Accessibility setting

Agpili iti lengguahe

Mapan iti segundario a pagpilian

Mapan iti listaan dagiti linaonna

Mapan iti linaonna

Dagiti Saksi ni Jehova

Iloko

Ti Librok Dagiti Estoria ti Biblia

Estoria 43: Ni Josue Nagbalin a Lider

Estoria 43: Ni Josue Nagbalin a Lider

KAYAT ni Moises a makastrek idiay Canaan a kadua dagiti Israelitas. Ngem saan nga ipalubos ni Jehova. Ammom kadi no apay?

Gapu ngamin iti napasamak idi pinangor ni Moises ti bato. Laglagipem, nga isu ken ni Aaron saanda nga imbaga iti ili a ni Jehova ti nangyeg ti danum manipud iti bato. Gapu itoy a rason kuna ni Jehova a dina palubosan ida a makastrek idiay Canaan.

Gapuna sumagmamano a bulan kalpasan ti ipapatay ni Aaron, kuna ni Jehova ken Moises: ‘Alaem ni Josue, ket pagtakderem iti sanguanan ni Eleazar a padi ken ti ili. Ibagam iti isuamin a ni Josue ti baro a lider.’ Tinungpal ni Moises ti kuna ni Jehova, kas makitam iti retrato.

Iyan-anunsio ni Moises ti panagbalin ni Josue kas lider

Kalpasanna kuna ni Jehova ken ni Josue: ‘Bumilegka ket dika agbuteng. Idaulomto dagiti Israelitas a sumrek iti daga ti Canaan nga inkarik kadakuada, ket addaakto kenka.’

Iti kamaudiananna ni Jehova kunana ken Moises nga umuli idiay tuktok ti Bantay Nebo idiay daga ti Moab. Manipud sadiay makita ni Moises ti napintas a daga ti Canaan. Kuna ni Jehova: ‘Daytoy ti daga nga inkarik nga ited kadagiti annak ni Abraham, Isaac ken Jacob. Impakitak dayta kenka, ngem diak ipalubos a makastrekka.’

Idiay tuktok ti Bantay Nebo, natay ni Moises. Isut’ 120 a tawenna. Naladingit unay ti ili ta natayen ni Moises. Ngem maragsakanda nga adda ni Josue kas baro a liderda.

Numeros 27:12-23; Deuteronomio 3:23-29; 31:1-8, 14-23; 32:45-52; 34:1-12.



Dagiti Saludsod

  • Iti ladawan, siasino dagiti dua a lallaki nga agtaktakder a kadua ni Moises?
  • Ania ti imbaga ni Jehova ken ni Josue?
  • Apay nga immuli ni Moises idiay tuktok ti Bantay Nebo, ket ania ti imbaga ni Jehova kenkuana?
  • Mano ti tawen ni Moises idi natay?
  • Apay a naladingit dagiti tattao, ngem ania ti panggapuanda nga agragsak?

Kanayonan a salsaludsod

  • Basaenyo ti Numeros 27:12-23.

    Ania a nadagsen nga annongen ti inted ni Jehova ken ni Josue, ket kasano ti panangaywan ita ni Jehova kadagiti adipenna? (Num. 27:15-19; Ara. 20:28; Heb. 13:7)

  • Basaenyo ti Deuteronomio 3:23-29.

    Apay a saan nga impalubos ni Jehova a makastrek da Moises ken Aaron iti naikari a daga, ket ania ti masursurotayo iti daytoy? (Deut. 3:25-27; Num. 20:12, 13)

  • Basaenyo ti Deuteronomio 31:1-8, 14-23.

    Kasano a ti pammakada a sasao ni Moises iti Israel ipakitana a sipapakumbaba nga inawatna ti disiplina a naggapu ken Jehova? (Deut. 31:6-8, 23)

  • Basaenyo ti Deuteronomio 32:45-52.

    Kasano koma nga apektaran ti Sao ti Dios ti biagtayo? (Deut. 32:47; Lev. 18:5; Heb. 4:12)

  • Basaenyo ti Deuteronomio 34:1-12.

    Nupay saan a personal a nakita ni Moises ni Jehova, ania ti ipasimudaag ti Deuteronomio 34:10 maipapan iti relasionna ken ni Jehova? (Ex. 33:11, 20; Num. 12:8)

Ammuem ti Ad-adu Pay

Bible Card: Josue

Kasano a rinebba ni Josue ken ti buyotna dagiti pader ti Jerico? Iyimprentam daytoy a Bible card, ken ammuem ti ad-adu pay maipapan iti daytoy a natured a karakter iti Biblia.