Accessibility setting

Agpili iti lengguahe

Mapan iti segundario a pagpilian

Mapan iti listaan dagiti linaonna

Mapan iti linaonna

Dagiti Saksi ni Jehova

Iloko

Ti Librok Dagiti Estoria ti Biblia

Estoria 30: Ti Dumardarang a Kayo

Estoria 30: Ti Dumardarang a Kayo

NADANDANON ni Moises inggana idiay bantay ti Horeb nga agbirbirok ti ruot para iti karkarnerona. Ditoy a nakitana ti dumardarang a kayo a bassit, ngem saan met a maur-uram!

Ni Moises iti sanguanan ti dumardarang a kayo

Idi immasideg, maysa a timek ti naggapu iti kayo a kunkunana: ‘Saankan nga umasideg unay. Ikkatem dagiti sapatosmo, ta agtaktakderka iti nasantuan a disso.’ Ti Dios ti agsasao babaen iti maysa nga anghel, gapuna nga inapput ni Moises ti rupana.

Kuna ti Dios: ‘Nakitak ti panagsagsagaba ti ilik idiay Egipto. Innak a wayawayaan ida, ket sika ti ibaonko a mangipanaw ti ilik manipud Egipto.’

Ngem kuna ni Moises: ‘Nakurapayak a tao. Kasano a maaramidak daytoy? Ken siasinonto ti ibagak a nangibaon kaniak?’

‘Daytoyto ti kunaem,’ insungbat ti Dios. ‘‘ ‘Ni JEHOVA, ti Dios ni Abraham, ti Dios ni Isaac ken ti Dios ni Jacob ti nangibaon kaniak kadakayo.” ’ Ket innayon pay ni Jehova: ‘Isu daytoy ti naganko iti agnanayon.’

Ket inikkan ni Jehova ti pannakabalin ni Moises nga agaramid kadagiti datdatlag, di la ket ta di mamati dagiti Israelitas kenkuana. Umuna impurruak ni Moises ti sarukodna iti daga, ket nagbalin nga uleg. Sumaganad, ni Jehova imbagana ken Moises nga ikabilna ti imana iti uneg ti badona. Dayta ti inaramidna, ket idi nga inruarna, kasla daytat’ naaddaan ti dakes a sakit a maawawagan ti kukutel. Kalpasanna ni Jehova inikkanna ni Moises ti pannakabalin a mangaramid ti maikatlo a datdatlag. Iti kamaudiananna kuna ni Jehova: ‘No aramidemto dagitoy a datdatlag, patienton dagiti Israelitas nga imbaonka.’

Kalpasan dayta nagawid ni Moises ket kunana ken ni Jetro: ‘Pangngaasim ta palubosannak nga agsubli kadagiti kakabagiak idiay Egipto ken kitaek no kasanoda.’ Gapuna ni Jetro pinalubosanna ni Moises, ket nagsubli ni Moises idiay Egipto.

Exodo 3:1-22; 4:1-20.



Dagiti Saludsod

  • Ania ti nagan ti bantay iti ladawan?
  • Ania ti karkarna a nakita ni Moises idi napan idiay bantay a kaduana dagiti karnerona?
  • Ania ti kuna ti timek a naggapu iti dumardarang a kayo, ken makintimek iti dayta?
  • Ania ti insungbat ni Moises idi imbaga kenkuana ti Dios nga isu ti mangiruar kadagiti adipen ti Dios idiay Egipto?
  • Ania ti imbaga ti Dios nga isungbat ni Moises no damagen dagiti tattao no siasino ti nangibaon kenkuana?
  • Kasano a mapaneknekan ni Moises a ti Dios ti nangibaon kenkuana?

Kanayonan a salsaludsod

  • Basaenyo ti Exodo 3:1-22.

    Kasano a ti kapadasan ni Moises ipatalgedna kadatayo a tulongannatayo ni Jehova uray no mariknatayo a saantayo a kualipikado a mangitungpal iti teokratiko nga annongen? (Ex. 3:11, 13; 2 Cor. 3:5, 6)

  • Basaenyo ti Exodo 4:1-20.

    Ania ti napasamak a panagbalbaliw iti kababalin ni Moises bayat ti 40 a tawen a panagyanna idiay Midian, ket ania ti maadal iti daytoy dagidiay gumawgaw-at kadagiti pribilehio iti kongregasion? (Ex. 2:11, 12; 4:10, 13; Mik. 6:8; 1 Tim. 3:1, 6, 10)

    Uray no disiplinaennatayo ni Jehova babaen ti organisasionna, ania a panagtalek ti maadaltayo iti ehemplo ni Moises? (Ex. 4:12-14; Sal. 103:14; Heb. 12:4-11)