Accessibility setting

Agpili iti lengguahe

Mapan iti segundario a pagpilian

Mapan iti listaan dagiti linaonna

Mapan iti linaonna

Dagiti Saksi ni Jehova

Iloko

Ti Librok Dagiti Estoria ti Biblia

Estoria 23: Ti Tagtagainep ni Paraon

Estoria 23: Ti Tagtagainep ni Paraon

DUA a tawen ti naglabas, ket adda pay laeng ni Jose idiay pagbaludan. Isut’ saanen a nalaglagip ti mamakpakan ti ari. Maysa a rabii adda dua a naisalsalumina a tagtagainep ni Paraon ket pampanunotenna no ania ti kaipapananda. Makitkitayo aya a matmaturog ditoy? Iti sumaruno a bigat, awan makaibaga kenkuana ti kaipapanan dagiti tagtagainepna.

Idi kuan nalagip ti mamakpakan ni Jose. Imbagana iti Paraon ti maipapan kenkuana ket pinaayaban ni Paraon a dagus ni Jose manipud pagbaludan.

Imbaga ni Paraon ti tagtagainepna ken ni Jose: ‘Nakakitaak ti pito a nalulukmeg, napipintas a baka. Sa nakakitaak ti pito a nakukuttong ken nakatultulang a baka. Ket dagiti nakukuttong inalun-onda dagiti nalulukmeg a baka.

Agtagtagainep ni Paraon

‘Iti maikadua a tagtagainepko nakakitaak ti pito a napumpunno, naluomen a dawdawa. Ket nakakitaak met ti pito a naeppes, nagango a dawdawa. Ket dagiti pito a naeppes a dawdawa inalun-onda dagiti pito a dawdawa a nabagas ken nasayaat.’

Kuna ni Jose ken ni Paraon: ‘Ti dua a tagtagainep maymaysa ti kaipapananda. Addanto pito a tawtawen a kinawadwad ti taraon iti Egipto. Sumaruno iti dayta addanto met pito a tawtawen a nakirang ti agtubo a taraon.’

Gapuna kuna ni Jose ken ni Paraon: ‘Mangpilika ti tao a masirib ket pagbalinem nga agturay nga agurnong ti taraon bayat dagiti pito a nasayaat a tawtawen. Iti kasta saanto nga agbisin dagiti tattao bayat ti pito a dakes a tawtawen.’

Nagustuan ni Paraon ti ideya. Ket pinilina ni Jose nga agurnong ti taraon ken idulinna ida. Sumarsaruno ken ni Paraon, nagbalin ni Jose kas katatanokan a tao idiay Egipto.

Walo a tawen iti kamaudiananna, bayat ti bisin, nakita ni Jose dagiti 10 nga inauna a kakabsatna. Imbaon ida ni amada a Jacob idiay Egipto, ta maib-ibusen ti taraonda idiay ilida a Canaan. Dagiti kakabsat ni Jose saanda a nabigbig ta isut’ dimmakkelen ken naiduma ti badona kadakuada.

Itan malagip ni Jose daydi tagtagainepna idi ubing a dagiti kakabsatna agruknoyda kenkuana. Malagipmo met kadi dayta? Gapuna makita ni Jose a ti Dios ti nangibaon kenkuana idiay Egipto, ken agpaay iti naimbag a rason. Aniat’ pagarupmo nga aramiden ni Jose? Kitaentayo.

Genesis 41:1-57; 42:1-8; 50:20.



Dagiti Saludsod

  • Ania ti napasamak ken ni Paraon iti maysa a rabii?
  • Apay a ti mamakpakan nalagipna met laeng ni Jose?
  • Kas makitam iti ladawan, ania dagiti dua a tagtagainep ni Paraon?
  • Ania ti imbaga ni Jose a kaipapanan dagiti tagtagainep ni Paraon?
  • Kasano a nagbalin ni Jose kas sumarsaruno ken ni Paraon a katan-okan a tao idiay Egipto?
  • Apay a napan dagiti kakabsat ni Jose idiay Egipto, ket apay a saanda a nabigbig ni Jose?
  • Ania a tagtagainep ti nalagip ni Jose, ket ania ti naawatanna?

Kanayonan a salsaludsod

  • Basaenyo ti Genesis 41:1-57.

    Kasano nga inturong ni Jose ti atension ken ni Jehova, ket iti ania a pamay-an a matulad dayta dagiti Kristiano ita? (Gen. 41:16, 25, 28; Mat. 5:16; 1 Ped. 2:12)

    Kasano a dagiti tawen ti kinawadwad idiay Egipto a sinaruno dagiti tawen ti bisin siuumiso a paggidiatenna ti naespirituan a kasasaad dagiti adipen ni Jehova ita ken ti Kakristianuan? (Gen. 41:29, 30; Amos 8:11, 12)

  • Basaenyo ti Genesis 42:1-8 ken 50:20.

    Maiparit kadi kadagiti agdaydayaw ken ni Jehova ti agruknoy iti tao kas pammadayaw ken panangraem iti saadna no dayta ket kaugalian iti maysa a pagilian? (Gen. 42:6)

Ammuem ti Ad-adu Pay

Sinalbar ni Jose ti Adu a Biag

I-download ken basaenyo daytoy nga estoria maipapan ken Jose, nga inusar ti Dios a mangsalbar iti intero a nasion.