Mapan iti linaonna

Mapan iti segundario a pagpilian

Mapan iti listaan dagiti linaonna

Dagiti Saksi ni Jehova

Iloko

Ti Librok Dagiti Estoria ti Biblia

Estoria 49: Ti Init Nagintek

Estoria 49: Ti Init Nagintek

KITAEM ni Josue. Kunkunana: ‘Init, agintekka!’ Ket ti init nagintek iti agmalem. Ni Jehova ti nangpasamak iti dayta! Ngem kitaentayo no apay kayat ni Josue nga agtultuloy a sumilnag ti init.

Ti init

Idi rinugian dagiti lima nga ari a gubaten ida, nagbaon dagiti Gabaonitas ti lalaki ken Josue a dumawat ti tulong. Dagdagus, napan ni Josue ken amin a buyotna. Nagpatpatnag a nagnagnada. Idi nakadanonda idiay Gabaon dagiti buyot dagiti lima nga ari ti agtataraydan. Ket pinagtudo ni Jehova ti dadakkel nga uraro manipud langit, ket ad-adu kadagiti soldado ti matay a matiruan dagiti uraro ngem ti mapapatay ti buybuyot ni Josue.

Makita ni Josue a ti init lumlumneken. Sumipngetton, ket adunto kadagiti kabusor a soldado ti makatalaw. Isut’ gapuna nga indawatna ken Jehova a pagintekenna ti init. Iti kasta mairingpas dagiti Israelitas ti panangabakda ti gubat iti lawag ti aldaw.

Josue

Adda 31 amin a dakes nga ar-ari idiay Canaan a manggurgura iti ili ti Dios. Dinanonna ti innem a tawen para ken Josue ken ti buyotna nga inabak ida. Sa, siniguro ni Josue a ti daga ti mabingaybingay kadagidiay tribo nga agkasapulan pay ti teritoria.

Kalpasan ti adu a tawen, natay ni Josue idi agtawen ti 110. La ketdi no isut’ sibibiag ken dagiti gagayyemna, nagtulnog ti ili iti Dios. Ngem idi natayen dagitoy naimbag a tattao, nangrugin nga agaramid ti dakes dagiti tattao ket mariribokda. Iti kasta kasapulanda manen ti tulong ti Dios.

Josue 10:6-15; 12:7-24; 14:1-5; Oc-ocom 2:8-13.



Dagiti Saludsod

  • Iti ladawan, ania ti ibagbaga ni Josue, ken apay?
  • Kasano a tinulongan ni Jehova da Josue ken ti buyotna?
  • Mano a dakes nga ar-ari ti inabak ni Josue, ket mano a tawen ti panangparmekna kadakuada?
  • Apay a biningaybingay ni Josue ti daga ti Canaan?
  • Mano ti tawen ni Josue idi natay, ket ania ti napasamak kadagiti tattao kalpasanna?

Kanayonan a salsaludsod

  • Basaenyo ti Josue 10:6-15.

    Ti pannakaammotayo a pinagintek ni Jehova ti init ken bulan para iti Israel ipanamnamana kadatayo ita ti ania? (Jos. 10:8, 10, 12, 13; Sal. 18:3; Prov. 18:10)

  • Basaenyo ti Josue 12:7-24.

    Siasino ti talaga a nangparmek kadagiti 31 nga ari iti Canaan, ket apay a napateg daytoy kadatayo ita? (Jos. 12:7; 24:11-13; Deut. 31:8; Luc. 21:9, 25-28)

  • Basaenyo ti Josue 14:1-5.

    Kasano a nabingaybingay ti daga kadagiti tribu ti Israel, ket ania ti ipasimudaag daytoy maipapan kadagiti tawidtayo iti Paraiso? (Jos. 14:2; Isa. 65:21; Ezeq. 47:21-23; 1 Cor. 14:33)

  • Basaenyo ti Uk-ukom 2:8-13.

    Kas ken Josue iti Israel, siasino ita ti manglaplapped iti apostasia? (Uk. 2:8, 10, 11; Mat. 24:45-47; 2 Tes. 2:3-6; Tito 1:7-9; Apoc. 1:1; 2:1, 2)