Accessibility setting

Agpili iti lengguahe

Mapan iti segundario a pagpilian

Mapan iti listaan dagiti linaonna

Mapan iti linaonna

Dagiti Saksi ni Jehova

Iloko

Ti Librok Dagiti Estoria ti Biblia

Estoria 33: Panangballasiw iti Nalabaga a Baybay

Estoria 33: Panangballasiw iti Nalabaga a Baybay

KITAEM no aniat’ mapaspasamak! Isu dayta ni Moises a nangiyunnat ti sarukodna iti Nalabaga a Baybay. Ti kakaduana isuda dagiti Israelitas. Ngem ni Paraon ken amin a buyotna ti malmalmesda iti baybay. Kitaentayo no kasano a napasamak daytoy.

Malmalmes a buyot ti Egipto

Kas naammuantayon, nakapanaw met laeng dagiti Israelitas kalpasan ti maika-10 a saplit. Agangay 600,000 nga Israelita a lallaki ti pimmanaw, agraman adu a babbai ken ub-ubbing. Kimmuyog met kadakuada ti dadduma a tattao a namati ken Jehova. Innalada amin a karkarnero ken kalkaldingda ken bakbakada.

Dagiti Egipcio ti nagbutengda unay gapu iti maudi a saplit. Gapuna inikkanda dagiti Israelitas ti adu a badbado ken bambanag a naaramid iti balitok ken pirak sakbay a pimmanawda.

Kalpasan sumagmamano nga aldaw, nakagteng dagiti Israelitas idiay Nalabaga a Baybay. Idiayda a naginana. Kabayatanna, ni Paraon ken ti buybuyotna nagbabawida no apay a pinalubosanda a pumanaw dagiti ad-adipenda. Gapuna naminsan manen binaliwan ni Paraon ti panunotna, ket dagus nga isu ken ti kabalyeriana kinamatda dagiti Israelitas.

Idi nakita dagiti Israelitas ni Paraon ken ti kabalyeriana nga um-umaydan, nagbutengda met unay. Ngem nangikabil ni Jehova ti ulep iti nagbaetan ti ilina ken dagiti Egipcio. Dagiti Egipcio saanda a makita dagiti Israelitas tapno rautenda koma ida.

Ket ni Jehova imbagana ken Moises nga iyunnatna ti sarukodna iti Nalabaga a Baybay. Idi inaramidna dayta, pinapuyot ni Jehova ti napigsa nga angin ti daya. Dagiti dandanum ti baybay ti nagbingay ket natengngelda iti agsumbangir.

Ket nangrugi a lumasat dagiti Israelitas iti baybay iti namaga a daga. Adu nga oras ti innalana tapno aminda makagtengda a sitatalged idiay bangir. Iti kamaudiananna nakita met laeng dagiti Egipcio dagiti Israelitas. Agtaltalawen dagiti ad-adipenda! Gapuna naggarasugasda iti baybay a kumamat kadakuada.

Idi kimmamatda, sinukto ti Dios ti ligay dagiti karuaheda. Nagbuteng dagiti Israelitas, ket nailasinda a ni Jehova ti makidangdangadang para kadagiti Israelitas maibusor kadakuada. Ngem dayta ti naladawen.

Daytoy ket idi imbaga ni Jehova ken Moises nga iyunnatna manen ti sarukodna iti Nalabaga a Baybay, kas makitayo iti daytoy a retrato. Idi inyunnatna, dagiti pader a dandanum ti nangrugin nga agsubli ket inabbonganna dagiti Egipcio. Ti intero a buyot sinurotda dagiti Israelitas idiay baybay. Awan uray maysa nga Egipcio ti nakaruar a sibibiag!

Anian a ragsak amin a tattao ti Dios ta naisalakanda! Nagkanta dagiti lallaki: ‘Nangabak ni Jehova ti nadayag a panagballigi. Impalladawna dagiti kabayo ken ti nagsakay idiay baybay.’ Ni Miriam a manang ni Moises ken amin a babbai nagsalsalada a sirarag-o agraman ti panderetada. Bayat nga agsalsalada kankantaenda ti isu met laeng a kanta: ‘Nangabak ni Jehova ti nadayag a panagballigi. Impalladawna dagiti kabayo ken ti nagsakay idiay baybay’.

Exodo kapitulo 12 ingganat’ 15.



Dagiti Saludsod

  • Mano nga Israelita a lallaki, babbai, ken ubbing ti pimmanaw idiay Egipto, ket siasino ti kimmuyog kadakuada?
  • Ania ti narikna ni Paraon kalpasan a pinalubosanna a pumanaw dagiti Israelita, ket ania ti inaramidna?
  • Ania ti inaramid ni Jehova tapno dagiti Egipcio saanda a maraut dagiti Israelita?
  • Ania ti napasamak idi inyunnat ni Moises ti sarukodna iti Nalabaga a Baybay, ket ania ti inaramid dagiti Israelita?
  • Ania ti napasamak kadagiti Egipcio idi naggarasugasda iti baybay a kumamat kadagiti Israelita?
  • Kasano nga impakita dagiti Israelita a naragsak ken agyamanda ken ni Jehova gapu ta naisalakanda?

Kanayonan a salsaludsod

  • Basaenyo ti Exodo 12:33-36.

    Iti adu a tawen a panangadipen dagiti Egipcio kadagiti Israelita, kasano a sinigurado ni Jehova a masupapakan dagiti adipenna? (Ex. 3:21, 22; 12:35, 36)

  • Basaenyo ti Exodo 14:1-31.

    Kasano a dagiti sasao ni Moises a nailanad iti Exodo 14:13, 14 apektaranna dagiti adipen ni Jehova ita bayat a padpadaananda ti gubat ti Armagedon? (2 Cron. 20:17; Sal. 91:8)

  • Basaenyo ti Exodo 15:1-8, 20, 21.

    Apay a dagiti adipen ni Jehova rebbeng nga agkantada iti pammadayaw kenkuana? (Ex. 15:1, 2; Sal. 105:2, 3; Apoc. 15:3, 4)

    Ania nga ulidan iti panangidayaw ken ni Jehova ti impasdek da Miriam ken dagiti babbai iti Nalabaga a Baybay para kadagiti Kristiano a babbai iti kaaldawantayo? (Ex. 15:20, 21; Sal. 68:11)

Ammuem ti Ad-adu Pay

Insalakan ni Jehova Dagiti Israelita

Apay a saan a nagbuteng ni Moises iti buyot ti Egipto idi mabutbutengen ti kaaduan nga Israelita?