Accessibility setting

Agpili iti lengguahe

Mapan iti segundario a pagpilian

Mapan iti listaan dagiti linaonna

Mapan iti linaonna

Dagiti Saksi ni Jehova

Iloko

Ti Librok Dagiti Estoria ti Biblia

Estoria 50: Dua a Natured a Babbai

Estoria 50: Dua a Natured a Babbai

NO DAGITI Israelitas mariribokda, umawagda ken Jehova. Ket ikkan ni Jehova ida kadagiti natured a papangulo a tumulong kadakuada. Ti Biblia awaganna dagitoy a lider ti uk-ukom. Ni Josue ti damdamo nga ukom. Ngem dua kadagiti tattao a nangtulong iti Israel ti babbai nga agnagan Debora ken Jael.

Ni Debora makisarsarita ken Barac

Ni Debora ket maysa a babai a mammadto. Ibagbaga ni Jehova kenkuana dagiti bambanag iti masanguanan, ket ibagana met kadagiti tattao ti ibagbaga ni Jehova. Isu met ti maysa nga ukom. Mapan dagiti tattao kenkuana a patulongan kadagiti parikutda.

Ni Jabin idi ti ari ti Canaan. Napigsa ti buyotna ket adu kadagiti Israelitas ti napilitan a nagbalin nga ad-adipen ni Jabin. Ti pangulo ti buyot ni Jabin ket agnagan Sisara.

Maysa nga aldaw ni Debora nagbilin ken Ukom a Barac ket imbagana kenkuana: ‘Kuna ni Jehova: “Mangalaka ti 10,000 a buyotmo ket inka idiay Bantay Tabor. Idiay pagballigienkanto maibusor ken Sisara ken ti buyotna.” ’

Kuna ni Barac: ‘Mapanak no mapanka met.’ Kimmuyog ni Debora, ngem imbagana ken Barac: ‘Saankanto a mapadayawan iti panagballigi ta iyawat ni Jehova ni Sisara iti ima ti maysa a babai.’

Simmalog ni Barac manipud Bantay Tabor tapno sarangtenna ti buyot ni Sisara. Apaman latta ta pinaglayus ni Jehova, ket adu kadagiti kabusor a soldado ti nalmes. Ngem nakataray ni Sisara.

Da Barac, Jael, ken Sisera

Iti di nabayag, nakagteng ni Sisara idiay tolda ni Jael. Inawisna a sumrek ket inikkanna ti gatas. Idi kuan isut’ nakaturog. Kalpasanna ni Jael impalokna ti pasok ti tolda idiay pispis ti dakes a tao. Kalpasanna immay ni Barac ket nakitana a ni Sisara natayen! Gapuna ti kuna ni Debora pimmayso.

Iti kamaudiananna napapatay met ni Ari Jabin, ket dagiti Israelitas naaddaanda manen ti talna.

Oc-ocom 2:14-22; 4:1-24; 5:1-31.



Dagiti Saludsod

  • Siasino dagiti uk-ukom, ket ania ti nagan dagiti dadduma kadakuada?
  • Ania ti naisangsangayan a pribilehio ni Debora, ket ania ti nairaman iti daytoy?
  • Idi a ti Israel ket pinangtaan ni Ari Jabin ken ti pangulo ti buyotna a ni Sisera, ania a mensahe a naggapu ken ni Jehova ti indanon ni Debora ken ni Ukom a Barac, ket siasino ti imbagana a mapadayawan?
  • Kasano nga impakita ni Jael nga isu ket natured a babai?
  • Ania ti napasamak kalpasan ti ipapatay ni Ari Jabin?

Kanayonan a salsaludsod

  • Basaenyo ti Uk-ukom 2:14-22.

    Apay a nakapungtot ni Jehova kadagiti Israelita, ket ania a leksion ti masursurotayo iti daytoy? (Uk. 2:20; Prov. 3:1, 2; Ezeq. 18:21-23)

  • Basaenyo ti Uk-ukom 4:1-24.

    Ania dagiti leksion maipapan iti pammati ken tured ti masursuro dagiti Kristiano a babbai ita iti ulidan da Debora ken Jael? (Uk. 4:4, 8, 9, 14, 21, 22; Prov. 31:30; 1 Cor. 16:13)

  • Basaenyo ti Uk-ukom 5:1-31.

    Kasano a ti kanta ti panagbiktoria da Barac ken Debora ket mabalin nga ibilang kas kararag maipapan iti umad-adanin a gubat ti Har-Magedon? (Uk. 5:3, 31; 1 Cron. 16:8-10; Apoc. 7:9, 10; 16:16; 19:19-21)