Accessibility setting

Agpili iti lengguahe

Mapan iti segundario a pagpilian

Mapan iti listaan dagiti linaonna

Mapan iti linaonna

Dagiti Saksi ni Jehova

Iloko

Ti Librok Dagiti Estoria ti Biblia

Estoria 44: Inlemmeng ni Rahab Dagiti Espia

Estoria 44: Inlemmeng ni Rahab Dagiti Espia

DAGITOY a lallaki agpegpeggadda. Masapul a makatalawda, wenno mapapatayda. Isuda ti Israelita nga espia, ket ti babai a tumultulong kadakuada isu ni Rahab. Kitaentayo no apay dagitoy a lallaki agpegpeggadda.

Sisasaganan dagiti Israelitas a bumallasiw iti Karayan Jordan a mapan idiay daga ti Canaan. Gapuna nangibaon ni Josue ti dua nga espia tapno kitaen ti daga ken ti siudad ti Jerico.

Ni Rahab ken ti dua nga Israelita nga espia

Idi nakagteng dagiti espia idiay Jerico, napanda idiay balay ni Rahab. Ngem adda nagpulong iti ari ti Jerico maipapan kadakuada. Nagbaon ti ari kadagiti lallaki ken Rahab, ket isut’ minandaranda: ‘Dagiti lallaki nga adda iti balaymo, iruarmo ida!’ Ngem inlemmeng ni Rahab dagiti espia idiay atep. Ket kunana: ‘Adda lallaki nga immay iti balayko. Ngem pimmanawdan sakbay a naserraan dagiti ruangan ti siudad. No agganatkayo, makamakamyo ida!’ Ket dagiti lallaki napanda kinamat ida.

Idi nakapanawdan kuna ni Rahab kadagiti espia: ‘Ammok nga itden ni Jehova kadakayo daytoy a daga. Nangngegmi dagiti nakaskasdaaw a bambanag nga inaramidna para kadakayo. Nagbalinak a naasi kadakayo, pangngaasiyo ta kaasiandak met. Ispalenyo da amak ken inak, ken dagiti kakabsatko.’

Inkari dagiti espia nga ispalenda ida, ngem adda aramiden ni Rahab. ‘Alaem daytoy nalabaga a tali,’ kunada, ‘ket igalutmo iti tawayo. Iserrekmo amin a kakabagiam iti uneg ti balaymo. Inton agsublikami a mangala iti Jerico, makitaminto daytoy a tali iti tawayo ket dikamto papatayen ti asinoman iti balayyo.’ Ket nagsublin dagiti espia ken Josue, ket imbagada amin a napasamak kenkuana.

Josue 2:1-24; Hebreo 11:31.



Dagiti Saludsod

  • Pagnanaedan ni Rahab?
  • Siasino dagiti dua a lallaki iti ladawan, ken apay nga addada idiay Jerico?
  • Ania ti immandar ti ari ti Jerico ken ni Rahab, ngem ania ti insungbat ni Rahab?
  • Kasano a tinulongan ni Rahab dagiti dua a lallaki, ket ania ti kiniddawna?
  • Ania ti inkari dagiti dua nga espia ken ni Rahab?

Kanayonan a salsaludsod

  • Basaenyo ti Josue 2:1-24.

    Kasano a natungpal ti kari ni Jehova a nairekord iti Exodo 23:28 idi rinaut dagiti Israelita ti Jerico? (Jos. 2:9-11)

  • Basaenyo ti Hebreo 11:31.

    Kasano nga itampok ti ehemplo ni Rahab ti kinapateg ti pammati? (Roma 1:17; Heb. 10:39; Sant. 2:25)

Ammuem ti Ad-adu Pay

Namati ni Rahab ken Jehova

Ammuem no kasano a naisalakan ni Rahab ken ti pamiliana idi nadadael ti Jerico.

Ni Rahab ‘Naideklara a Nalinteg Babaen Kadagiti Aramidna’

Kasano nga ipakita ti pakasaritaan ni Rahab a napategtayo amin ken Jehova? Ania ti masursurotayo iti pammatina?