Accessibility setting

Agpili iti lengguahe

Mapan iti segundario a pagpilian

Mapan iti listaan dagiti linaonna

Mapan iti linaonna

Dagiti Saksi ni Jehova

Iloko

Ti Librok Dagiti Estoria ti Biblia

Estoria 32: Ti 10 a Saplit

Estoria 32: Ti 10 a Saplit

KITAEM dagiti retrato. Tunggal maysa ipakitana ti saplit nga inyeg ni Jehova iti Egipto. Iti umuna a retrato makitam ni Aaron a kinabilna ti Karayan Nilo iti sarukodna. Idi inaramidna dayta, ti danum iti karayan nagbalin a dara ket natay amin nga ikan.

Dagiti saplit kadagiti Egipcio

Sumaganad, pinasang-at ni Jehova dagiti tukak manipud Karayan Nilo. Addada iti amin a suli, ket idi natayda immangot ti daga.

Ket kinabil ni Aaron ti daga iti sarukodna, ket nagbalin a kuto ti tapuk. Dagitoy ti babassit nga agtaytayab nga igges a kumagat.

Ti dadduman kadagiti saplit ti mangdangran laeng kadagiti Egipcio, saan a kadagiti Israelitas. Ti maikapat a saplit isu dagiti dadakkel a ngilaw nga immarak iti balbalay amin nga Egipcio. Ti maikalima a saplit ket maipaay kadagiti an-animal. Adu kadagiti baka ken karnero ken kalding dagiti Egipcio ti natnatay.

Sumaganad, nangala da Moises ken Aaron ti dapo ket impuruakda iti angin. Daytoy ti nangpabusbusali kadagiti tattao ken animal.

Kalpasan dayta, intayag ni Moises ti imana idiay langit, ket nangipatulod ni Jehova ti kadadaksan nga uraro iti historia ti Egipto.

Ti maikawalo a saplit ket isut’ napuskol unay a dodon. Inibusda amin a saan a dinadael ti uraro. Ti maikasiam a saplit isu ti sipnget. Iti tallo nga aldaw inabbungotan ti napuskol a sipnget ti daga, ngem adda silsilaw dagiti Israelitas.

Iti kamaudiananna, imbaga ti Dios iti ilina a warsianda ti dara ti urbon a kalding wenno karnero ti baotek ti ruanganda. Ket limmabas ti anghel ni Jehova iti Egipto. Iti amin a balbalay nga awan dara iti baotekda pinatayna dagiti inauna agpadpada iti tao ken an-animal. Isu daytoy ti maika-10 a saplit.

Kalpasan daytoy a saplit, imbaga ni Paraon kadagiti Israelitas a pumanawdan. Iti dayta met laeng a rabii rinugiandan ti rummuar idiay Egipto.

Exodo kapitulo 7 ingganat’ 12.



Dagiti Saludsod

  • Kas makitam kadagiti ladawan, ania ti umuna a tallo a saplit nga inyeg ni Jehova iti Egipto?
  • Ania ti nakaidumaan ti umuna a tallo a saplit kadagiti dadduma a saplit?
  • Ania ti maikapat, maikalima, ken maikanem a saplit?
  • Ania ti maikapito, maikawalo, ken maikasiam a saplit?
  • Ania ti imbaga ni Jehova nga aramiden dagiti Israelita sakbay ti maikasangapulo a saplit?
  • Ania ti maikasangapulo a saplit, ket ania ti napasamak kalpasan dayta?

Kanayonan a salsaludsod

  • Basaenyo ti Exodo 7:19-8:23.

    Nupay ti immuna a dua a saplit nga inyeg ni Jehova ket natulad dagiti salamangkero ti Egipto, ania ti kapilitan a binigbigda kalpasan ti maikatlo a saplit? (Ex. 8:18, 19; Mat. 12:24-28)

    Kasano nga imparangarang ti maikapat a saplit ti pannakabalin ni Jehova a mangsalaknib kadagiti adipenna, ket kasano a ti pannakaammo iti daytoy pabilgenna dagiti adipen ti Dios bayat nga umad-adani ti “dakkel a rigat”? (Ex. 8:22, 23; Apoc. 7:13, 14; 2 Cron. 16:9)

  • Basaenyo ti Exodo 8:24; 9:3, 6, 10, 11, 14, 16, 23-25; ken 10:13-15, 21-23.

    Ania a dua a grupo ti inlatak ti Sangapulo a Saplit, ket kasano nga apektaran daytoy ti panangmatmattayo kadagita a grupo iti kaaldawantayo? (Ex. 8:10, 18, 19; 9:14)

    Kasanonatayo a tulongan ti Exodo 9:16 a mangtarus no apay nga impalubos ni Jehova nga agtalinaed ni Satanas agingga ita? (Roma 9:21, 22)

  • Basaenyo ti Exodo 12:21-32.

    Kasano nga adu ti maisalakan gapu iti Paskua, ket ania ti iladladawan ti Paskua? (Ex. 12:21-23; Juan 1:29; Roma 5:18, 19, 21; 1 Cor. 5:7)

Ammuem ti Ad-adu Pay

Ti Dios Imbaonna ni Moises Idiay Egipto

Situtured a nakisarita da Moises ken Aaron iti naturay a ni Faraon. I-download dagitoy nga aktibidad ken pagsasaritaanyo a sangapamiliaan.