Accessibility setting

Agpili iti lengguahe

Mapan iti segundario a pagpilian

Mapan iti listaan dagiti linaonna

Mapan iti linaonna

Dagiti Saksi ni Jehova

Iloko

Ti Librok Dagiti Estoria ti Biblia

Estoria 47: Ti Agtatakaw iti Israel

Estoria 47: Ti Agtatakaw iti Israel
Ilemlemmeng ni Acan ti tinakawna

KITAEM ti ikalkali daytoy a lalaki idiay toldana! Maysa a nagpintas a kagay, ken maysa a bareta ti balitok ken sumagmamano a kapisi ti pirak. Innalana ida manipud siudad ti Jerico. Ngem malagipmo kadi ti aramiden koma kadagiti bambanag idiay Jerico?

Rebbeng koma a nadadaelda. Ket ti balitok ken pirak rebbeng koma a naited idiay paggamengan iti tabernakulo ni Jehova. Gapuna a dagitoy a tattao sinukirda ti Dios. Tinakawda ti kukua ti Dios. Ti nagan daydiay lalaki isu ni Acan, ket dagidiay kakaduana paset ti pamiliana. Kitaentayo ti mapasamak.

Kalpasan panangtakaw ni Acan kadagitoy, naabak dagiti Israelitas iti gubat a maibusor ti siudad ti Ai. Naladingit unay ni Josue ket sinaludsodna ken Jehova no apay impalubosna a mapasamak daytoy.

Simmungbat ni Jehova: ‘Nagbasol ti Israel. Innalada ti dadduma kadagiti bambanag a madadael koma wenno maited idiay tabernakulo ni Jehova. Dikayto bendisionan agingga a madadaelyo dagitoy a bambanag ken daydiay nangala kadakuada.’ Imbaga ni Jehova ken ni Josue nga ipakitananto kenkuana no asino ti dakes a tao a nangaramid kadagitoy a bambanag.

Gapuna inummong ni Josue amin a tattao, ket pinidut ni Jehova ti dakes a tao a ni Acan. Inamin ni Acan ti naaramidanna, ket imbagana ken Josue no sadinot’ nangilemmenganna kadagiti tinakawna.

Idi nasarakanen dagitoy, kuna ni Josue ken Acan: ‘Apay a nangiyegka ti riribok kadakami? Ita ni Jehova iyegna met kenka ti riribok!’ Ket ni Acan ken ti pamiliana inuborda ida agingga a natayda. Saan kadi nga ipakpakita dayta kadatayo a ditay koma pulos agal-ala ti bambanag a ditay kukua?

Kalpasan dayta rimmuar manen ti Israel a makidangadang maibusor iti Ai. Itan tinulongan ni Jehova ti ilina, ket nangabakda iti laban.

Josue 7:1-26; 8:1-29.



Dagiti Saludsod

  • Iti ladawan, siasino ti lalaki a mangikalkali iti kinabaknang a naala idiay Jerico, ken siasino dagiti tumultulong kenkuana?
  • Apay a nadagsen a basol ti inaramid ni Acan ken ti pamiliana?
  • Ania ti imbaga ni Jehova idi dinamag ni Josue no apay a naabak dagiti Israelita idi nakigubatda iti Ai?
  • Ania ti napasamak kada Acan ken ti pamiliana idi naipanda ken ni Josue?
  • Ania a napateg a leksion ti maadaltayo iti pannakadusa ni Acan?

Kanayonan a salsaludsod

  • Basaenyo ti Josue 7:1-26.

    Ania ti ipalgak dagiti kararag ni Josue maipapan iti relasionna iti Namarsua kenkuana? (Jos. 7:7-9; Sal. 119:145; 1 Juan 5:14)

    Ania ti ipakita ti ehemplo ni Acan, ket kasano a pakaballaagantayo daytoy? (Jos. 7:11, 14, 15; Prov. 15:3; 1 Tim. 5:24; Heb. 4:13)

  • Basaenyo ti Josue 8:1-29.

    Ania ti personal a rebbengentayo iti kongregasion Kristiano iti kaaldawantayo? (Jos. 7:13; Lev. 5:1; Prov. 28:13)