Accessibility setting

Agpili iti lengguahe

Mapan iti segundario a pagpilian

Mapan iti listaan dagiti linaonna

Mapan iti linaonna

Dagiti Saksi ni Jehova

Iloko

Ti Librok Dagiti Estoria ti Biblia

Estoria 29: No Apay Nagtalaw ni Moises

Estoria 29: No Apay Nagtalaw ni Moises

KITAEM! Agtaltalaw ni Moises manipud Egipto. Makitam ti lallaki a mangkamkamat kenkuana? Ammom kadi no apay kayatda a papatayen ni Moises? Kitaentayo no masarakantayo dayta.

Ni Moises taltalawanna ti Egipto

Dimmakkel ni Moises iti balay ni Paraon. Isut’ nagbalin a masirib ken natan-ok. Ammo ni Moises nga isu ket saan nga Egipcio, ngem dagiti pudno a nagannak kenkuana Israelita nga ad-adipenda.

Maysa nga aldaw, idi agtawenen ti uppatapulo, napan ni Moises tapno makita ti kasasaad dagiti kailianna. Nakitana ti maysa nga Egipcio a mangbabaot ti padana nga Israelita. Awan makakitkita, gapuna pinang-or ni Moises ti Egipcio ket ti Egipcio ti natay. Ket inlemmeng ni Moises ti bagi idiay kadaratan.

Iti sumaganad nga aldaw rimmuar manen ni Moises tapno makita dagiti kailianna. Nakitana ti dua a lallaki nga Israelita nga agap-apa, gapuna kuna ni Moises iti maysa a nakabasol: ‘Apay a babaotem ti kabsatmo?’

Kuna ti lalaki: ‘Asino ti nangaramid kenka nga agturay ken ukommi? Patayennak kadi kas ti panangpapataymo iti Egipcio?’

Itan nagbutengen ni Moises. Naammuanen ti tattao ti inaramidna! Uray ni Paraon nangngeganna dayta, ket nangibaon ti tattao a mangpapatay ken Moises. Isu a nagtalaw ni Moises manipud Egipto.

Nagtaray ni Moises idiay adayo a daga ti Madian. Idiay nasarakanna ti pamilia ni Jetro. Inasawana ti maysa kadagiti babbalasangna nga agnagan Sefora ket nagbalin a pumapastor. Iti 40 a tawtawen isut’ naggigian idiay daga ti Madian. Ngem maysa nga aldaw adda nakaskasdaaw a banag a napasamak a nangbalbaliw ti intero a panagbiag ni Moises. Kitaentayo no ania daytoy nakaskasdaaw a banag.

Exodo 2:11-25; Aramid 7:22-29.



Dagiti Saludsod

  • Dimmakkelan ni Moises, ngem ania ti ammona maipapan kadagiti nagannak kenkuana?
  • Ania ti inaramid ni Moises idi agtawenen iti 40?
  • Ania ti imbaga ni Moises iti Israelita a lalaki a makiap-apa, ket ania ti insungbat ti lalaki?
  • Apay a nagtalaw ni Moises idiay Egipto?
  • Nagtarayan ni Moises, ket siasino ti nasarakanna sadiay?
  • Ania ti inaramid ni Moises bayat ti 40 a tawen kalpasan ti ipapanawna idiay Egipto?

Kanayonan a salsaludsod

  • Basaenyo ti Exodo 2:11-25.

    Nupay adu a tawen a nasursuruan ni Moises iti sirib dagiti Egipcio, kasano nga impakita ni Moises ti kinasungdona ken ni Jehova ken kadagiti padana nga Israelita? (Ex. 2:11, 12; Heb. 11:24)

  • Basaenyo ti Aramid 7:22-29.

    Ania ti masursurotayo iti panangpadas ni Moises nga is-isuna a mangispal iti Israel idiay Egipto a nakaadipenanda? (Ara. 7:23-25; 1 Ped. 5:6, 10)