Accessibility setting

Agpili iti lengguahe

Mapan iti segundario a pagpilian

Mapan iti listaan dagiti linaonna

Mapan iti linaonna

Dagiti Saksi ni Jehova

Iloko

Ti Librok Dagiti Estoria ti Biblia

Estoria 46: Ti Bakud ti Jerico

Estoria 46: Ti Bakud ti Jerico

ANIAT’ nangituang kadagitoy a bakud ti Jerico? Kasla daytat’ natiruan ti dakkel a bomba. Ngem kadagidiay nga al-aldaw awan bombada. Maysa manen a milagro ni Jehova dayta. Adalentayo no kasano a napasamak dayta.

Ti marmarba a bakud ti Jerico

Imbaga ni Jehova ken Josue: ‘Sika ken ti buybuyotmo lawlawenyonto ti siudad a maminsan iti uneg ti innem nga aldaw. Awitenyonto kadakayo ti lakasa ti tulag. Pito a papadi ti magna nga umun-una iti dayta ken puyotenda ti tangguyobda.’

‘Iti maikapito nga aldaw, lawlawenyo ti siudad iti mamimpito a daras. Kalpasanna pagunienyo ti tangguyobyo ti mabayag. Ket tunggal maysa ti agpukkawto ti napigsa. Ket ti bakud marbanto.’

Ni Josue ken dagiti tattao inaramidda kas imbilin ni Jehova. Mabalin a nagbuteng dagiti kabusor ti ili ti Dios idi makitada ida nga agmarmartsa. Makitam kadi ti nalabaga a tali nga agbitbitin manipud bintana? Makimbintana iti dayta? Wen, inaramid ni Rahab kas imbaga dagiti dua nga espia nga aramidenna.

Josue

Kamaudiananna, iti maikapito nga aldaw, narba dagiti bakud kas kinuna ni Jehova. Kuna ni Josue: ‘Patayenyo amin nga adda iti siudad ken puoranyo amin. Alaenyo laeng dagiti pirak, balitok, suer ken landok, ket itedyo ida iti paggamengan iti tolda ni Jehova.’

Ibaga ni Josue kadagiti dua nga espia a mapan ken iruarda ni Rahab ken ti pamiliana manipud balayda. Isu ken ti pamiliana ti naisalakan, kas inkari dagiti espia kenkuana.

Josue 6:1-25.



Dagiti Saludsod

  • Ania ti imbaga ni Jehova nga aramiden dagiti buyot ken dagiti papadi iti uneg ti innem nga aldaw?
  • Ania ti aramidenda iti maikapito nga aldaw?
  • Kas makitam iti ladawan, ania ti mapaspasamak iti bakud ti Jerico?
  • Apay nga adda nalabaga a tali a nakabitin iti bintana?
  • Ania ti imbaga ni Josue nga aramiden dagiti buyotna kadagiti tattao ken iti siudad, ngem ania ti aramidenda kadagiti pirak, balitok, suer, ken landok?
  • Ania ti naibaga nga aramiden dagiti dua nga espia?

Kanayonan a salsaludsod

  • Basaenyo ti Josue 6:1-25.

    Kasano a ti panagmartsa dagiti Israelita iti aglawlaw ti Jerico ket umasping iti panangasaba dagiti Saksi ni Jehova kadagitoy maudi nga aldaw? (Jos. 6:15, 16; Isa. 60:22; Mat. 24:14; 1 Cor. 9:16)

    Kasano a natungpal ti padto a nairekord iti Josue 6:26 agarup 500 a tawen kalpasanna, ken ania ti maadaltayo iti daytoy maipapan iti sao ni Jehova? (1 Ar. 16:34; Isa. 55:11)

Ammuem ti Ad-adu Pay

Sinurot ni Rahab Dagiti Instruksion

Nakalasat ti maysa a pamilia idi narba dagiti pader ti Jerico.