Mapan iti linaonna

Mapan iti segundario a pagpilian

Mapan iti listaan dagiti linaonna

Dagiti Saksi ni Jehova

Iloko

Ti Librok Dagiti Estoria ti Biblia

Estoria 22: Ni Jose Naibalud

Estoria 22: Ni Jose Naibalud

NI JOSE ti 17 laeng ti tawenna idi naipan idiay Egipto. Idiay isut’ nailako iti tao nga agnagan Potifar. Agtartrabaho ni Potifar iti ari ti Egipto, a maaw-awagan Paraon.

Ni Jose iti pagbaludan

Nagaget nga agtrabaho ni Jose para iti apona. Gapuna nga idi natataenganen ni Jose, isut’ pinagbalin ni Potifar nga inkargado iti intero a balayna.

Nagbalin a nataer a lalaki ni Jose, ket kayat ti asawa ni Potifar nga agkaiddada. Ngem ammo ni Jose a dakes daytoy ket saanna kayat nga aramiden dayta. Makaunget unay ti asawa ni Potifar. Gapuna inulbodanna ni lakayna ket kunana: ‘Dayta dakes a Jose pilpilitennak nga agkaiddakami!’ Pinati ni Potifar ti asawana ket impaibaludna ni Jose.

Gapu ta nasayaat a tao ni Jose, isut’ naikabil nga agturay iti amin a sabsabali a balud. Iti kamaudiananna nakapungtot ni Paraon iti mamakpakanna ken ti agtintinapayna, ket impaibaludna met ida. Maysa a rabii tunggal maysa ti nagtagtagainep ti naisalsalumina. Iti sumaganad nga aldaw kuna ni Jose: ‘Ibagayo kaniak dagiti tagtagainepyo.’ Idi naibagadan, ni Jose, babaen iti tulong ti Dios, inlawlawagna ti kaiyulogan ti tagtagainepda.

Kuna ni Jose iti mamakpakan ti ari nga iti tallo nga aldaw isut’ maparuar iti pagbaludan. Indawatna iti mamakpakan nga isu koma ti laglagipenna inton makaruaren. Ngem iti agtintinapay kinunana: ‘Iti tallo nga aldaw paputol ni Paraon ti ulom.’

Iti uneg ti tallo nga aldaw napasamak nga apagpag-isu kas insao ni Jose. Pinaputol ni Paraon ti ulo ti agtintinapay. Ngem ti mamakpakan ti ari ti nawayawayaan manipud iti pagbaludan ket nangrugi nga agserbi manen iti ari. Ngem nalipatanna nga interamente ni Jose! Gapuna nagtalinaed ni Jose idiay pagbaludan.

Genesis 39:1-23; 40:1-23.



Dagiti Saludsod

  • Mano ti tawen ni Jose idi naipan idiay Egipto, ket ania ti napasamak idi nakadanon sadiay?
  • Apay a naibalud ni Jose?
  • Ania ti akem ni Jose idiay pagbaludan?
  • Iti pagbaludan, ania ti inaramid ni Jose iti mamakpakan ken iti agtintinnapay ni Paraon?
  • Ania ti napasamak idi nawayawayaan ti mamakpakan?

Kanayonan a salsaludsod

  • Basaenyo ti Genesis 39:1-23.

    Tangay awan ti naisurat a linteg ti Dios a mangkondenar iti pannakikamalala idi kaaldawan ni Jose, apay a tinarayan ni Jose ti asawa ni Potifar? (Gen. 2:24; 20:3; 39:9)

  • Basaenyo ti Genesis 40:1-23.

    Ilawlawagmo iti apagbiit ti tagtagainep ti mamakpakan, wenno agaw-awit iti kopa, ken ti kaipapananna nga inted ni Jehova ken ni Jose. (Gen. 40:9-13)

    Ania ti tagtagainep ti agtintinapay, wenno panadero, ket ania ti kaipapananna? (Gen. 40:16-19)

    Kasano a tinulad ti klase matalek ken masirib nga adipen ita ti kababalin ni Jose? (Gen. 40:8; Sal. 36:9; Juan 17:17; Ara. 17:2, 3)

    Kasano nga ipakita ti Genesis 40:20 no ania ti panangmatmat dagiti Kristiano iti panangrambak iti kasangay? (Ecl. 7:1; Mar. 6:21-28)

Ammuem ti Ad-adu Pay

BIBLE CARD

Potifar Bible Card

I-download daytoy a Bible card, ken ammuen ti ad-adu pay maipapan ken Potifar, nga apo ni Jose idiay Egipto.