Accessibility setting

Agpili iti lengguahe

Mapan iti segundario a pagpilian

Mapan iti listaan dagiti linaonna

Mapan iti linaonna

Dagiti Saksi ni Jehova

Iloko

Ti Librok Dagiti Estoria ti Biblia

Estoria 34: Ti Baro a Taraon

Estoria 34: Ti Baro a Taraon

MAIBAGAM kadi ti pidpiduten dagiti tattao iti daga? Dayta ti napudaw, naingpis ken nalukneng. Ania dayta? Daytat’ banag a makan.

Agpidpidut dagiti Israelita iti mana

Agarup makabulanen a nakapanaw dagiti Israelitas iti Egipto. Addadan idiay let-ang. Bassit ti taraon nga agtubo sadiay, ket agtantanabutoben dagiti tattao.

Gapuna kuna ni Jehova: ‘Pagtuduek ti taraon manipud langit.’ Ket isu daytoy ti napasamak. Iti sumaruno nga agsapa, idi nakita dagiti Israelitas daytoy napudaw a banag a nagtinnag, insaludsodda: ‘Ania dayta?’

Kuna ni Moises: ‘Isu daytoy ti taraon nga impaay ni Jehova kadakayo.’ Inawagan dagiti tattao dayta ti MANA. Kasla kankanen a naingpis a kas diro ti ramanna.

‘Tunggal tao pidutenna ti kabaelanna a kanen,’ kuna ni Moises. Gapuna a binigat kastat’ ar-aramidenda. Ket, inton napudoten ti init, ti mana a nabati iti daga marunawen.

Imbaga met ni Moises kadakuada a saanda a mangitedtedda ti mana para iti sumaganad nga aldaw. Ngem dadduma kadakuada nangiteddada. Iti sumaruno nga aldaw ti mana nga inteddada ti inigges ken naangoten!

Ngem, iti maikanem nga aldaw ti lawas, imbaga ni Jehova iti ili a mangurnongda ti mamindua a kaadu ti mana. Kunana nga awan mana nga agtinnag iti maikapito nga aldaw. No iteddada ti mana iti maikapito nga aldaw, saanto nga iggesen ken dinto umangot. Daytoy maysa manen a milagro.

Iti amin a tawtawen a kaadda dagiti Israelitas idiay let-ang, tinaraonan ni Jehova ida iti mana.

Exodo 16:1-36; Numeros 11:7-9; Josue 5:10-12.



Dagiti Saludsod

  • Iti ladawan, ania ti pidpiduten dagiti tattao, ket ania ti awag iti dayta?
  • Ania ti imbaga ni Moises maipapan iti panangpidut dagiti tattao iti mana?
  • Ania ti imbaga ni Jehova nga aramiden dagiti tattao iti maikanem nga aldaw, ken apay?
  • Ania a milagro ti inaramid ni Jehova idi a dagiti tattao indulinda ti mana para iti maikapito nga aldaw?
  • Kasano kapaut a pinakan ni Jehova dagiti tattaona iti mana?

Kanayonan a salsaludsod

  • Basaenyo ti Exodo 16:1-36 ken Numeros 11:7-9.

    Ania ti ipakita ti Exodo 16:8 maipapan iti panangraemtayo kadagiti nadutokan iti teokratiko a pamay-an iti kongregasion Kristiano? (Heb. 13:17)

    Iti let-ang, kasano nga inaldaw a napalagipan dagiti Israelita maipapan iti panagpannurayda ken ni Jehova? (Ex. 16:14-16, 35; Deut. 8:2, 3)

    Ania ti inted ni Jesus a simboliko a kaipapanan ti mana, ket kasanotayo a magunggonaan iti daytoy a “tinapay manipud langit”? (Juan 6:31-35, 40)

  • Basaenyo ti Josue 5:10-12.

    Mano a tawen a nangan dagiti Israelita iti mana, kasano a nasubokda iti daytoy, ken ania ti maadaltayo iti daytoy a salaysay? (Ex. 16:35; Num. 11:4-6; 1 Cor. 10:10, 11)