Mapan iti linaonna

Mapan iti segundario a pagpilian

Mapan iti listaan dagiti linaonna

Dagiti Saksi ni Jehova

Iloko

Ti Librok Dagiti Estoria ti Biblia

Estoria 28: Naispal ti Ubing a Moises

Estoria 28: Naispal ti Ubing a Moises

KITAEM ti ubing nga agsangsangit, a petpetpetanna ti ramay ti babai. Isu daytoy ni Moises. Ammom kadi no asino dayta napintas a babai? Isu ti prinsesa, anak a babai ni Paraon.

Ni Moises nakita ti anak ni paraon

Inlemlemmeng ti ina ni Moises ti anakna agingga nga isut’ tallo a bulanen, ta saanna a kayat nga isut’ papatayen dagiti Egipcio. Ngem ammona a mabalin a masarakandanto, gapuna inkabilna ni Moises iti basket, ket inkabilna ti basket kadagiti nangato a ruruot idiay Karayan Nilo. Ni Miriam a manang ni Moises ti nabilin nga agtakder iti asideg ket kitaenna no aniat’ mapasamak.

Idi kuan ti balasang ni Paraon immay idiay Karayan Nilo nga agdigos. Apaman latta ta nakitana ti basket. Imbilinna iti maysa kadagiti babbai nga adipenna nga alaenna ti basket. Linuktanna dayta ket nakitana ti kinapintas unay ni ubing a Moises. Maasian unay ti prinsesa ken Moises, ket saanna kayat nga isut’ mapapatay.

Idin immasideg ni Miriam. Isu ti makitayo iti retrato. Kuna ni Miriam: ‘Kayatyo nga innak mangawag ti maysa a babai nga Israelita a mangtagibi iti ubing para kenka?’

‘Pangngaasim,’ kuna ti prinsesa.

Dardaras a nagtaray ni Miriam ken ni nanangna ket isu ti inyegna iti prinsesa. Kuna ti prinsesa: ‘Alaem daytoy nga ubing ket isu ti tagibiem para kaniak, ket bayadankanto.’

Gapuna ti ina ni Moises ti nangaywan iti mismo nga anakna. Iti kamaudiananna isut’ impanna iti anak a babai ni Paraon, nga isut’ nangpadakkel kenkuana kas anakna met laeng. Kasta ti makagapu no kasano a dimmakkel ni Moises iti balay ni Paraon.

Exodo 2:1-10.



Dagiti Saludsod

  • Siasino ti ubing iti ladawan, ken makin-ramay ti petpetpetanna?
  • Ania ti inaramid ti ina ni Moises tapno saan a matay ni Moises?
  • Iti ladawan, siasino ti balasitang, ken ania ti inaramidna?
  • Ania ti imbaga ni Miriam idi a ti balasang ni Paraon nakitana ti ubing?
  • Ania ti imbaga ti prinsesa iti ina ni Moises?

Kanayonan a saludsod

  • Basaenyo ti Exodo 2:1-10.

    Ania nga oportunidad ti naited iti ina ni Moises a mangsanay ken mangisuro ken ni Moises bayat ti kinamaladagana, ket ania nga ulidan ti ipaay daytoy kadagiti nagannak ita? (Ex. 2:9, 10; Deut. 6:6-9; Prov. 22:6; Efe. 6:4; 2 Tim. 3:15)

Ammuem ti Ad-adu Pay

PROYEKTO PARA ITI PANAGDAYDAYAW TI PAMILIA

Dimmakkel ni Moises Idiay Egipto

Ania ti maadaltayo iti biag ni Moises idi ubing pay idiay Egipto? I-download dagitoy nga aktibidad ken pagsasaritaanyo kas pamilia.