Accessibility setting

Agpili iti lengguahe

Mapan iti segundario a pagpilian

Mapan iti listaan dagiti linaonna

Mapan iti linaonna

Dagiti Saksi ni Jehova

Iloko

Ti Librok Dagiti Estoria ti Biblia

Estoria 24: Sinuot ni Jose ti Kakabsatna

Estoria 24: Sinuot ni Jose ti Kakabsatna

KAYAT a maammuan ni Jose no ti 10 a kakabsatna ti nauyong ken dakesda pay laeng. Isu a kunana: ‘Espiakayo.’

‘Saan,’ kunada. ‘Naimbagkami a tattao. Agkakabsatkam amin. Adda 12 kami idi. Ngem maysa a kabsatmi ti awanen, ket ti inaudi adda ken tatangmi idiay balay.’

Sinsinan di patien ni Jose ida. Impaibaludna ni kabsatna a Simeon, ket pinalubosanna ti dadduma a nangala ti taraon ken pinagawidna ida. Ngem kunana kadakuada: ‘No agsublikayo, ikuyogyonto ti inaudi a kabsatyo.’

Idi nagawidda idiay Canaan, imbaga dagiti kakabsatna ti napasamak ken Jacob nga amada. Nagsennaay ni Jacob. Madina kayat nga ikuyogda ni Benjamin idiay Egipto. Ngem idi maibus manen ti taraonda, impaikuyog met laeng ni Jacob ni Benjamin idiay Egipto tapno makaalada ti ad-adu pay a taraon.

Idi makita ni Jose nga um-umayen dagiti kakabsatna, maragsakan unay a makakita ti inaudi a kabsatna a ni Benjamin. Siempre, awan kadakuada ti makaammo a daytoy tao a natan-ok isu ni Jose. Itan nangaramid ni Jose ti suot agpaay kadagiti kakabsatna iti ama.

Pinapunnona kadagiti ad-adipenna amin a supsupotda iti taraon. Ngem saanna impakpakaammo kadakuada, impaikabilna met ti nagpintas a kopana a pirak idiay supot ni Benjamin. Idi nakapanawda aminen ken nakaadayoda bassiten idiay dalan, pinakamakam ni Jose ida kadagiti ad-adipenna.

Idi nakamakamda idan, sinukisok dagiti ad-adipen amin a supot ket nasarakanda ti kopa idiay supot ni Benjamin. Nagparang a kasla tinakaw ni Benjamin ti kopa! Kuna dagiti adipen: ‘Ti dadduma mabalinda ti mapanen. Masapul a kumuyog ni Benjamin kadakami.’ Ania ngay itan ti aramiden ti 10 a kakabsatna?

Nagsublida amin a kadua ni Benjamin ken ni Jose. Kuna ni Jose: ‘Mabalinyo aminen ti agawid. Ngem agtalinaed ditoy ni Benjamin kas adipenko.’

Itan kuna ni Juda: ‘Pangngaasim, siakon ti pagbalinem nga adipen, ngem pagawidem kadi dayta ubing.’

Makita ni Jose a nagbalbaliwen dagiti kakabsatna. Saandan a nauyong ken dakes. Kitaentayo no ania ita ti aramiden ni Jose.

Genesis 42:9-38; 43:1-34; 44:1-34.

Mapabpabasol dagiti kakabsat ni Jose


Dagiti Saludsod

  • Apay a pinabasol ni Jose dagiti kakabsatna kas espia?
  • Apay nga impalubos ni Jacob a mapan idiay Egipto ti inaudi nga anakna a ni Benjamin?
  • Kasano a naikabil iti supot ni Benjamin ti pirak a kopa ni Jose?
  • Ania ti imbaga ni Juda tapno mawayawayaan ni Benjamin?
  • Kasano a nagbalbaliw dagiti kakabsat ni Jose?

Kanayonan a salsaludsod

  • Basaenyo ti Genesis 42:9-38.

    Kasano a dagiti sasao ni Jose iti Genesis 42:18 ket nagsayaat a palagip kadagidiay addaan iti annongen iti organisasion ni Jehova ita? (Neh. 5:15; 2 Cor. 7:1, 2)

  • Basaenyo ti Genesis 43:1-34.

    Nupay ni Ruben ti inauna, apay a ni Juda ti nagsao para kadagiti kakabsatna? (Gen. 43:3, 8, 9; 44:14, 18; 1 Cron. 5:2)

    Kasano a sinubok ni Jose dagiti kakabsatna, ken apay? (Gen. 43:33, 34)

  • Basaenyo ti Genesis 44:1-34.

    Kas paset ti panangallilaw ni Jose a mangilimed iti kinasiasinona kadagiti kakabsatna, ania ti pinagparang ni Jose? (Gen. 44:5, 15; Lev. 19:26)

    Kasano nga impakita dagiti kakabsat ni Jose a saandan a managimon iti kabsatda? (Gen. 44:13, 33, 34)