Accessibility setting

Agpili iti lengguahe

Mapan iti segundario a pagpilian

Mapan iti listaan dagiti linaonna

Mapan iti linaonna

Dagiti Saksi ni Jehova

Iloko

Ti Librok Dagiti Estoria ti Biblia

Estoria 41: Ti Uleg a Suer

Estoria 41: Ti Uleg a Suer
Ni Moises ken ti uleg a suer

KASLA pudpudno nga uleg kadi kenka daydiay nakakawikaw iti kayo? Saan. Ti uleg ket naaramid iti suer. Imbaga ni Jehova ken ni Moises nga ikabilna dayta iti kayo tapno daytat’ makita dagiti tattao ket agbiagda. Ngem ti dadduma nga uleg iti daga ti pudnoda. Kinagatda dagiti tattao ket nagsakitda. Ammom kadi no apay?

Ngamin ta nagsao dagiti Israelitas a maibusor iti Dios ken ni Moises. Nagtanabutobda ta awan danum idiay let-ang ken naumadan a mangmangan ti mana.

Ngem nasayaat a taraon ti mana. Inted ni Jehova daytoy babaen iti milagro. Ken inikkanna met ida ti danum babaen iti milagro. Ngem di nagyaman dagiti tattao iti panangaywan ti Dios kadakuada. Gapuna imbaon ni Jehova dagitoy makasabidong nga uleg a mangdusa kadagiti Israelitas. Kagaten ti uleg ida, ket adu kadakuada ti natay.

Dagiti Israelita a kinagat dagiti uleg

Iti kamaudiananna, inamin dagiti Israelitas a nagbasolda. Indawdawatda a maipanaw koman dagiti uleg.

Gapuna imbaga ni Jehova ken Moises nga aramidenna daytoy uleg a suer ket imbitinna iti kayo. Ket siasinoman a nakagat kumita iti dayta. Inaramid ni Moises kas imbilin ti Dios. Dagiti tattao a nakagat kumitada iti uleg a suer ket umimbagda manen.

Adda leksion a maadal ditoy. Amintayo, ti, kas kadagidiay nga Israelitas ti kinagat dagidiay nga uleg. Dagiti tattao ti lumakay, agsakit ken matayda. Ngamin ta pimmanaw da Adan ken Eva ken ni Jehova, ket annakdatay amin.

Ngem imbaon ni Jehova ti Anakna, a ni Jesu-Kristo, ditoy daga tapno maisalakantayo. Ni Jesus ti naibitin iti kayo gapu kadatayo. No kumitatayo kenkuana, maaddaantayo ti biag nga agnanayon. Ngem ad-adunto pay ti maammuantayo iti daytoy iti kamaudianan.

Numeros 21:4-9; Juan 3:14, 15.



Dagiti Saludsod

  • Iti ladawan, ania ti nakakawikaw iti kayo, ket apay nga imbaga ni Jehova ken ni Moises nga ikabilna dayta sadiay?
  • Kasano nga impakita dagiti tattao nga awan panagyamanda iti amin nga inaramid ni Jehova para kadakuada?
  • Ania ti indawat dagiti tattao kalpasan a nangibaon ni Jehova kadagiti makasabidong nga uleg a mangdusa kadakuada?
  • Apay nga imbaga ni Jehova ken ni Moises a mangaramid iti uleg a suer?
  • Ania ti masursurotayo iti daytoy nga estoria?

Kanayonan a salsaludsod

  • Basaenyo ti Numeros 21:4-9.

    Ania a pakdaar ti ipaay kadatayo ti panagtanabutob dagiti Israelita kadagiti probision a naggapu ken Jehova? (Num. 21:5, 6; Roma 2:4)

    Kadagiti simmagsaganad a siglo, kasano nga inusar dagiti Israelita ti uleg a suer, ket ania ti inaramid ni Ari Ezekias? (Num. 21:9; 2 Ar. 18:1-4)

  • Basaenyo ti Juan 3:14, 15.

    Kasano a ti pannakaikabil ti uleg a suer iti pagilasinan a teddek iladawanna ti pannakailansa ni Jesu-Kristo? (Gal. 3:13; 1 Ped. 2:24)