Accessibility setting

Agpili iti lengguahe

Mapan iti segundario a pagpilian

Mapan iti listaan dagiti linaonna

Mapan iti linaonna

Dagiti Saksi ni Jehova

Iloko

Ti Librok Dagiti Estoria ti Biblia

Estoria 37: Ti Tolda a Pagdaydayawan

Estoria 37: Ti Tolda a Pagdaydayawan

AMMOM kadi no ania daytoy a patakder? Isut’ naisangsangayan a tolda a pagdaydayawan ken Jehova. Isut’ maaw-awagan met ti tabernakulo. Nalpas nga impatakder dayta dagiti tattao iti makatawen kalpasan ipapanawda idiay Egipto.

Ti tabernakulo

Idi adda idiay Bantay Sinai ni Moises, imbaga ni Jehova kenkuana no kasano ti panangaramid iti tabernakulo. Imbagana nga aramidenna dayta tapno nalaka a pagsisinaen. Isu nga no umakar dagiti Israelitas iti nadumaduma a luglugar idiay let-ang, maitugotda ti tolda kadakuada.

No kumitaka idiay uneg ti bassit a kuarto idiay ungto ti tolda, makakitaka ti kahon. Daytoy ti maaw-awagan lakasa ti tulag. Iti sinanpungtona, addaan anghel wenno kerubin a balitok. Insurat manen ti Dios ti Sangapulo a Bilbilin iti dua a tapi dagiti bato kalpasan panangbuong ni Moises kadagiti immuna. Dagitoy ti naidulin iti lakasa ti tulag, agraman ti maysa garapon a mana. Malagipmo pay kadi daydiay mana?

Pinili ti Dios ni Aaron a kabsat ni Moises nga agbalin a nangato a padi. Idauloanna dagiti tattao nga agdayaw ken Jehova. Dagiti annakna a lallaki ti papadida met.

Ita kitaem ti dakdakkel a kuarto iti tolda. Makitkitam kadi ti kahon nga adda rumrummuar nga asukna? Isu daytoy ti altar a pagpupuoran dagiti papadi ti nabanglo a banag a maaw-awagan insenso. Sa adda met ti kandelero a pito ti pagsilawanna, ken ti lamisaan nga adda 12 a tinapay iti rabawna.

Idiay paraangan ti tabernakulo adda dakkel a palanggana a napunno ti danum. Us-usaren daytoy dagiti papadi a pagbuggoan. Adda met dakkel nga altar a pakapuoran dagiti natay nga an-animal kas daton ken Jehova. Ti tolda ti adda idiay tengnga ti kampamento. Dagiti Israelitas ti aggigianda kadagiti toldada iti agliklikmutna.

Exodo 25:8-40; 26:1-37; 27:1-8; 28:1; 30:1-10, 17-21; 34:1, 2; Hebreo 9:1-5.



Dagiti Saludsod

  • Ania ti awag iti patakder nga adda iti ladawan, ken ania ti usarna?
  • Apay nga imbaga ni Jehova ken ni Moises a mangaramid iti tabernakulo a nalaka a pagsisinaen?
  • Ania daydiay kahon nga adda iti uneg ti bassit a kuarto idiay ungto ti tolda, ket ania ti nagyanna?
  • Siasino ti pinili ni Jehova nga agbalin a nangato a padi, ket ania ti aramiden ti nangato a padi?
  • Ania dagiti tallo a banag nga adda iti dakdakkel a kuarto iti tolda?
  • Ania dagiti dua a banag nga adda iti paraangan ti tabernakulo, ket ania ti usar dagitoy?

Kanayonan a salsaludsod

  • Basaenyo ti Exodo 25:8-40; 26:1-37; 27:1-8; ken 28:1.

    Ania ti itakderan dagiti kerubin nga adda iti “rabaw ti lakasa ti pammaneknek”? (Ex. 25:20, 22; Num. 7:89; 2 Ar. 19:15)

  • Basaenyo ti Exodo 30:1-10, 17-21; 34:1, 2; ken Hebreo 9:1-5.

    Apay nga impaganetget ni Jehova ti kinapateg ti panangtaginayon iti pisikal a kinadalus kadagiti papadi nga agserserbi iti tabernakulo, ket kasano koma nga apektarannatayo daytoy ita? (Ex. 30:18-21; 40:30, 31; Heb. 10:22)

    Kasano nga impakita ni apostol Pablo a saanen a maus-usar ti tabernakulo ken nagpason ti Linteg ti tulag idi tiempo a sinuratanna dagiti Kristiano a Hebreo? (Heb. 9:1, 9; 10:1)