Accessibility setting

Agpili iti lengguahe

Mapan iti segundario a pagpilian

Mapan iti listaan dagiti linaonna

Mapan iti linaonna

Dagiti Saksi ni Jehova

Iloko

Ti Librok Dagiti Estoria ti Biblia

Estoria 42: Ti Asno Agsao

Estoria 42: Ti Asno Agsao

NAKANGNGEGKA kadin ti asno nga agsao? ‘Saan pay,’ mabalin a kunaem. ‘Saan a makapagsao ti an-animal.’ Ngem naminsan adda asno a nagsao. Kitaentayo no kasano a napasamak dayta.

Maysa nga anghel

Ni Balac, nga ari ti Moab, ti mabuteng kadagiti Israelitas. Gapuna impaayabanna ti tao a nasikap nga agnagan Balaam tapno umay a mangilunod kadagiti Israelitas. Inkarina nga ikkan ni Balaam ti adu a kuarta, gapuna nagsakay ni Balaam iti asnona ket nagrubuaten tapno mapanna kitaen ni Balac.

Nangibaon ni Jehova ti anghel nga atiddag ti kampilanna tapno agtakder idiay dalan a manglapped ken ni Balaam. Saan a makita ni Balaam ti anghel, ngem ti asno makitana. Pinadpadas ti asno a lisian ti anghel, ket iti kamaudiananna inyiddana lattan idiay dalan. Nakapungtot ni Balaam ket binaotna ti asno iti sarukod.

Iti daytoy impangngeg ni Jehova ken Balaam nga agsao ti asnona.

Ni Balaam a nakasakay iti asno

‘Apay a babaotennak?’ insaludsod ti asno.

‘Pinagbalinnak a kasla agmauyong,’ kuna ni Balaam.

‘Trinatoka aya ti kastoy idi?’ insaludsod ti asno.

‘Saan,’ ti sungbat ni Balaam.

Idi kuan pinalubosan ni Jehova a makita ni Balaam ti anghel. Kuna ti anghel: ‘Di rebbeng a mapanka a mangilunod iti Israel. No di koma naglisi ti asnom kaniak, pudno a napatayka koman.’

Numeros 21:21-35; 22:1-40; 23:1-30; 24:1-25.



Dagiti Saludsod

  • Siasino ni Balac, ket apay a pinaayabanna ni Balaam?
  • Apay a nagidda iti dalan ti asno ni Balaam?
  • Ania ti nangngeg ni Balaam nga ibagbaga ti asno?
  • Ania ti imbaga ti maysa nga anghel ken ni Balaam?
  • Ania ti napasamak idi pinadpadas ni Balaam nga ilunod ti Israel?

Kanayonan a salsaludsod

  • Basaenyo ti Numeros 21:21-35.

    Apay nga inabak ti Israel da Sihon nga ari dagiti Amoreo ken ni Og nga ari iti Basan? (Num. 21:21, 23, 33, 34)

  • Basaenyo ti Numeros 22:1-40.

    Ania ti motibo ni Balaam iti panangpadpadasna a mangilunod iti Israel, ket ania ti masursurotayo iti daytoy? (Num. 22:16, 17; Prov. 6:16, 18; 2 Ped. 2:15; Jud. 11)

  • Basaenyo ti Numeros 23:1-30.

    Nupay nagsao ni Balaam a kas man la agdaydayaw ken ni Jehova, kasano nga impakita dagiti tignayna nga isu ket saan nga agdaydayaw ken ni Jehova? (Num. 23:3, 11-14; 1 Sam. 15:22)

  • Basaenyo ti Numeros 24:1-25.

    Kasano a daytoy a salaysay iti Biblia pabilgenna ti pammatitayo iti pannakaibanag ti panggep ni Jehova? (Num. 24:10; Isa. 54:17)