiti uk-ukom. Ni Ruth ket maysa a balasang manipud daga ti Moab; isut’ di kameng ti nasion ti Dios, nga Israel. Ngem idi naammuan ni Ruth ti maipapan ti pudno a Dios, a ni Jehova, isu ti inayatna un-unay. Ni Noemi isut’ natataengan a babai a nangtulong ken Ruth a nakaammo maipapan ken Jehova.

Ni Noemi ket maysa a babai nga Israelita. Isu ken ni lakayna ken ti dua nga annakda a lallaki ti immakar idiay daga ti Moab idi nakirang ti taraon idiay Israel. Ngem maysa nga aldaw natay ti asawa ni Noemi. Ket nagasawa met dagiti annak ni Noemi ti dua a babbai a Moabita nga agnagan Ruth ken Orfa. Ngem kalpasan ti 10 a tawen, natay met dagiti dua nga annak ni Noemi. Anian a ladingit ni Noemi ken ti dua a babbai!

Maysa nga aldaw naikeddeng ni Noemi nga agsubli kadagiti kailianna. Kumuyog met da Ruth ken Orfa. Ngem kalpasan pannagnada ti nawadwad bassiten idiay dalan, kuna ni Noemi kadagiti babbai: ‘Agawidkayon ket makipagtaengkayon kadagiti innayo.’

Inagkan ni Noemi dagiti babbai. Saanda kayat ti pumanaw kenkuana, ket nangrugidan nga agsangit. Ngem kuna ni Noemi: ‘Masapul nga agsublikayon, annakko. Nasaysayaat para kadakayo no addakayo idiay balayyo.’ Gapuna a nagsublin ni Orfa, ngem madi a mapan ni Ruth.

Kuna ni Ruth ken Noemi: ‘Dika koma tarigagayan kaniak a panawanka. Sadinoman ti papanam umayakto, ket sadinoman a pagnaedam agnaedakto. Ti ilim isunto ti ilik, ket ti Diosmo isunto ti Diosko. Sadinoman a pakatayam matayakto met, ket sadiay maitabonakto.’ Gapuna saanen a pinadpadas pay ni Noemi a pagawiden.

Idi agangay, nakadanon ti dua a babbai idiay Israel. Ditoy a nagnaeddan. Dagus a nagtrabaho ni Ruth idiay taltalon. Maysa a lalaki nga agnagan Booz ti nangpalubos kenkuana nga agadas ti sebada idiay talonna. Ammom kadi no asino ti ina ni Booz? Isu ni Rahab idiay siudad ti Jerico.

Maysa nga aldaw kuna ni Booz ken ni Ruth: ‘Nangngegkon ti maipapan kenka, ken ti kinaanusmo ken ni Noemi. Sapay koma ta kaasiannaka ni Jehova!’ Sumungbat met ni Ruth: ‘Naanuska met kaniak, apo.’

Kaykayat ni Booz unay ni Ruth, ket di nagbayag nagassawadan. Anian ti ragsak ni Noemi gapu itoy! Ngem naragragsak manen ni Noemi idi ni Ruth ken Booz naaddaanda ti umuna nga anak, a napanaganan Obed. Iti kamaudiananna, nagbalin ni Obed a lolo ni David, a maammuantayonto pay ti ad-adu iti kamaudiananna.

Da Ruth ken Noemi

Libro ti Biblia a Ruth.



Dagiti Saludsod

  • Apay a nakapan ni Noemi idiay daga ti Moab?
  • Siasino da Ruth ken Orfa?
  • Kasano a nagtignay da Ruth ken Orfa idi imbaga kadakuada ni Noemi nga agsublida kadagiti kailianda?
  • Siasino ni Booz, ket kasanona a tinulongan da Ruth ken Noemi?
  • Ania ti nagan ti anak da Booz ken Ruth, ket apay a rumbeng a laglagipentayo?

Kanayonan a salsaludsod

  • Basaenyo ti Ruth 1:1-17.

    Ania a nagsayaat nga ebkas ti nasungdo nga ayat ti insawang ni Ruth? (Ruth 1:16, 17)

    Kasano a ti panagpampanunot ni Ruth maitutop nga ipakitana ti kababalin dagiti “sabsabali a karnero” kadagiti napulotan ditoy daga iti kaaldawantayo? (Juan 10:16; Zac. 8:23)

  • Basaenyo ti Ruth 2:1-23.

    Kasano a nangipaay ni Ruth iti nagsayaat nga ulidan kadagiti agkabannuag a babbai ita? (Ruth 2:17, 18; Prov. 23:22; 31:15)

  • Basaenyo ti Ruth 3:5-13.

    Kasano a minatmatan ni Booz ti situtulok a pannakiasawa kenkuana ni Ruth imbes nga iti ub-ubing a lalaki?

    Ania ti maadaltayo iti kababalin ni Ruth maipapan iti nasungdo nga ayat? (Ruth 3:10; 1 Cor. 13:4, 5)

  • Basaenyo ti Ruth 4:7-17.

    Kasano nga agbalin a kas ken Booz dagiti Kristiano a lallaki ita? (Ruth 4:9, 10; 1 Tim. 3:1, 12, 13; 5:8)

Ammuem ti Ad-adu Pay

Ruth—Matalek a Gayyem

Nupay saan nga Israelita, nagun-odna ti anamong ti Dios ken nasagrapna ti nakaskasdaaw a bendision gapu iti kinamatalekna.