Accessibility setting

Agpili iti lengguahe

Mapan iti segundario a pagpilian

Mapan iti listaan dagiti linaonna

Mapan iti linaonna

Dagiti Saksi ni Jehova

Iloko

Ti Librok Dagiti Estoria ti Biblia

Estoria 45: Ibaballasiw iti Jordan

Estoria 45: Ibaballasiw iti Jordan

KITAEM! Bumalballasiwen dagiti Israelitas iti Karayan Jordan! Ngem ayan dagiti danum? Nakapumpunno ti karayan sumagmamano a minutos sakbayna. Ngem itan nagawan aminen a danum! Aniat’ napasamak? Kitaentayo.

Dagiti Israelita a bumalballasiw iti Karayan Jordan

Idi tiempon para kadagiti Israelitas a bumallasiw iti Karayan Jordan, impaibaga ni Jehova ken Josue kadagiti tattao: ‘Alaen dagiti papadi ti lakasa ti tulag ket umun-unada. Inton ibaddekdan ti sakada iti karayan, agsardengto metten ti dandanum.’

Gapuna innala dagiti papadi ti lakasa ti tulag, imbaklayda nga immun-una ngem kadagiti tattao ket nagnadan idiay karayan. Napegges ti agusna ken nauneg. Ngem idi naibaddeken ti sakada iti danum, nagsardengen nga agayus ti danum! Milagro dayta. Di nagbayag awanen danum idiay karayan!

Dagiti papadi a mangaw-awit ti lakasa ti tulag ti nagtakderda idiay tengnga ti karayan bayat a bumalballasiw dagiti Israelitas iti namaga a daga! Makitam kadi ida iti retrato?

Idi isuamin nakaballasiwdan, imbaga ni Jehova ken Josue a mangibaga iti 12 a napigsa a lallaki a mangala met ti 12 a batbato manipud idiay pagtaktakderan dagiti papadi idiay karayan. Dagitoy a batbato ti maibunton idiay pagkampoan dagiti Israelitas. Agserbida a mangipalagip kadakuada iti milagro. Nangisaad met ni Josue ti 12 a batbato idiay disso a nagtakderan dagiti papadi idiay tukok ti karayan.

Josue

Iti kamaudiananna imbaga ni Josue met kadagiti papadi a mangibakbaklay ti lakasa ti tulag: ‘Umikkatkayon manipud Jordan.’ Ket apaman a nakapanawdan, ti karayan nangrugi manen nga agayus.

Josue 3:1-17; 4:1-18.



Dagiti Saludsod

  • Ania a milagro ti inaramid ni Jehova tapno makaballasiw dagiti Israelita iti Karayan Jordan?
  • Kas pakakitaan ti pammatida, ania ti aramiden dagiti Israelita tapno makaballasiwda iti Karayan Jordan?
  • Apay nga imbaga ni Jehova ken ni Josue a mangpaurnong iti 12 a bato manipud idiay karayan?
  • Ania ti napasamak apaman a nakapanawen dagiti papadi iti Jordan?

Kanayonan a salsaludsod

  • Basaenyo ti Josue 3:1-17.

    Kas ipakita daytoy a salaysay, ania ti nasken nga aramidentayo tapno tulongan ken bendisionannatayo ni Jehova? (Jos. 3:13, 15; Prov. 3:5; Sant. 2:22, 26)

    Ania ti kasasaad ti Karayan Jordan idi bimmallasiw dagiti Israelita nga agturong idiay Naikari a Daga, ket kasano nga intan-ok daytoy ti nagan ni Jehova? (Jos. 3:15; 4:18; Sal. 66:5-7)

  • Basaenyo ti Josue 4:1-18.

    Ania ti panggep ti 12 a bato a naala idiay Jordan ken naikabil idiay Gilgal? (Jos. 4:4-7)