Accessibility setting

Agpili iti lengguahe

Mapan iti segundario a pagpilian

Mapan iti listaan dagiti linaonna

Mapan iti linaonna

Dagiti Saksi ni Jehova

Iloko

Ti Librok Dagiti Estoria ti Biblia

Estoria 36: Ti Balitok a Baka

Estoria 36: Ti Balitok a Baka

AY! Aniat’ kukuaen dagiti tattao itan? Agkarkararagda iti baka! Apay nga ar-aramidenda daytoy?

Idi nagyan a nabayag ni Moises idiay bantay, kuna dagiti tattao: ‘Ditay ammo ti napaspasamaken ken Moises. Gapuna mangaramidtayo ti maysa a dios a mangiruar kadatayo iti daytoy a daga.’

Imbarsak ni Moises ti dua a tapi ti batbato

Ni Aaron a kabsat ni Moises ti immanamong. Inurnongna amin ti balitok nga ar-aritosda, rinunawna ida ket nangaramid ti balitok a baka. Ket kuna dagiti tattao: ‘Daytoy ti Diostayo, a nangiruar kadatayo manipud Egipto!’ Nagdayada ti dakkel ken dinaydayawda ti balitok a baka.

Nakapungtot unay ti Dios idi nakitana daytoy, ket imbagana ken Moises ti mapaspasamak. Nagganat a simmalog ni Moises manipud bantay. Idi makaasidegen, makitana dagiti tattao nga agkankanta ken agsalsala iti aglawlaw ti balitok a baka! Nakapungtot unay ni Moises ket imbarsakna ti dua a tapi ti bato a yan ti linlinteg, ket naburakburakda. Kalpasanna rinunawna ti balitok a baka ket rinumekna kas polbo.

Agdaydayaw dagiti tattao iti balitok a baka

Imbaga ni Moises iti dadduma kadagiti lallaki nga alaenda dagiti kampilanda. ‘Dagiti dakes a tattao a nagdaydayaw iti balitok a baka masapul a matayda,’ kunana. Gapuna pinatay dagiti lallaki ti 3,000 a tattao. Saan kadi nga ipakita daytoy a rebbeng a ni Jehova laeng ti pagdayawantayo ket saan a ti asinoman nga ulbod a didiosen?

Exodo 32:1-35.



Dagiti Saludsod

  • Iti ladawan, ania ti ar-aramiden dagiti tattao, ken apay?
  • Apay a nakapungtot ni Jehova, ket ania ti inaramid ni Moises idi nakitana ti ar-aramiden dagiti tattao?
  • Ania ti imbaga ni Moises nga aramiden dagiti dadduma a lallaki?
  • Ania ti masursurotayo iti daytoy nga estoria?

Kanayonan a salsaludsod

  • Basaenyo ti Exodo 32:1-35.

    Kasano nga ipakita daytoy a salaysay ti panangmatmat ni Jehova iti panaglaok ti palso a relihion ken ti pudno a panagdayaw? (Ex. 32:4-6, 10; 1 Cor. 10:7, 11)

    Ania ti rumbeng a pagannadan dagiti Kristiano iti panangpilida iti paglinglingayan, kas iti panagkakanta ken panagsasala? (Ex. 32:18, 19; Efe. 5:15, 16; 1 Juan 2:15-17)

    Kasano a nangipaay ti tribu ni Levi iti nasayaat nga ulidan iti panangsalimetmet iti kinalinteg? (Ex. 32:25-28; Sal. 18:25)

Ammuem ti Ad-adu Pay

Nagaramid Dagiti Israelita iti Balitok nga Urbon a Baka

Nagaramid dagiti Israelita iti estatua sa kinunada a dayta kano ti mangirepresentar iti Dios, ngem inanamongan kadi ti Dios dayta?